Aizawl: Phai atanga sangha lokal ah mihring tana hlauhawm thil a awm nia sawi a awm avang leh mipui an chiai avangin Health Department chuan enfiah turin an buaipui mek. Health Department thawktute hnen atanga Zalen thudawn danin sangha vawn thatna leh sawngbawlna atan hian damdawi chi khat 'Formalin (Formaldehyde)' telh anih leh nihloh enfiahna department in a neihloh avangin test a buaithlak a, mahse mipui an chiai deuh avangin Zirtawpni khan sangha thenkhat chu a sample la in dan phal bak a sawngbawl a nih leh nih loh RIPANS ah an enfiah dawn tih an sawi. Zalen zawhna chhangin Joint Director (FDA) Lalsawma Pachuau chuan RIPANS a enfiah tur hian phai lam sangha chauh a sample an la tih a sawi a. Mizoram chhunga mi chu tlailamah manin zingah zawrh leh thin an ni a, hei vang hian damdawi hi an pawlh an ring lo tih sawiin phai lam sangha te erawh chance awm palh thei anih avangin an enfiah niin a sawi. Lalsawma Pachuau chuan Formalin chu sangha khawina hmunah sangha ti pan thei natna hrik vennan dil tuiah an telh thin nia sawiin mipuite chu chiai lo turin a ngen tih a sawi bawk.