Kawngzawh Ni 13.2.2017 (Thawhtanni) khan Aizawl City College Joint Student Union (ACCJSU) buatsaihin Aizawla college zirlaite'n NIAS, Kolkata-a zirlai tirh an duh loh lantir nan leh zirlai harsatna tawkte zangnadawmna pek phûtin Sikulpuikawn leh Chanmari atangin kawng an zawh a, Vanapa Hall-ah intawkkhawmin resolution an siam. CM in hawng Chief Minister Lal Thanhawla chuan ni 13.2.2017 (Thawhtanni) khan R Deng?huama Indoor Stadium-ah sawrkar laipui leh state sawrkara civil service-te inelna, All India Civil Services Badminton Tournament 2017 a hawng. Sawiho UDPA secretary Dr C Vanlalramsanga hoin ni 13.2.2017 (Thawhtanni) khan Planning & Programme Implementation department conference hall-ah Smart City chungchang sawiho a ni. Sawipui School Education Minister H Rohluna leh Par.secy. Joseph Lalhimpuia te chuan ni 14.2.2017 (Thawhlehni) khan Mizoram tlawhtu Union Minister pahnih Harsh Vardhan leh Kiren Rijiju te kawmin CSS hnuaia Hindi zirtirtute harsatna chungchang an sawipui. Thisen pe Association for Voluntary Blood Donation (AVBD) chuan kum dang ang bawkin ni 14.2.2017 (Thawhlehni) khan Valentines day pualin Mizoram hmun hrang hrangah thisen pek rûnpui an buatsaih a, hriat theih chinah thisen pek zawng zawng hi unit 987 a tling niin thudawnna chuan a sawi. Mela Ni hnih chhung awh tur Digidhan mela (Digital Payment Fair) chu ni 14.2.2017 (Thawhlehni) khan Millennium Centre chung zâwlah Chief Secretary Lalmalsawma'n a hawng. Pungkhawm Aizawl City College Joint Students Union (ACCJSU) hruaitu mi engemaw zat chu ni 14.2.2017 (Thawhlehni) khan NIAS, Kolkata-a zirlaite thlavâng hauhna atan Chief Minister bangla luhna gate bulah lungawi lohna lantirna atan sit-in demonstration an nei a, CM nen an inbiak hnuah an kaldarh. Lungphum Minister for Science & Technology and Earth Sciences Dr Harsh Vardhan chuan ni 14.2.2017 (Thawhlehni) khan Mizoram University campus-ah Mizoram Bioresources Development Centre (MBRDC) hmalakna bul tanin lungphùm a phúm a; MZU Department of Biotechnology-a Advanced State Level Biotech Hub a hawng bawk. Bang LE&IT Minister Lalrinmawia ralte leh Mizoram Youth Commission chairman T.Sangkunga te chuan ni 15.2.2017 (Nilaini) khan Chief Minister Lal thanhawla hnenah banna an thehlut. Sum pe NABARD Mizoram Regional Office chuan thuchhuah siamin Mizoram tan tun hnaiah cheng nuai 1845.30 an pek chhuah thu an tarlang. Tlangzarh Ni 15.2.2017 (Nilaini) khan Finance Minister Lalsawta chuan I&PR Auditorium-ah SIMsePAY (mobile wallet) a tlangzarh a,  I&PR Minister Lal Thanzara'n PACS documentary film  buatsaih chu a tlangzarh bawk. Press kawm Ni 16.2.2017 (Ningani) khan Vanapa thlan sub committee Hnahlan leh Vanapa thlahte chuan Aizawl Press Club ah chanchinbumite an kawm a, Vanapa thlan chu Hnahlan ramah a awm tih an puang. Cultural meet Ni 16.2.2017 (Ningani) khan ZoRO thalai leh Aizawl City College Joint Students' Union tangkawp chuan Vanapa Hall-ah Zo Hnam Cultural Meet 2017 an buatsaih a, parliamentary secretary Joseph Lalhimpuia khuallian a ni. Hawng FIFA Under 17 World Cup denchhena India rama naupang maktaduai 11-in football an zirna tura duan, Mission XI Million chu Mizorama kalpui ve turin ni 16.2.2017 (Ningani) khan MFA President Lal Thanzara'n Chanmari YMA hall-ah a hawng.