ZALEN June 30, 2026: School naupang Aadhaar enrolment leh update processing fee lak a nih chungchanga Consumer Union, Mizoram ten thuchhuah chu Directorate of School Education, Government of Mizoram chuan an sawifiah a, school naupang kum 5 leh kum 17 inkar tana Aadhaar enrolment leh siamthatna kalpuitu zinga fee lo la te hi chhui mek an nih thu an tarlang.

Directorate of School Education chuan Unique Identification Authority of India (UIDAI) chuan state tinah Aadhaar enrolment hi an kalpui thin a. School Education Department chuan Samagra Shiksha hnuaia BRC leh CRCC staff thenkhat tlawmngaite hmangin Aadhaar Enrolment leh Mandatory Biometric Update (MBU) camp a buatsaih thin a. Hlawh dang nei lova an kal chhuah thin avangin New Enrolment leh update-na atan per head-in UIDAI atangin lak phalna an nei thin a. Enrolment fee hi an ei leh in, vah velna leh lehkha etc. mamawh phuhrukna atan hmangin, Department-ah chhung lut tura phut an ni ngai lo an ti.

UIDAI chuan September 29, 2025 khan Aadhaar enrolment chungchangah naupang kum 5-17 chu kum khat chhung (October 2025 - October 2026) a thlawna Aadhaar enrolment leh update ti turin thu chhuah a siam a, Directorate of School Education chuan a thlawna kalpui tawh tur ani tih October 17, 2025 khan District tinte hnenah hriattirna a lo pe chhuak tawh an ti. District thenkhatah UIDAI thu kalh a naupang enrolment leh update processing fee la an awm ni-a Consumer Union-in thuchhuah an siam a ngai hi School Education Department chuan pawi a ti a, fee lo la rute hi chhui mek a ni, an ti.

Aadhaar Enrolment tih thar leh Update hi tihmakmawh a nih avangin School Education Department chuan kalpui zel a tum a, hemi kawngah hian theihtawpa mi tinte tanpuina leh thawhpuina an ngen bawk a ni.