ZALEN December 16, 2025: MNF President Zoramthanga chuan vawiin khan Mizo Hnam Run Lunglei-ah Exodus Day vawi 54-na leh kum 2025 Hnam Run khar puala inkhawm a hmanpui a, Mizoram State University Lunglei-a dah tum te, Saiip puan sin leh Seki-a zu in leh an party chungchangte a sawi.

Lunglei-a Mizoram University dah chungchang sawiin, "Mizoram Legislative Assembly-in a pass reng reng tidanglam tur chuan House bawkin a pass leh a ngai. House in dan a siam tawh hi kamthuah paha thiah ngawt theih a ni lo. Education Minister-in 'Cabinet-in kan Pu sawi kha kan passed a ni,' a tih kha thenawm state-in an hria ang tih a hlauhawm, min nuihzat ngawt ang," a ti. 

"Mahni luak hnu ei leh tur hian MLA 40 rual te hi Pu Duha hian a phar tir thei ang em?" tiin, Mipui mithmuha Saiip puan sin a, a hnu lawka Zu zawrh phalhna pass leh a, Seki-a Zû in leh mai thei nih chu a that loh thu a sawi.

Pathian hruaina in Dampa bial bye-Election ah MNF a chak thu sawiin, Kum thar 2026 ah AMC Inthlanah MNF party chuan sawrkarna kan chan leh ngei a beisei thu a sawi.

Zoramthanga chuan, "Khawchhak atangin kan Pi leh Pu-te lo chhukin, an ram zawn Mizoram Lalpa'n a pek lo thlengin an tawp a, kum 20 chhung hnam Thuthlung humhim turin Independent sualin, Nationalism-ah thisen in min Baptist a ni. Party dang lian tak tak an ral zel hunah pawh bul tan leh thei turin Pathianin Exodus Day hmangin min hum a, min damkhawchhuahtir chhan chu, 'Pathian leh kan ram tan' tia kum 64 hmu ta MNF party te hi Chanchintha hril tura a hnam thlan a nih vang a ni," a ti

Missionary Nuai khat thawn chhuak tura hmathlir a lo sawi tawh chung chang sawi langin, Kohhran lian ber Presbyterian Kohhran chuan Nuai thum leh singkua vel zet an thawnchhuak tawh. Kohhran dang nen chuan Nuai nga Chuang an nih a rin tawh thu a sawi. Population thirin khawvelah USA khumin Mizoram chu khawvelah missionary tirchhuak hnem ber a nih thu a sawi.