Aizawl; Nimin chhun khan hun hnuhnung a thil lo thleng tur entirna hmangin Samlukhai khua ah a nung chungin an in vui a, mahse reilote hnuah lakchhuah lehnghal a ni. Samlukhai YMA President Lalramthara hnen atanga thudawn danin Zarzoliani,Gospel Trumpet Team Speaker a hmangin an khua ah hian gospel camping chhawng hnih neih a ni a, khawtlang pawh an hlim hle a. Camp chhuak zinga mihlim pakhatin 'hun hnuhnung ah harsatna thuah hnih a lo thleng dawn a, mihringte invui tur kan awm dawn loh bakah kan invui seng dawn lo a ni' tiin a taka invui dan entir an tum a. Samlukhai VCP HL Rokima in kawtah thlan laiin mi pakhat chu a nung chunga phum a, a thawkna tur pipe vuahsakin darkar 3 hnu velah lak chhuah a, a thil tawn te sawi tir an tum a. Mahse an inbuatsaih laiin Police te an lo thleng a, an thiltih tum chu dan phalloh a ni tih an hrilh a. Pungkhawmte pawhin an thiltih tum chu ti danglamin phum tura inpe Lalrinawma (20) chu thlan khurah chuan puandum nen mut tirin thingphek an phah a, a taksa tlem azawng chauh lei vurin hemi hnu hian an lachhuak leh ta a ni. Nimin invuina hunah hian mi 100 vel pungkhawmin VCP inah hian an zaikhawm a ni