ZALEN September 16, 2026 : Zirlaite hma hun sawihona programme School Connect 2026 kal zelah vawiin khan Govt. Chaltlang Higher Secondary School-ah hun hman a ni a, Mizoram Youth Commission Chairman, Malsawmzuala Ralte chuan he hun hi a hmanpui.

Malsawmzuala Ralte chuan vanneih thil thuin competitive exam inziah tlin a theih loh a, sawrkar hnaa inziak tling tur chuan T-5 tumruhna, taimakna, thawhrimna, tei rei peihna leh time table mumal tak siama zawm tlat a ngai a. Competitive exam sang lutuk avangin T-5 nei lo tan sawrkar hnaa luh a harsat tawh thu sawiin, private, corporate leh mahni sumdawnna hmanga inchawmte pawh sawrkar hnathawk ang chiaha ngaihlu turin a fuih bawk. 

School Connect 2026 hi MYC, Zalen News leh Lynchpinn tangkawpin an huaihawt a ni, September ni 14 atang khan tanin September 18 thleng a awh dawn a ni. Kumin hian state pawn atanga university 10 leh tualchhung Higher Secondary School 10 te chu an sikul-ah tlawh kualin zirlate chu a mal malin career counseling an neihpui an ni .  

State pawn atang hian Sharda University, Hindustan University, Aditya Group of Institutions, Parul University, Ganpat University, Graphic Era University, Dev Bhoomi Uttarakhand University, SRM University, Harsha Group of Institutions leh Global Reach te an tel a. Tualchhung atangin St. Joseph HSS, St. Anthony HSS, Govt. Republic HSS, Home Mission HSS, Govt. Chaltlang HSS, Greenland HSS, Ephraim HSS, Providence HSS, Boston HSS leh Living Water HSS te an tel bawk.

School Connect hi 2019 atangin neih tan niin, hripui lenlaia khaihlak zawk tih loh chu kum tin neih a lo ni tawh thin a ni.