ZALEN August 24, 2026: Haulawng Higher Secondary School chu Special Category -II ah an awm ve loh avangin an lungawi lo a, vawiin aṭangin zirtirtu ten zirtirna pe lovin school an kal.

Haulawng Higher Secondary School hian S-2 hlan kai school tam takte aia Result leh Student Enrollment-a an sang zawk chunga Lumpsum 'A' an la awm bik chu an hrethiam lo va. Sawrkar chuan an school chu zirchianna mumal zawk nen zir chiang se, S-2 ah hlang kai ve ngei se an duh thu an sawi a, vawiin aṭangin tiam chin awm lovin zirtirna pe lovin school an kal.

Haulawng Village Council Vice President C. Lalmuanawma, Higher Secondary School Managing board member chuan, Haulawng Higher Secondary School chu kum 2013 ah mipui tangrualin an din a nih thu sawiin, school mamawh leh Zirtirtute hlawh tur pawh mipui-ah donation khawn thin a, an hahpui rei tawh a, an result leh zirlai neih dante zirchiangin an HSS Dinhmun hi grade tha zawk hi an phu a, S-2 ah tal dah ve se tih chu khawtlang mipui duhdan leh beisei a nih thu a sawi.

Haulawng HSS-ah hian tun dinhmunah an khaw thenawm, Mualthuam N, Zotuitlang, Mausen, Bualpui V, Sekhum leh Ramlaitui atanga te in zirlai 51 an nei mek a. Vawiin hian zirlaite chuan lehkha zir an duh leh chak thu te, an School chu S-2 ah hlangkai ve ngei se an duh thu poster kengin an lantir a ni.