ZALEN April 23, 2026: School Education Minister Dr Vanlalthlana hovin vawiin khan a Office Chamber-ah School Education Department hnuaia State Level Anti-Drugs Committee neih a ni a, ruihhlo laka school naupangte fihlim theih nana hmalak dan tur rel a ni.

Meeting-ah hian ruihhlovin school naupangte a tihbuai dan chungchang zir chianna awm tawhte thlir ho niin ruahmanna siam a ni a. Hmalakna atan School Drug Policy buaipui turin Drafting Committee din a ni.

Ruihhlo laka fihlim lo zirtirtute lakah na taka hma lak a nih tur thu leh school leh a chheh vela ruihhlo ti leh zuarte dim dawi an nih loh tur thu sawi ho a ni a. Ruihhlo leh a kaihhnawih natna avanga Mizoram hming mawi lo thin chu zirna hmanga siam that dan tur leh, sawrkar, khawtlang, kohhran leh chhungkua tan ho dan tur ngaihtuah ho a ni. Health & Family Welfare, Social Welfare & Tribal Affairs leh Excise & Narcotics te nen ruihhlo do kawnga thawh ho dan tur rel a ni bawk.

Meeting-ah hian School Education Department, Mizoram Social Defence & Rehabilitation Board, Social Welfare & Tribal Affairs, Excise & Narcotics Department hotute leh Mizoram Teachers Federation hruaitute an tel a ni.