ZALEN, October 29, 2025: Jacob Malsawmsanga’n first half-ah goal li leh chawlh lawk hnuah goal nga thun belhin Sub Junior Boys’ National Football Championship 2025-26 khelh mekah Mizoramin Bihar chu 11-2-in an sawp leh.

Punjab-in a thlen inelnaah hian Nilaini chawhma khan Sri Guru Hargobin Sahib Football Stadium-ah Tier 1 Group A inkhel vawi hnihnaah inkhelh hmasaka 13-0-a Odisha sawp tawh Mizo naupangten a tirah goal chhuah nghal mah se an chhang let na hle.

Inkhel tan chiahah Chirag Raj-a chuan Bihar goal hmahruai a thun a; mahse, Jacob-a chuan minute kuanaah a goal hmasa berin a chhang let a. Minute 19 leh 30-ah thun belh zuiin hattrick a siam der a. Chawlhlawk hma chiahah thun belh leh bawkin a goal pali hmangin Mizoram hian chawlhah 4-1-in hma an hruai.

Second half-ah goal thun belh mai lo mah se minute 72-ah Jacob-a bawk inlan lehin 74-ah a thun belh zui nghal.

Vikash Kumar Kora-a’n Bihar tan si khat sutin 6-2 ni ve mah se Lalnunhlua’n minute 79-ah Mizoram goal sarihna a thun belh leh a. Jacob-a’n la duhtawk lovin minute 81 leh 89-ah a thun belh leh.

Minute 89-ah Odisha laka hattrick lo siam tawh, Bernard Lalchhanhima’n Mizoram goal 10-na thunin minute 90+1-ah Jacob-a bawkin hnu a khar zui leh a ni.

Jacob-a hian tun inelnaah vawi hnih inlanah goal 12 zet a thun ta a, Thawhtanni tlaia Odisha an hmachhawn tum khan hattrick a lo siam tawh bawk a ni.

Sub Junior Boys’ National Football Championship 2025-26 Tier 1-ah hian group pali awmin team li zel an awm a. Mizoram hian Group A-ah Odisha leh Bihar bakah Manipur an awmpui a, Manipur hi inkhel vawi hnihah chak ve ve tawh bawkin Mizoram nen point ruk ve ve hmuin hma an hruai dun a, Zirtawpniah inhmachhawn zuiin semifinal luh an inchuh dawn.

Group khata awmte hi an inkhelh kual hnuah group tina a sang ber theuh chauh semifinal an luh theih dawn avangin inkhel hnuhnung ber hi a pawimawh hle a. Mizoram hian goal difference 22 neiin Manipur hian 16 an nei a, an inhnehtawk chuan an tlang thei dawn thung.

Semifinal-ah hian Group C atanga tlang nen an insu thei dawn a ni.

Sub Junior Boys’ National Football Championship hi kum 1977 atanga khelh tan kha niin 2023-24 atanga kum 13 hnuai lam tana khelh tura tih hma zawng kha chuan kum 16 hnuai lam inelna atana hman thin a ni.