ZALEN February 8, 2026: Thawhtanni hian Mizoram Agriculture Marketing Board (MAMB) chu an chairman, Agriculture Minister PC Vanlalruata hovin an thukhawm dawn a, sawhthing leina man chungchang an sawiho dawn.

Mizoram sawrkar chuan February 2, 2026 atang khan sawhthing lei tan turin ruahmanna a siam a. A man, reserve price atan hian kg khat Rs. 40 atanga Rs. 45 ni turin an ruahman a; mahse, a man a bithliah hi a sang nia hriain a lei tumte chuan an lei ngam lo a, hei vang hian hralh a ni hrih lo a ni.

ZALEN-in MAMB hotute a biaknaah sawhthing man bithliah (reserve price) sawrkarin a siam chu a nghet bur lo niin an sawi a. “Sawhthing rate hi kar khat chhung atan zel siam a ni a, tuna rate siam pawh hi February 2-7, 2026 chhung atan a ni a. Rate hi kan ennawn fo dawn a, kuthnathawktuten rate tha zawka an an hralh theihna atana ruahmanna hi siam a ni,” an ti a. Reserve price chu kuthnathawktute tan a ni tih sawi bawkin, “Sumdawngten duh duha rate an control hi kan phal lo a , a hlu thei ang bera kan sawhthing hi siam kan tum a ni,” an ti bawk.

Thudawn danin sawhthing hi West Bengal-a an hralhna hmunpui Siliguri-ah chuan a leitu mandi-ten kg khat Rs. 58-in an lei a, Assam-ah pawh kg khat Rs. 50-in an lei mek.