ZALEN April 17, 2026: Dr. Vanlathlanga, Commissioner SEC chuan AMC inthlan ni April 21-a lo awm tur meeting-ah silent period sawifiahin party-te chu vote thlak hma campaign hun tawp tawh darkar 48 'silent period' zah turin a chah a. "Campaign chhungin theihtawpin thil chi hrang hrangin voter te party lamin an vawm tawh a. Hei vang hian silent period hi chu campaign inkhapna lam niloin voter-te ngun tak leh rilru fima an inngaihtuah theihna hun tur a ni a. Campaign lui chuan voter chanvo an zah lo tihna a ni zawk a ni," tiin a sawi.

He thu hi vawiin 17.3.2026 chawhma 11:30 khan Dr. H. Lalthlangliana, Commisioner, State Election Commission pisaah a hoin AMC inthlan lo awm tur thlirhona neih naah Dr Thlanga chuan hei hi a sawichhuak a. He meeting-ah hian MPF General Headquarters OB leh Political party te an tel a ni.

Commissioner chuan vote thlakna hmunah phone ken luh khap anih thu a sawi a. Hei bakah hian inkhapna awm chiah lo mah se, social media a tawngkam mawi lo hman emaw, thu dik chiah lo, a hnu lawka eng vak lo ni leh si lo mipui ngaihdan hruai kawi thei ang chite chu ti lo turin party lamte a ngen bawk a.

Dr. Thlanga chuan, "Complaint pawh mi sawi tih mai mai te a awm thei a, ziak a nih loh chuan kan pawm thei lo a. Tunlai phei chu AI tih te a awm tawh a, thlalak pawh pawm thiam a har tawh a, kan fimkhur tawh a ni," tiin meeting-ah hian a sawi bawk.

Home voting vote thlak zawh tawh niin vote thlak dil zat 2768 niin mi 2594 in an thlak a. Vote thlak loh chuan kha thlak duh lo leh thi tawh an ni tlangpui a. Complain a awm loh thu report a ni bawk.

Police lam chuan security chungchangah report pein, "Polling station 257 awmin, Auxiliary polling 59 a awm bawk a, election flying squad team y an duty reng a. Aizawl chu zone 4-ah thenin DSP rank in an vil a. Boruak a muanawma, police lam tih that ai mahin mipui fel vang a ni mah zawk a, party-te campaign pawhin police lam a ti hahdam a ni," a ti. Aizawl SP charge latu Rex Zarzoliana, MPS chuan report a pe bawk a ni.