ZALEN September 9, 2026: India rama Bank hnathawk pawl hrang hrang te intelkhawmna United Forum of Bank Union chuan September 11, 2026 Zirtawpni hian All India Strike an kalpui dawn a, hei hian awmzia a neih loh chuan September 28, 29 leh 30-ah te an nuar leh anga hei hian awmzia a neih loh zel chuan October 26, 2026 atangin tiam chin awm lovin Strike neih leh an tum a ni.

United Forum of Bank Union chuan Bank chu kar khata ni nga hawn ni ve tawh turin an rawt a, Sawrkarin khuangrual lo leh inkhairual lo taka Production Linked Incentive (PLI) Scheme a kalpui mek hnuk kira la tihfel lohte tihfel leh scheme siam tha tura union-te nena inbiakna tihhlawhtlin bakah an thil lo phut tawh tihfel mai tura tih la tihfel loh te tihfel sak an phut bawk a ni.

AIBEA, AIBOC, NCBE, AIBOA, BEFI, INBEF leh INBOC te inthunzawmna United Forum of Bank Union chuan India ram pumah strike hi kalpui a nih tur thu thuchhuah an siam a, Mizoram-ah pawh he strike kalpui a ni dawn.