ZALEN September 19, 2026 : Vawiin dar 12.00 -1.00 inkar vela Sethawn RTP Farm bulah electric current man avanga thi mi 3 - Lalrinawma 18, Rinmawia, Vawngawnzo, Mamit District ; Lalruotfela, Ramsanlean 20, Thingpuikual, Manipur leh Thianhumhim 16, Hrangliandum, Kaikhawl, Burma te chu an khaw lam panpui an ni.

Four Lane laih mekah electric ban (LT Line) sawn tura hnathawk mi 6 vel te chu an ban phun thar tur zâwnin a khur-ah an tung chho tur chu a bula 11KV Line hruipui an tawk palh a, helai 11KV Line hi lineman te bia-in shutdown chu an dil ngei niin hriat a ni. Current hi a lo in off si loh avangin ban zâwntute chu hei vang hian a man zui ta tih hi hriat theih a ni lo. An zinga 3 hi chu na vak lovin first aid pek anni a, midang 3 te erawh District hospital Kolasib an thlen chuan beisei tur an awm ta lo niin thu dawn a ni.

He thu an hriat veleh SYMA hruaitute, SEC memberte leh Disaster committee memberte Casualty lamahan kalkhawm nghal a, heng boralta chhawrtu contractor te hi biak nghal a ni a. Contractor te pawh Aizawl atangin an thleng nghal a. Ruang kaldan turte sawiho niin, police verification, postmortem te tihfel anih hnu in, tlai dar 5.00pm khan Kolasib atangin Aizawl lamah phurh chhoh phawt turin SYMA morque van-in Sub Headquarter President, Pu R.Lalzokima'n tawngtaina in a thlahliam.