ZALEN, May 18, 2025: Mizo zinga pro boxing khel tam ber, Vanlalawmpuia’n vawi sarih chak zawn tumin Super Fighter Series 3-ah Diyo Rimo Matam a hmachhawn dawn a, F Zoramchhana leh Harsh Saroha an inhnek bawk ang.

Crown Promotion leh Grassroot Boxing-in hlawhtling taka Super Fighter professional boxing tum hnih an buatsaih hnuah Bangalore-ah an chhunzawm dawn a. Series thumnaah hian inhnek vawi 10 awm tura ruahman niin Pathianni zanin dar 07:00-ah an tan dawn a, Mizo pahnih an inlan ang.

Inhnek vawi nganaah Arunachal Pradesh boxer, Matam hneh turin Awpa inrintawkna a nei sang a, Inrinni khan super lightweight huangah round ruk inhnek turin an inbuk a. Hmaichhanah intawng nghalin Mizo boxer hian a hlauh lohzia a lantir a, a hmaah dak chungin van lamah tui a phuh chhuak a, a tak tak a thlen hunah dim hauh lova nuai hrep a tum.

February 4, 2023 khan Awpa’n Thai khawpui, Bangkok-ah WBC Asia title a chuh tawh a, Phoobadin Yoohanngoh-a lakah uiawm takin a chak lo va. Hemi kum vek July 1 khan a hmun ngaiah inhnek nawn lehin Khuangthing fighter a tlawm zawn a, hemi hnu hian Awpa a insiam thar.

WBC India title a hnek chhuah hnuah Super Fighter series hmasa pahnihah a inlan ve ve a, a chak zawn a. A inlan hnuhnun ber, April 24 khan Lungleiah inhnek hautak a paltlang a, Preveen Malik nen round riat innuaiin unanimous decision-in a chak a, vawi ruk a chak zawn mek a ni.

Awpa hian a tum 17 nan pro boxing a khel dawn a, an inhnek tawhah tum 12 chakin vawi thum a tlawm bakah mi pakhat nen an inhnehtawk.

A inhnekpui tur, Matam-a’n pro boxing a khelh vawi thumna tur a ni ve thung a, Mixed Martial Arts World Championship leh Asian Championship-a bronze medal la tawhin Arunachal chhuanvawr a ni a, professional boxing a luhchilh atangin tlawm a la nei lo va, tum hnih chakin mi pakhat nen an inhnehtawk thung.

Inhnek hmasa berah Zotea leh Haryana boxer Saroha an intawng dawn a, super bantamweight huangah round ruk tura tih a ni.

November 10, 2023 khan Cherhlun tlangval, Zotea hian Adil Rajesh Kumar Singh hnehin WBC India title a la a, kum khat chuang a chawlh hnuah kir lehin kumin February 28 kha a inhnek hnuhnun ber a ni ve thung a, awlsam takin Ayush Singh a hneh.

Pro boxing tum 12 a khelh tawhah vawi kua chakin vawi thum a tlawm a, a inlan hnuhnun vawi ngaah chak zawn mekin fiahna tling inhnek a hmachhawn dawn. 

A hmaa ding tur, Saroha hian pro boxing vawi riat khel tawhin chak loh a nei lo va, tum ruk chakin vawi hnih a inhnehtawk a. April 27 kha a inlan hnuhnun ber niin unanimous decision-in Khapmeong Subba a hneh.

SUPER FIGHTER SERIES 3 AN TIHCHHUAHNA TUR LINK:

https://www.youtube.com/live/SLkB8e7M8uU?si=wvq2hKwfc8bgyPzG