ZALEN April 19, 2026 : Mizoram University-a Zoology department-a head, Prof. H.T. Lalremsanga leh a thawhpuite chuan tun hnai khan West Garo Hills, Meghalaya atangin rul chi thar an hmu chhuak a, a hmingah Calamaria garoensis (Garo Hills Reed Snake) an vuah.

Hemi chungchang hi Asian scientific journal, Taprobanica Vol.15 Issue No.1 chuan April 14, 2026 khan a chhuak.

Rul species thar hmuh chungchangah hian Prof. H.T. Lalremsanga chuan, “Calamaria rulte hi phairuang hnah kuang hmingchawiin Fossorial Reed snake tia vuah an ni a. Asia chhim lamah chauh awmin species 71 hmuhchhuah tawh a ni a. India-ah chuan species pakhat chauh record a la ni a. 

Tuna kan hmuhchhuah thar hi Garo Hills-ah bik chauh hmuh a la ni a, ramhnuai, tlang ram leh ruamah te ruahsur zawhah an bihrukna lei hnuai atangin an lo chhuak a. Hmanni lawka Mizorama hmuhchhuah, Calamaria mizoramensis nen India pum huapin Calamaria rul species pahnih hmuh tawh an ni a. An pahnihah hian DNA inan lohna 6.3% lai a awm a ni,” a ti.