ZALEN Nov. 10, 2025 : General Administration Department (GAD) chuan thuchhuah siamin, Assam Rifles Biak In hmun sawrkarin kohhran chhuhsak tuma puhna chu thu belhchian dawl lo a ni, a ti.

PRESS NOTE

Tun hnaiah Assam Rifles Biak In hmun chu Sawrkarin Kohhran chhuhsak tuma puhna Media ah a lo lang a. Hei hi thu belhchian dawl lo a ni a.

Thil awmdan chu hetiang zawk hi a ni e:

1. Kum 2002 daih tawhah khan, khatih laia Sawrkar khan Assam Rifles ram chhuahsan a nih hnua a hman dan tur – The Mizoram (Restriction on Use of Transferred Land) Act, 2002 chu a lo pass tawh a. AR ten an ram an lo chhuahsan tak avangin he Dan, Section 6-na hnuaiah, AR chhuahsan ram hman dan reltu tur Advisory Committee chu Sawrkarin a din ta a.

2. Sawrkar chuan ama thua thuthlukna siam mai chu tha a tih loh avangin, mipui huap kim thei ang ber turin he Advisory Committee hi a din a. Recognized Political party zawng zawng aiawh te, NGO hrang hrang sawmlehpakhat aiawhte leh Department hrang hrang aiawhte telin, Chief Minister chu Chairman a ni. He Committee hi thuneitu sang ber leh thutawp siamtu a ni.

3. Ni 19.05.2025-a Advisory Committee meeting chuan, AR chhuahsan ram chhunga pass nei zawng zawngte chu vantlang tana an ram thehchhuak turin ngen ni se a ti a. Mi engemaw zatin phal takin an ramte chu an rawn hlan tawh nghe nghe a ni.

4. AR Biak In hmun pawh vantlang tana rawn hlan ve turin Mizoram Presbyterian Church chu ngen ve ni se tih a ni a. Synod hotute dawr turin Advisory Committee aiawh mi 3 (Pathum) ruat nghal an ni.

Advisory Committee-in ngenna a siam chhante chu hengte hi an ni:-

i) Section 5 of the Mizoram (Restriction on Use of Transferred Land) Act, 2002 in AR chhuahsan ram chu vantlang tan chauha hman a phal avang leh mimal emaw Pawl emaw tumah pek a phal loh avangin.

ii) Assam Gazette Notification dated 08.08.1952 ah Biak In hmun hi AR ram chhunga rin luh a nih avangin.

iii) Mizoram Sawrkar leh AR te ram inhlanna MoU- ah Biak In hmun hi AR in Mizoram Sawrkar kuta a hlan tel avangin.

iv) Mizoram Gorkha Mandir Sanchalan Samiti, Bazar Area ten Prime Minister hnenah Assam Rifles Hari Mandir chu neih zui an dil avangin, Biakin hmun Kohhran hnena pek a nih chuan

an tan tanfung tha tak a nih theih dawn avangin.

5. Advisory Committee aiawhte chuan ni 30.05.2025 ah Kohhran hruaitute chu an dawr a. Ni 02.07.2025- ah Mizoram Presbyterian Church chuan rem an tih loh thu dawn a ni.

6. Ni 24.07.2025-a Advisory Committee meeting-ah Central YMA ten PIL WP(C) No 31 of 2020 thubuai Court-a an thehluh zingah Biak In hmun pawh a tel thu dawn a ni a. A tu ve ve tan pawh Court thu lo nghah rih phawt mai loh chu tih theih a awm lo nia ngaih a ni. Court thu nghah phawt mai a tul thu chu ni 01.09.2025 ah ziakin Kohhran hruaitute hriattir an ni.

7. Ni 23.10.2025 ah Mizoram Presbyterian Church chuan Biak In hmun chu thubuai zinga a tel loh thu Sawrkarah ziakin an thlen leh a. Hemi hnu hian Advisory Committee hian meeting a la nei leh rih lo va. Meeting leh huna Agenda atan dah a ni. Chuvangin thuthlukna siam a la ni lo.

8 Advisory Committee hi NGO leh Political Party hrang hrang aiawh te pawh an tel ve vekna a nih avangin, he thil hi politics inbeih nana hmang lo turin mi tinte kan in ngen e.

Sd/- IRENE ZOHLIMPUII CHONGTHU

Addl. Secretary to the Govt. of Mizoram

Memo. No-.D-11013/7/2025-GAD Aizawl, the 8th November, 2025