ZALEN May 27, 2026: Vawiin khan India rama Court sang ber, Supreme Court chuan Election Commission of India (ECI) in a bik taka electoral roll ennawnna, “Special Intensive Revision” (SIR) an kalpui thei tih a nemnghet a, Article 324 hnuaiah ECI hian inthlanna felfai leh dik taka an kalpui theihna turin thuneihna zau tak an nei tih a sawi.

He thubuai hi Bihar-a SIR kalpui dan chungchangah thehluh a ni a. Thubuai thehluttu Petitioner-te chuan ECI-in an thuneihna huang pelin, vote nei tawh sa reng te chu vote nei tlak an nihzia tichianga, nemnghet nawn leh turin a nawr a, hei hi dan kalh a ni, tiin, mi tam takin vote thlak theihna dikna chanvo an neih chu a chhuhsak a ni, an ti.

Amaherawhchu, Supreme Court chuan Article 324 hian ECI chu thuneihna zau tak “plenary power” a pe a, chu thuneihna chuan inthlanna dik leh felfai kalpui theihna tura hmalakna pawimawh zawng zawng, elector roll ngun taka ennawn thlengin a huam tel a ni, a ti. 

Court chuan thubuai thehluttute thu thlen, Parliament-in election chungchanga Dan a siam tawh hnuah ECI-in thuneihna a nei tawh lo a ni, tih an sawi chu a hnawl a. Court chuan ECI thuneihna leh Parliament Dan siamte hi inkalh loa, inhne rem taka kal dun tur an ni, a ti a. ECI-in Parliament Dan siam a kalh tur a ni lo a, Parliament Dan siam hmangin ECI thuneihna (constitutional mandate) “tihbosak emaw che theiloa siam (extinguish or paralyse) ” theih a ni hek lo tih Court chuan a sawi a ni.

Supreme Court chuan Representation of the People Act, 1950-a Section 21(3) pawh a hrilhfiah a. He section hian ECI-in dik leh tha an tih anga electoral roll ennawn thei turin thuneihna zau tak a pe a ni, a ti. Court ngaihdanah chuan he provision hian dik leh felfai taka inthlanna buatsaih kawngah daltu leh tikhawlo theitu apiang hmachhawn turin a tul anga inpawhfan theihna (flexibility) a pe a ni, a ti.

Court chuan ECI-in tawp chin neilo thuneihna an nei bik lo tih a sawi chian rualin, India Danpui leh Parliament rorelna kalhin hma an la thei bik chuang lo a ti a. Amaherawhchu, thubuai thehluttuten SIR-in dan a kalhna lai Court hmaah chiang takin an lantir thei lo, tiin an thubuai thehluh chu a hnawl a ni.

Court chuan Article 324 hi “living constitutional power” a ni a, Dan awmsa nen inkalh loa hman a nih chuan Election Commission chu mipui sawrkar - democracy thianghlimna humhim turin chakna leh theihna a pe a ni, a ti.