Aizawl: Middle school zirlaibu lei tur la awm lo te chu vawiin emaw naktuk hian Mizoram an rawn thlen beisei a ni a, he chanchin buatsaih lai hian kawng lakah an thang mek. Zirlaibu lei tur awm loh chungchangah hian SCERT thawktute chuan zirlaibu chhut tur chu an peih hma chungin ruahsur leh eng emaw harsatna neuh neuh a awm avangin a hun taka peih a ni lo chu hrehawm an tih thu Zalen an hrilh a. Tunah hian zirlaibu 7 (Class VI zirlai 1, class VII & VIII zirlai 3 ve ve a la kim lo tih an sawi bawk a. School luh tirh ni-a neih kim thlap thlap chu a harsa nia sawiin theihtawp an chhuah reng niin an sawi bawk. Printing & Stationery Department hotute chuan zirlaibu la kim lote hi truck in rawn phurin kawng lakah an thang mek tih Zalen an hrilh a, vawiin emaw, naktukah emaw chuan a lo thlen kim theih an beisei niin an sawi. Text book chu thil uluk ngai anih avangin Press lama an peih hnuah tum hnih tum thum te proof reading ti tura Mizoramah rawn thawn a ngaih thin avangin duh angin a hmanhmawh theihloh niin an sawi bawk a. Tuna zirlaibu an chhut chu NCERT-in a size leh a man pawh a bithliah sa vek a ni a, a chhut man a tlawm avangin Mizoram a Press neituten an chhu duh lo va, chu chuan harsatna a siam tih an sawi bawk. Zalen zawhna chhangin Mizoram Press Owners Association hruaitute chuan zirlaibu chu a phek tam leh tlem pawh Rs. 45 atanga Rs. 55 inkara chhut vek a ngaih vangin an tan tihngaihna a awm lo tih an sawi a. MBSE in zirlaibu a buatsaih lai chuan a man tlawm deuh mah se black & white a ni a, tuna zirlaibu chu colour-a chhut a ngaih avangin chawi belh tur chuan an chhu thei lo niin an sawi.