ZALEN August 24, 2025 : Mizoram Legislative Assembly inthlanpui hnuhnung bera Zoram People’s Movement (ZPM) ticket-a a lo din tawhna, Dampa bialah Vanlalsailova’n by-election hmachhawn leh a duh.

  Dampa assembly constituency by-election atan inpuahchahna kalpui tan a ni. He biala by-election neih hun tur puan la ni lo mah se, kumin chhung ngei hian inthlan buatsaih a rinawm. He inthlan lo awm turah Vanlalsailova chuan ZPM ticket-a hmachhawn leh a duh a. Mahse, party lamah an hotute leh Pathian thu thuah a din leh din loh chu a innghat tih Zalen Thalai Khawvel a hrilh.

  Vanlalsailova chuan, “Kan party (ZPM) pawhin by-election chungchang ngaihtuahin an thukhawm tawh a. He by-election lo awm tura ding tur thlan fel a la ni lo va. Tumah an la tiam lo bawk. Kei pawh he by-election lo awm turah hian chuh thei zingah ka awm a ni ve mai a. Party aiawha ding tur chu kan hotute leh pathianin an rawn rel mai turah ka ngai. Engkim hi pathian kutah ka nghat e,” a ti.

  Dampa bial by-election lo awm tur atana lo inpuahchah a, tih theih chin leh hmalak ve theih dan kawngte awm mah se, party phal chin baka thil tih a duh loh thu sawiin Vanlalsailova chuan, “He lama kan tih theih chinah chuan hma chu kan la ve reng mai. Mahse, hma han lak vak pawh a la rem lo. Chumi bak chu party phal chin baka thil tih ka duh lo,” a ti bawk.

  Party hotuten Dampa bial by-election-a ding tura an thlang a nih chuan a pawm tur thu sawiin Vanlalsailova chuan, “Candidate tura min ruat a nih chuan ka tlan chhe lo vang. Kum 2028 MLA inthlan turah pawh din tuma la awm ve ngar ngar ka ni. Mahse, duh aia hmain inthlan a lo ngai ta thut si. Kan party hotuten ding tura min ruat a nih chuan ka ding mai turah ka ngai. Tlanchhiat ka tum lem lo. Inthlan hmasa ang tho ka nih ka ring a, lo ding ta pawh ni ila, a hma aiin ka khingpui hnehna hi a san ka ring,” tiin by-election lo awm turah party candidate atana ruat a nih chuan a hnial loh tur thu leh a inrintawk thu Zalen Thalai Khawvel a hrilh.

  Dampa bialtu MLA thi ta, Lalrintluanga Sailo chungchang sawi kaiin Vanlalsailova chuan, “Kan bialtu MLA hi Dampa bialtu MLA kan neih zingah a ni tluka kan bial min hmangaiha hmasawnna lo hui lut hnemtu hi a bial mipui ngaihdan la ila, ani tluk hi an awm loh thu chu a tam zawkin an sawi ka ring. Hetiang mi, mahni bial hmangaihtu kan chân hi a pawi kan ti. A boral tak avanga by-election a lo tul leh hnu hian, tu pawh lo tling se a thlaktu tan huphurhawm khawpa hna thawk tha a ni. Pa taima leh hna thiam, assembly house chhungah pawh huhang nei lian a ni.

  “Dampa bial hi thawm na lo tak a ni chungin, bialtu avang hian bial hriat hlawh leh bial hmasawn tak kan ni. Pu Lalrintluanga Sailo hian MLA ni tura thil tul zawng zawng a nei zo vek a, lehkhathiam lamah chuan lo sang viau lo nia sawi thin ni mah se, kei chuan a hnathawh ka en hian, Mizoramah lehkhathiam aiin a ngaihna hria leh mi chak kan mamawh tawh niin ka hria,” a ti.

  Ram hruaitu fawng chelh tura Mizoramin a mamawh nia a hriat sawi kaiin, ‘Hmeltha’ hitmaker chuan, “Lehkha thiam kan ngah lutuka kan buai tawh. Mi thiam aiin ram hmangaihtu tak tak kan mamawh a. Thinlung tak taka hmangaihtu, hnathawk tura ram tan mahni pawh inphatsana, ram tana innghat hi kan mamawh. Pu Rintluanga pawh chutiang mi a ni, a thi hi ramin kan sunin ka hria,” a ti bawk.