ZALEN May 5, 2026: Zan hnih riaka New Delhi-a zin Chief Minister Lalduhoma chuan vawiin khan Aizawl a lo thleng a. Chief Minister's Office-a Officer ten Vanlaldina Fanai, Commissioner & Secretary to CM hovin a Bangla-ah an lo hmuak. Chief Minister-in sawrkar laipuia Mizoram mamawh a thlen te hi pawmsak deuh vek a nih thu sawrkar thuchhuak chuan a tarlang.

Chief Minister hian Kiren Rijiju, Minister of Parliamentary Affairs leh Minister of Minority Affairs a kawm a, PMJVK hnuaia Mizoram sawrkar projects ngaihpawimawh 23 te a thehlut a. Union Minister hian a vaiin a lo pawm a ni.

Dr. VK Paul, NITI Aaayog Member kal chhuak tur pawh a kawm a. Mizoram tana thahnemngai taka hma a lak thin avanga lawmthu hrilhin, Ginger Capital of India a Mizoram an puan avanga Mizoram sawhthingin ram pum huap hriat a hlawh chhoh mek thu a hrilh. Mizoram sawrkar leh NITI Aayog tang dunin Tourism Conclave an buatsaih tur chungchang leh Mizoram tana thil pawimawh dangte a sawipui a.

Inkawmnaah hian Tourism Minister Lalnghinglova Hmar telin Niti Aayog leh Mizoram sawrkarin Tourism Conclave an buatsaih dun tur chungchanga hmalakna hi an thlir a. May thla chawhnu lamah Delhi-ah pre-conclave meeting neih an rel a ni.

Niti Aayog lam hian Mizoram tourism policy changtlung zawk duan dan tur te, Mizoram puala Institute of Hotel Management-Ashok (IHM-A) hnuaia a thlawna training neih theih dante leh investor koh luh chungchangte Chief Minister leh Tourism Minister hi an sawipui bawk.

Nizan khan Nitin Gadkari, Union Minister of Road Transport & Highways pawh kawmin Mizorama National Highways leh Lei (Bridges) pawimawhte tihhmasawnna tur chi hrang hrang a sawipui a. A thil thlen zawng zawng hi MoRTH hian a lo pawmsak deuh vek niin sawrkar thuchhuak chuan a tarlang.