Aizawl: Central Board of Secondary Education (CBSE) chuan ramchhunga CBSE affiliated school 2077 chu mipui ten awlsam taka an hmuh theih tura an school information website-a dah tura a hriattir angin an tih theih loh avangin Rs 50,000 theuh chawi turin a hriattir. Zalen thudawn danin CBSE hian anmahni affiliate school zawng zawngte chu an school information kimchang mipuite hmuh theih tura dah turin a hriattir a. Hetah hian tui herh hawna awm zat, wifi facility awm leh awm loh, class tin te monthly fee kimchang, admission result, school reserve fund leh balance sheet bakah thil dang tam tak tarlang tura tih an ni. Heng information te hi CBSE website ah school te tan hian online a ziah luh tur a ni a, anmahni school website ah pawh dah tura tih an ni. Thudawn danin Mizoram chhunga CBSE affiliated school thenkhat pawh CBSE-in a phut information an la tarchhuah loh avangin pawisa chawi turin hriattir an ni a. Hemi chungchanga Zalen palai zawhna chhangin Mizoram Institute of Comprehensive Education (MICE) Principal, Lungngailova chuan pawisa chawi tura hriattirna an dawn ve tho thu a sawi a, “CBSE-in fill up tur a tihah hian sorkar school tana fill up theih loh, entir nan society registration number tih te leh thil dang te pawh a awm a, fill up loh chuan a dawt zel a load thei si lo va, sorkar school tan format hran a awm lo em ni tiin ka zawt a, chhanna ka la hmu lo a ni,” a ti. MICE Principal chuan an fill up theih lohho tih lovah chuan harsatna engmah a awm loh thu sawiin CBSE lamin April 30, 2017 thleng hun tiam an neih thu a sawi a, a tul anga hmalak zel an tum thu a sawi bawk. Thudawn danin India ram puma CBSE school te tan hian nikum October 31, 2017 chu information dah kim hun tura tih a ni a, hemi hnu hian school ten harsatna an neih avangin thla khata sawn hlat leh a ni. Tunah hian CBSE affiliated school hi 18,179 a awm mek a ni.