ZALEN, 11.05.2026 - Vawiin zing dar 8 khan Mizo thalaite vawi khat telna Territorial Army, batch hmasa ber (166 INF Bn. TA (Home & Hearth) Assam) training tur chu Assembly Annexe Building atangin Chief Minister Lalduhoma chuan a vailiam a, hnaruak 300 la awmin lak an nih leh hunah ration card thlengin an phut kher tawh tur thu a sawi.

CM Duhoma chuan Territorial Army a Mizo thalaite an lut leh hnaruak 70 atanga 144 a tihsan a ni chu thil lawmawm anih thu a sawi a, local level atanga thalaite'n Mizoram leh India ram tan service an pek theihna a nih thu a sawi bawk. 

Chanchinbumite zawhna chhangin CM chuan, 'A tirah chuan Territorial Army hi a awm tih kan hre lo a, Union Home Minister, Prime Minister leh Defence Minister te kan sawipui hnuin Chief of Army Staff te nen hun reilote chhungin kan puitlin ta mai a ni,' a ti a. Sipai lak leh hunah an fimkhur lehzual tawh tur thu sawiin, 'Tun tum khan document lem hmanga lut rinhlelh kan nei a, kan lak leh hunah chuan India khua leh tui an ni tih finfiahna document hrang hrang, ration card thlengin kan phut tawh dawn a ni,' a ti.

CM in media mite a hrilh danin Champhai, Lunglei leh Champhai-ah company khat te te an awm a, training an zawh hunah ramri hrulah dah an nih a rin thu a sawi a, Mizo battalion puitling an neih theihna turin a hmun pawh Champhai lamah en a nih thu a sawi bawk. 

K Sapdanga Home Minister pawhin thusawiin Mizo thalai te chu thalai huaisen an ni a, sipaia tang tawhte pawhin ram an ti hming tha tawh thin a, sipai leh police service a lut tam turin thalaite a fuih bawk a ni. Territory Army training a kal turte chu tuarchhel turte, tangrual turtein a fuih bawk a ni.

Territorial Army chanchin tawi:

166 Infantry Battalion (Territorial Army) "Home & Hearth" sipai lakna hi Rajiv Gandhi Stadium-ah November 2025 khan neih a ni, hnaruak 144 a awm a ni. Mi 2700 in an dil a, medical test neih anih hnuin January 18, 2026 khan written examination neih a ni.