ZALEN April 20, 2026 : Sakawrhmuituai tlanga skywalk leh Chaltlang leh Durtlang inkar ropeway siam chungchang thubuai chu chhui zawh a nih hnuah tun hnai khan, ACB Chargesheet No 2/2026 dt 10.03.2026 chu Special Judge (Prevention of Corruption Act) Court, Aizawl-ah thehluh a ni.

ACB chuan he thubuai hi January, 2022 khan an chhui tan a, he thil tih chingpennaa inrawlh (Accused) zingah hian Ex-Minister John Rotluangliana, MLA Robert Romawia Royte leh Congress MLA hlui pakhat hming a lang nia hriat a ni. 

MNF party-a Vigilance department leh Legal Board chuan skywalk leh ropeway siamnaah thil dik lo a awm nia ngaiin November 22, 2021 khan Loyayukta-ah complaint an thehlut, December 7, 2021 khan Mizoram sawrkara Vigilance chuan December 17, 2021 khan chhui phalna a tichhuak a, ACB chuan December 22, 2021 khan phalna hi an dawng a, January, 2022 khan an chhui tan a ni.

Tourism department pawhin skywalk leh ropeway chungchangah hi February 3, 2022 khan Lokayukta-ah an thlen ve bawk a. Department hi chuan mi mal/company rinhlelh tar lan an nei lo thung.