ZALEN September 6, 2026: Comptroller & Auditor General (CAG) of India report chuan Local Administration Department building (Directorate) Rs. vaibelchhe 6 saknaah SoR 2013 hman tur a nih laiin SoR 2019 hman a ni tih a tarlang.

August 27, 2026 a Mizoram Legislative Assembly-a CAG report pharh takin a tar lan danin LAD Directorate sakna atan hian chief engineer (buildings) chuan September 10, 2018 khan remtihna a pe a, detailed project report (DPR) pawh Scheduled of Rate (SoR) 2013 tur angin building sak nan hian Rs. vaibelchhe 6 chu New Economic Development Policy sum atanga sak turin February ni 1,2019 kan expenditure sanction pek a ni.

Department chuan restricted tender hmangin M/S Zothan Consultancy Services, Luangmual chu a sa tura thlangin work order pawh July 31, 2019 khan pek a ni a. August 6, 2019 khan deed of agreement ziah niin contractor hian December 15, 2019 atanga hna tanin September 15, 2023-a zo tura tih a ni.

CAG report tarlan danin LAD Directorate building saknaah hian PWD SoR 2013 hman tur a nih laiin hnathawhna atan hian SoR 2019 hman a ni thung a. Ruahman dan chuan building hi chhawng ruk sak tur niin mi pariat chuan theihna lift dah tur a ni bawk.

Mahse, SoR 2019 hman a nih vang hian a tira awm tura ruahmanna chhawng thumna leh chhawng lina (third & fourth floor) bakah lift chu dah theih a ni lo va, hei vang hian Rs. vaibelchhe 1.56 senga dah tur chu dah theih a ni lo va. Rs. vaibelchhe 1.56 senna tura ruahman, chhawng thumna sakna tur Rs. nuai 70.75, chhawng lina sakna tur Rs. nuai 43.18 leh lift dahna tur Rs. nuai 42 te chu dah theih a ni ta lo niin a tar lang.