ZALEN September 20, 2026: Mizoram State AIDS Control Society in State Level Red Ribbon School Quiz Competition a buatsaihah school 300 chuang tel zingah Loroto Play School, Lunglei chu pakhatna an ni.

State Level Red Ribbon School Quiz Competition-ah hian District 11 aiawh te telin, District AIDS Prevention and Control Committee DAPCC te kaltlanga buatsaih District Level Quiz Competition-a pakhatna theuhte an tel a. Quiz competition hi Mizorama darh mek HIV chungchang in zirtirna tur atana MSACS-in a buatsaih a ni a, HIV darh zel tur venna atana awareness pawimawh tak a ni. Zirtawp zan khan district hrang hranga tithate hian Ignite Studio, Khatla-ah inelna an nei leh a. 

Intihsiakah hian Loroto Play School, Lunglei chu pakhatna an ni a, Ryusa Elementary School, Siaha chu pahnihna niin, BC Lalthlamuana English Academy Champhai chu pathumna niin, Presbyterian English School, Hnahthial chu palina an ni. Pakhatna Loroto Play School, Lunglei te hi National AIDS Control Organisation buatsaih Regional Level Quiz Competition, Shillong Meghalaya-a neih turah Mizoram aiawhin an tel dawn a ni.  

State Level Quiz Competition kharna inkhawm ah hian MSACS Project Director Dr. Jane Rinsangi Ralte chu khuallian niin, Quiz competition-a school 300 chuang lo tel zawng zawngte chungah lawmthu a sawi a. Quiz hlawhtling taka neih a nih theihna tura theihtawp chhuahpuitu District AIDS Prevention and Control Committee DAPCC te chungah lawmthu a sawi bawk.