ZALEN, June 29, 2026: All India Football Federation (AIFF) chuan Inrinni khan 2026-27 Indian Super League (ISL) season chu September 4-ah tan a nih tur thu an puang.

AIFF thuchhuah chuan, “September 4, 2026 hi ISL 2026-27 kick-off ni atan ruat a ni a. 2026-27 season atana kum khat calendar pawh pawm a ni,” tiin an tar lang.

AIFF hian National Sports Governance Act (NSGA), 2025 nena inmilin an constitution siam that chu an pawm bawk a. He thutlukna hi Special General Body Meeting (SGBM) virtual-a neih, AIFF Executive Committee member te, member association aiawhte leh FIFA bakah Asian Football Confederation (AFC) hotute telnaah siam a ni.

Thutlukna pawimawh dang an siamte zingah AIFF hnuaia inkhel zawng zawng intan hmain National Anthem, ‘Jana Gana Mana’ leh National Song ‘Vande Mataram’ chu tihrik ziah ni se tih rawtna chu an pawm bawk a ni.

AIFF hian ISL leh Indian Football League (IFL)-a club-te chu starting eleven-ah ram dang player pathum leh Overseas Citizen of India (OCI) player pakhat hman phalsak rawtna chu an pawm a. Hemi bakah hian tual chhung striker-ten khelhna hun tha an hmuh tam theih nan inkhelh chhung zawngin pakhat tal field-ah a awm reng tur a ni tih an rawt bawk a ni.

General Body chuan AIFF Disciplinary Code siam thatnate an pawm a, chung zingah chuan official-ten tawngkam mawi lo an hman vanga chawi tur siam that te, FIFA three-step procedure nena inmil inthliarna dodalna tihchak te, entu mipui awm dan mawi lo laka dan khauh zawk siam leh appeal fee tihdanglam te a tel a ni.

2027-28 season atana competition window (June 1, 2027 atanga May 31, 2028 thleng) chu an pawm bawk a, FIFA Transfer Matching System (TMS) a advance update a nih theih nana player inziah luhna hun (registration windows) pawh an pawm nghal bawk.

Ruahmanna dang an pawmte zingah AIFF academy leh team-te chu kum upa zawk inelna (higher age-group competition)-a tel phalsak te, tournament registration fee Rs 25,000 atanga Rs 15,000-a tihniam te, player endik nan Central Registration System (CRS) leh DigiLocker thlunzawm (linking) te, leh hriattirna dang a awm hma chu Under-18 hmeichhe player-te tana fee ngai lo kalpui chhunzawm zel te a tel a ni.