ZALEN, July 10, 2025 : August 20 atanga khelh tan tur, South Asian Football Federation (SAFF) U-17 Women’s Championship 2025-a match offical turin Mizo nula, Lalhruaizeli Khiangte (Nupuii) a kal dawn.

Changlimithang Stadium, Thimphu, Bhutan-a inelna neih turah hian ITI Veng, Aizawl nula, Nupuii hi assistant referee tura ruat zingah telin India atangin ani bakah hian match commissioner leh referee tur pakhat ve ve ruat an ni bawk.

Nupuii hi amah pawh footballer niin Mizoram aiawh pawhin a lo feh chhuak tawh thin a. Asian Football Federation (AFC) referee C Diploma nei a ni a, national referee a ni mek.

Mizoram Football Association (MFA) chuan Ningani khan Thimphu khawpuia inelna tura Nupuii kal tur thu hi an social media-ah an tar lang a. “International competition-a assistant referee ni thei kan nei hi kan chhuang hle a, a duty tha taka hlen turin duhsakna sang ber kan hlan,” an ti.

SAFF U-17 Women’s Championship 2025-ah hian ram pali - Bangladesh, Bhutan, India leh Nepal te an inel dawn a. Vawi hnih theuh an intum kual dawn a, a sang berin nomawi an la dawn a. Inelna hnuhnung ber kha U-16-a kalpui niin Bangladesh an champion.