ZALEN November 3, 2025 BJP Mizoram chuan vawiin khan Karthar inhlanna leh Political Session hun neih neih a ni a, thusawitu BJP Mizoram State President Dr. K. Beichhua, MLA chuan Siaha district tana Union Finance Minister-in a pawmsak tawh Crore 75 Crore state sawrkar hnenah ziak ngeia a thlensak chu ngai pawimawh duh lova ZPM Sawrkarin a chhuhsak vek niin a sawi.

BJP Mizoram State President Dr. K Beichhua, MLA chuan, "Dampa bial By-Election kan hmachhawn mekah hian Final Round kan lo thleng ta a, tun kar chhung hian Dampa bial tana BJP-in hmalak kan tum dan la hre ve lo tam tak te hnenah, Dampa bial tana kan tih tur te hrilh hriatna hun Union Minister George Kurian hoin kan nei leh dawn a, Union Minister Pu Kiren Rijiju leh Dr. Jitendra Singh te meuhvin kan mamawh Link Road te, Reiek to Lengpui inkalpawhna tur te khaw hrang hrangina an hnena an thlente chu Pu Lalhmingthanga an Vote tlin hnuah anmahni ngeiin a tih hlawhtlin nan kan khawtuala an rawn kal tur thu an sawi te kha, vawiinah hian Dampa bial mipuite hnenah duhsak tak chungin kan hrilh nawn leh che u a ni," a ti.

Beichhua chuan, "ZPM Sawrkarin kan sawrkar hunah keini chuan 'Restricted Tender' kan ti ve dawn lo tia an intiamna chu vawiin ah chuan dawt a nih zia a lang chiang leh ta a, sawiloh anga awm thin sawrkar kan hrawn leh mek a ni. 'Special Assistance to States for Capital Investment' SASCI sum aṭanga Siaha tana hmasawnna hna thawhna tur, State Sawrkar sum hmuh Rs. 328 Crore atang Siaha district tana sum min pek tur, Union Finance Minister ngeiin min pawmsak tawh Rs. 75 Crore chu state sawrkar hnenah ziak ngeia min thlensak pawh ngai pawimawh duh lova ZPM sawrkarin min chhuhsak vek mai hi a mak hle a, Union Minister thu meuh zawm duh lova an awm hi, eng nge a chhan? tih hi ZPM sawrkar ka zawt a ni," a ti.

Beichhua chuan sawi chhunzawmin, "Vawiin ah hian Central lam hian state sawrkar hmalak dan hi an hriat mai bakah, keini pawhin state sawrkar hmalak duh dan hi Central Leader-te hnenah ziak leh phone hmang pawhin kan thlen nghal dawn a ni. Chuvangin hetiang rilru state sawrkarin a put takah chuan keini Mizoram tana thil ṭha duh leh Mizoram hmangaihtu tan chuan kalphung thar kal dan hi kan hrethiam tawh lova, engkim mai hi kan Politicise dawn a nih chuan kan hmabak hi a êng vak bik hian ka ring lo a ni," a ti bawk.