ZALEN January 13, 2026: Chief Minister Lalduhoma chuan vawiin khan Sairang Horticulture Centre-a Mizoram Agricultural Marketing Board-in Bana kaih (Handholding) Scheme hnuaia a din, Ginger Processing Unit chu a hawng. CM chuan Sawhthing ang bawkin Sapthei pawh larpui thama ngah tum a nih thu a sawi

Chief Minister chuan, "Kum tam tak chhung kan lo vei tawhte a takin a chang chho mek a, a lawmawm hle mai. He processing unit dinna kawnga mawhphurtu MAMB leh Horticulture department chungah lawmthu ka sawi a ni."

"UT kan nih a chin kum 54 vel a lo ni tawh a, loneia eizawng tamna ram ni chungin eng thlai mah hi kan la hmingthanpui ngai lo. Tunah chuan Mizoram chu Ginger Capital of India tia hriat kan ni chho tan ta a. Kan loneitute thawh rah zarah kan hmingthang chho mek a ni. Sapthei pawh hi nasa taka kalpui a thain kan hria a, larpui thama ngah kan tum leh dawn a ni," a ti.

Sawhthing vangin chhungkaw tam takin sum leh pai tam tak an lalut tiin, "Mipuiten pawisa an neih avangin sumdawngte tan a lo hlawk a, kohhran thawhlawm chenin a pung a. Tin, a thlawna sem kan ti tawp a, moral reformation a thleng mek a, kan thawhrim rah ngei kan tel mek hi a hlu a ni," a ti.

Sawhthing lei hun tur sawiin, "Thlaleh February ni 2 atangin kan lei tan leh dawn a. Mizo kutchhuak, a zailepna khawl leh a tihrona khawl eng emaw zat hi collection centre-a dah a, an lo hman theiha chhawpsak kan rilruk mek. Chu chuan sawhthing process-na kawngah min pui nasa hlein kan ring."

"Vawiina kan hawn hi kan sawrkara a process-na hmasa ber a ni a, a hmunhma hian a dawl zawh avangin tihlen a thain ka ring a. A tul angin tihlen kan tum ang. A pawimawh ber erawh chu a enkawltu tura thlan Good Faith te an ni a, an kutah hian a hlawhtlin leh hlawhtlin loh a innghat thui hle a ni," a ti bawk.