ZALEN, May 05, 2025: Branch YMA 154 zet inlanna tur, LBS Suzuki 22nd Inter Branch YMA Football 2025 chu Thawhlehni atang hian Aizawla khelmual paliah khelh tan a ni dawn ta a. A tan niah hian inkhel 12 awmin branch 24 an inlan nghal ang.

Kumin inelna hi kar kal ta Thawhlehni zan khan Central YMA Hall, Tuikhuahtlangah Lalhmachhuana, President, Central YMA-in a pet hawng a, inelna neih tawha branch an tel tam ber dawttu a ni a, Aizawl khawpui chhung aiin pawn lam branch an tel tam zawk bawk.

Pen hawn zan hian fixture tlangzarh niin inkhel 153 a awm dawn a, khelmual pali - RG Stadium, 1st Bn MAP Ground, Chite Ground leh Muallungthuah te khelh a ni dawn a ni.

First round hi ni hnih khelh a nih hnuah Ningani atangin second round (round of 128) khelh a ni ang a. Karleh Ningani atangin third round (round of 64) khelh tan a ni ang.

Round of 32 chu Nay 20 atangin khelh tan a ni ang a, round of 16 chu May 22 atangin an khel tan tur a ni dawn a, heta tang hi chuan final thlengin RG Stadium-ah vek inkhelh a ni tawh ang.

May 26 leh 27-ah quarterfinal inkhel vawi hnih ve ve awmin ni khat awl hnuah semifinal pahnih chu May 29-ah khelh a ni ang a. May 31-ah final khelh zui a ni ang.

Kuminah hian player bakah coach-te chu team pakhatah bak an inziak lut thei lo a, coach leh player nih kawp tumin an duh an thlan fel a ngai a. Coach hi a team enkawl bikah chuan player angin a inziak lut tel thei thung.

Inelna hmachhawn tur branch zingah Aizawl khawpui aiin a pawn an tam zawk lai hian Central YMA football inelna vawi 21 neih tawhah Aizawl khaw pawn atangin Lengpui chiah an la champion a. A bak tum 20 chu Aizawl khawpui chhung branch vek an ni tawh a ni.

May 6, 2025 (Thawhlehni) fixture:

(Kualkhung chhunga mi hi an awmna group)

LUNGDAI vs NEW SERCHHIP VENGLAI (A) 10:00 AM RG Stadium

SESAWNG, CTI vs LUANGMUAL (A) 12:15 PM RG Stadium

VANGTLANG vs ARMED VENG SOUTH (A) 2:30 PM RG Stadium

KAWNPUI BANGLA VENG vs ZOTLANG (C) 10:00 AM Muallungthu

REIEK vs COLLEGE VENG, KOLASIB (C) 12:15 PM Muallungthu

TUIVAMIT vs MELTHUM (C) 2:30 PM Muallungthu

CHAMPHAI ZOTLANG vs MAMIT HMAR VENG (E) 10:00 AM 1st Bn MAP Ground, Armed Veng

MUTHI vs SELESIH (E) 12:15 PM 1st Bn MAP Ground, Armed Veng

MUALVUM vs SAIKHAMAKAWN (F) 2:30 PM 1st Bn MAP Ground, Armed Veng

CHITE VENG vs RAMHLUN SPORTS COMP. (A) 10:00 AM Chite Veng Playground

HLIMEN vs DURTLANG NORTH (G) 12:15 PM Chite Veng Playground

RAMHLUN NORTH vs NEW SERCHHIP CHHEKHNAI (G) 2:30 PM Chite Veng Playground