ZALEN June 21, 2026: Online application hmanga taxi leh auto-rickshaw koh theihna tura duan, Mizo Taxi mobile application hmang turin Zirtawpni thleng khan lirthei 156 an inziak lut tawh a. Hetihlai hian he application hi Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owner Association (ADAROA) ten an la dodal.

Zirtawpni zan dar 7:30 khan MTA office, Dawrpui-ah pawl pathum hruaitute chuan joint OB meeting an nei a, pawl hrang hrangte hian Mizotaxi Application chungchangah hruaitute hmalakna a tawp thleng a thlawp an tum tih an sawi a. Thuchhuah an siamah Mizotaxi online booking system that tawk lohna lai nia an hriat, sawrkara an thlente a hlawhtlinna hmuh tur a la awm lo chu hriatthiam har an ti. 

Tunlai ei leh bar, khawsak na sang zel leh oil man to chho zel nen STA-in March, 2024 daih tawha rate a siamsak hmantir a tum chu hman chi-ah an ngai lo tih an sawi a. Rate awm tawk sawrkarah ziak a an thehluh tawh chu sawrkar hian pawmsak thei se an duh tih an sawi. 

Hei bakah hian pawl pathumte chuan registration fee Rs 500/ an chawi ngai tur leh mipui taxi/auto hmangtuten an hman a piang a chhiah (tax) 6-10% an chawi zel a ngai tur chu tha an ti lo a, chhiah khawntu atan hman a tum pawh an duh lo tih an sawi bawk.

MTA leh ATTA hruaitute chuan an member-te chu he application-a inziak lut lo turin an ngen a. MTA leh ATTA hruaitute chuan an member ni lo taxi khalh mi eng emaw zat an awm tih sawiin, tuna inziak lutte pawh an member ni lo an nih an rin thu an sawi.

Aizawl khawpui chhungah hian 'Mizotaxi' app hi July ni 1, 2026 atanga hman tan tur a ni a. Aizawl khawpui chhunga service lai 4-wheeler taxi te, 2-wheeler taxi leh Autorickshaw zawng zawng te chu June 2026 chhungin Mizotaxi Office, DTO (L.A) Office hnuai, Transport Complex, Chaltlang-ah registration tifel vek tura ngen leh hriattir an ni.

Sawrkar duhdan angin Mizo Taxi online application hi Aizawl khawpui chhungah bul tan phawt tur a ni dawn a, a tahtawlin district dangah pawh kalpui chhoh zel tum a ni.

Hetihlai hian Mizo Taxi hnuaia in register te tana registration fee, Office Order-a lo chhuah tawh chu thuneitute remtihna in motor pakhat ah Rs.500/- ah siam rem a ni a. He registration fee hi a motor service hun chhung atan a ni ang a, a bak pek leh a ngai tawh lo ang.

State Transport Authority (STA) chuan thuchhuah siamin Mizo Taxi-ah hun tiam chhunga mipui mamawh khawp lirthei in-register an awm loh chuan, a tul angin 'Mizo Taxi' hnuaia tlan tur permit pek belh a nih tur thu a tarlang tawh.