ZALEN Nov. 8, 2025 : Nizan dar 6:30 vel khan Tank Lorry in Hunthar Veng, Sairang Road-ah Lalmuanzova S/o. Lalnunmawia (L) Zohmun khua, tuna Edenthar veng BSUP a cheng chu a chilhlum.

Thudawn danin Muanzova hi Zothan Auto Works Sihhmuiah Security a thawk a ni a, duty turin a kal a, a fapa kum 6 mi lek a phur bawk. Hunthar leitlahniam pelhah an hmaa tlan pick up ding chuan a kawngkhar a hawng thut chu an su a, chutihlai tak chuan Tank Lorry rawn chho hnamdang khalh chuan Muanzova chu a mal velah a rawn chil zui ta niin an sawi. A fapa mipa naupang erawh a him hlauh thung.

Muanzova hi chetsualna hmu hmasatu ten taxi in Greenwood Hospital an panpui a, mahse awmzia a awm tawh lo a ni.

Nizan khan BSUP Edentharah a ruang tlaivarpui niin tukin hian Civil Hospital ah postmortem a ni anga, postmortem zawhah an khua Zohmun panpui a ni ang. Tanker Driver leh Pickup driver te hi Police ten thu zawhfiah atan an la.

#ZalenNews