ZALEN August 3, 2026: Gauhati High Court chuan July ni 31, 2026 (Zirtawpni) khan Sericulture Demonstrator hnalak (recruitment) 2025 chungchanga writ petition wp(c)/123/2025 chu a rel fel a. Sawrkarin he hnalak (recruitment) process pumpui leh appointment a lo pek tawh te chu a ti tawp nghal tih MZP chuan thuchhuah an siamah an tarlang.

He hna lak chungchangah hian Mizo Zirlai Pawl General Headquarters, Aizawl chuan he Sericulture Demonstrator hnalak chungchangah hian mizoram direct recruitment (conduct of examination) guidelines, 2018 bawhchhiatna awm ngei niin a hria a, sawrkar hnenah Inquiry Committee din turin May ni 13, 2025 (Thawhlehni) khan ngenna a lo siam tawh a ni. 

Sawrkarin inquiry committee a din hnuah candidate 35 te kawmin, chung zinga mi 4 chuan exam hall-ah mobile phone an ken luh thu leh exam hall luh dawnah candidate te chu admit card-a tarlan ken phal loh te an keng em tih check mumal an nilo tih hmuhchhuah a ni. Inquiry committee hian paper (i) leh paper (ii) exam that leh a rawt bawk.

Sawrkarin Inquiry report leh Law & Judicial Department legal advice angin he hnalak (recruitment) process hi a cancel a, candidate tling mi 4 te high court-ah an kalin, July 31, 2026(Zirtawpni) khan Gauhati High Court chuan thutlukna a siam a, sawrkar thutlukna chu a pawmpui a, Sericulture Demonstrator hnalak (recruitment) process zawng zawng leh apppoitnment lo pek tawh chu a ti tawp ta a ni, an ti.

Mizo Zirlai Pawl (MZP) chuan Mizo zirlai leh thalai hna zawng mekte inkarah inelna thianghlim leh lang tlang a awm theih nan hma an la chhunzawm zel dawn a ni, an ti bawk.