ZALEN January 18, 2026: District Council & Minority Affairs Minister C.Lalsawivunga chuan, “Kan sawrkar tan tirh, kum 2024 khan autonomous district council (ADC)-ten direct funding an hmuh theihna tur leh anti-defection law a awm theihna turin rawtna (recommentdation) kan thlen tawh a ni,” a ti.

ZALEN zawhna chhangin DC&MA minister chuan autonomous district council-a MDC-te an insawn fo thin leh sawrkar mumal loa awm fo thin chu tha lo an tih vangin sawrkarna an siam tirh khan 125 Constitution siam that rawtna chu an thlen tawh tih a sawi a. Autonomous district council-ah eng sawrkar pawh ding se sawrkar nghet nise tih chu an duhthusam ber a ni tih a sawi bawk.

Lai Autonomous District Council-a ZPM leh MNF intawm sawrkar din tuma hma an lak mek laia harsatna thleng ta chu pawi a tih thu sawiin, “Tluang taka sawrkar din tura kan inbeisei laia kan thawhhona atanga MNF an inhnukdawk hi a ngaihna kan hrethiam lo hle a. Sawrkar mumal lo hi mipuiten an tuar a; chuvangin, sawrkar nghet ding thei se kan duh hle,” a ti.

Party dang MDC thlem an duh lo tih sawi bawkin, “Thlem duh ila chuan kan thlem theih kan ring a; mahse, a tha lo tih kan hriat vangin kan ti lo a ni,” a ti a. Sawrkar mumal loh vangin Lai Autonomous District Council chuan Rs. nuai 6,000 chuang an ba tawh niin a sawi bawk.

Chakma Autonomous District Council chungchang zawhna pawh chhangin Minister C.Lalsawivunga chuan, “Sawrkar a tluk tirh, June 16, 2025 khan Lakhan Chakma chuan MDC 16 neiin sawrkar a siam theih thu a thlen a; mahse, governor chuan sawrkar mumal a awm thei lo tiin July 7, 2025 khan thla ruk chhung atan Governor Rule-ah a dah a. Governor Rule a tawp hnu, January 6, 2026 khan sawrkar a siam theih thu governor hnenah a thlen leh a, hetah pawh hian member 16 tho a la nei a ni,” a ti.

CADC-ah sawrkar ngelnghet din theih a ni tawh nia a hriat thu sawiin, “Thla ruk liam hnuah pawh party ngai, hruaitu ngai leh member inzat thovin sawrkar din leh an tum a; chuvangin, sawrkarna pek tlakah kan ngai a ni,” a ti bawk.