ZALEN February 24, 2026: RL Peka chhungte'n High Court-a an zualkona High Court in thu tlingah pawmin, sawrkar leh Tanhril atanga hnawhchhuahna sign-tu (hming ziahhnan tute) insawifiah turin ti. 

Tanhril atanga hnawhchhuah RL Peka nupui chuan vawiin khan Police-in January ni 27, 2026-a an thuchhuah a, Marina Lalchhanchhuahi thattua a pasal an puhna leh Police PR avanga veng chhung atanga hnawhchhuahna thiah dilna chu court chuan a ngaihtuah.

Thubuai thehluttu hian a pasal chu engti kawng maha Marina-i thattu a nih theih loh thu sawiin, YMA Mibo Zawnna, December ni 3, 2025 a an thuchhuahah pawh December ni 1, 2025 tlai lam dar 5-ah Marina-i hi Tanhril Vengtharah auto a chuang lai hmuh thu tarlan a ni a. Hemi ni hian RL Peka hi chawhnu pumpui inah awmin an chhungte nen chaw an eikhawm a, pawn lamah a chhuak tawh lo. Marina-i thih avanga an in atanga zuang thla ni loin, accident palh avanga tla thla niin mit ngeia hmutu pawhin a zuangthla ni lovin a far thla tiin a sawi.

High Court-ah hian RL-a In halna avanga an bungraw chhia sawrkar leh hnawhchhuahna sign-tu laka compensation Rs 7,61,130 dilna leh henga inhnamhnawih te case siamsak turin an dil tel.

Tanhril atanga hnawhchhuahna lehkha siamtute hian an awmna pawl (YMA, MHIP, MUP, LC) anga thutlukna (Executive Committee notice leh thurel) pawh awm lovin hnawhchhuahna hi an siam niin a sawi.

Thubuai theh luttu ukil JC Lalnunsanga hian Police thuchhuahtu IGP & Chief Public Relation Officer, MRP, Media Cell hian Supreme Court-in People's Union for Civil Liberties & Anr. Vs. State of Maharashtra & Ors (2023 INSC 833) case a Police-in PR an siam dan tur kaihhruaina a bawhchhia a ti a. Supreme Court-in Tehseen S. Poonwalla Vs. Union of India & Ors (2018 9 SCC 501) case a hetiang mipui mob rule chungchanga inhnamhnawihte case siam sak tur an nih thu court-ah hian a thlen a. RL Peka te in halsak kaihhnawihah hian social media-ah heta inhnamhnawihte chiang taka lang chunga tumah man an la nih loh thu court-ah hian a sawi.

Court hian sawrkar leh hnawhchhuahna lehkha sign tute hi March ni 9, 2026 hmaa insawifiah turin a ti, tih Supreme Court-a Advocate on Record JC Lalnunsanga'n a website-ah a tar lang.