ZALEN October 27, 2025 : ZPM chuan vawiin khan an Party Office-ah chhung inkhawm an hmang a. Thusawitu Agriculture & Farmers Welfare Minister PC Vanlalruata chuan ZPM ten an au hla ber thlai thar lei chu a takin an kalpui mek a, tun hnaiah sawhthing lei leh hralh chungchangah thil fel hlel a awm tih hriain sawrkar chuan a chhui chiang mek a, pawn lamah pawh mi thahnemngaiten tih tak zetin min lo veipui a, a lawmawm hle a ni, a ti. 

PC Vanlalruata chuan, "Kan Chief Minister ni mek Pu Lalduhoma hian hman atang tawhin kuthnathawktute hmakhua a ngaiin a vei em em a, a tlangau hla ber pawh budget-a thlai thar leina dah leh crop insurance kalpui a ni a; tunah hian State Level Coordination Committee on Crop Insurance kan din tawh a, tender te kan chhuah a, chutah chuan TATA AIG General Insurance Company Ltd. hi kan thlang fel tawh a, Mizoramah Crop Insurance kan kalpui thei dawn ta a ni.

"Kuminah sawhthing rate a chhe em em a, Kg 1 Rs 50-a hralh kha a huphurhawm hle a ni. Amaherawhchu, kan au hla a nih avangin tihhlawhtlin ngei tha kan ti a, kan Chief Minister hovin meeting kan nei a, kan intiam ang ngeiin tihhlawhtlin tha kan ti a, kuthnathawktuten an thawh rim rah an seng mek a, an lawm em em a ni,” a ti.

Vanlalruata chuan, “FCAA hi House-ah ngun takin member-ten kan sawi ho a, țha tiin House chuan a pass a ni. Kan ram hmasawn kan duh a, chutah chuan forest clearance hi kan mu tan lian tak mai a ni. FCAA hi Central-a sawrkar mek NDA siam a ni a, chutih laia NDA thawhpuitu MNF ten an lo do ve chiam mai hi a mawi ber lo a ni. Mipuite tana harsatna thlen zawng leh mi eizawnna tibuai zawnga total bandh huaihawt an tum te hi kalphung hlui zia a ni a, khawpui kaihhnawiha eizawnna nasa takin a nghawng dawn a, sumdawnna hrang hrang - restaurant, transport, hotel, financial services, professional services, construction leh mining leh a dangte hi nasa takin a nghawng dawn a ni." 

"Mi thiamte chhut danin ni khat total bandh kan huaihawt hian cheng nuai sang hnih chuang kan hloh dawn a, a uiawm em em a ni. Chu vangin, total bandh huaihawt tum mektute pawh inngaihtuah tha leh se, an duh lohna chu chanchinbu leh social media-ah an tar lang hnem tawk tawh a, mipuite tana harsatna thlen zawng leh mi eizawnna nghawng zawnga sawrkar do hi ngaihtuah tha leh turin ka ngen duh a ni,” a ti.