AMC 2026 atan Home Voting kalpui tan || Kum 102 miin vote thlak

Aizawl: General Election to Aizawl Municipal Corporation (AMC) 2026 April 13, 2026 zing atanga khan kum upa te, damlo natna khirh bik nei polling station pan theilo te leh pianphung a rualbanlo polling station pan theilo te tana a vote thlak theihna tura ruahman, Home Voting chu kalpui tan a ni.

  Home Voting hi ni 13.4.2026 (Monday) atanga ni 16.4.2026 (Thursday) thlenga kalpui tura ruahman a ni. Home Voting hi AMC Ward 19-ah kalpui vek ni a, Ward tinah Home Voting Team pakhat theuh awm in, Home Voting ti tura dilna lut zat hi 2769 a ni a, ni 4 chhunga vote thlak hi zawh hman tura ruahman a ni.

  Home Voting-ah hian vote thlak upa pahnih te chu Nghakliani, Kum 102, Dawrpui, Ward-IX hnuai a mi leh Darkhumi, kum 102, Dawrpui Vengthar, Ward XIII te an ni

In chhawng 7 atanga tla kum 45 mi thi

Aizawl: Laldinmawia, kum 45 Zonuam, Aizawl chu April 16, 2026 khan an hnathawhna Lower Zarkawt-ah In chhawng sarihna atangin a tla a, Civil Hospital, Aizawl panpui a nih hnuah a thi. Tlaivarpui a ni ang a, a tukah vui a ni.

  Laldinmawia hi Hotel Regency-a thawk niin an thawhna te hian hmun danga In sak lai neiin, a thiante nen electric wiring endik turin an kal a, he buiding hi Grace Nursing Home thin, Lower Zarkawt hmun sak lai a ni a, wiring an buaipui lai hian elevator (lift) fitna tura hmun an zuah chu dai sualin a tla ta a ni.

  Laldinmawia hi mit tha lo a ni a, an hna thawhna hmun hi a lo thim bawk avangin kawng a hmu tha thei lo a, a chesual phah ta niin a thawhpuite chuan an sawi.

  A tlak hlim hian a thi nghal mai lo a, Civil Hospital Aizawl casualty an thlen pawh hian a la tawng peih a, thawk harsa a tih thu a kalpuitute pawh hi a hrilh a, Oxygen an pek hnu lawkah a thi zui ta mai niin an sawi.

Lungdai-a chhiatna danglam tak mi 1 a thi

Aizawl : Lungdai-ah April 13, 2026 zing khan chhungkaw pakhata mi pathum chennah chhiatna a thleng a, pakhat a thi a, pahnih chu ZMC&H lamah hruai an ni. 

  ZALEN Thudawn danin Chhungkaw nu ber Lalremsangi (Tei) chu a hnathawhna hmunah a thlen huna a thlen loh avangin zing dar 10 vel khan a thawhna dawr neitute ngaihtha lo chuan an kawngkhar tichhia in an lut a, an fanu Priskil Vanlalhriatpuii kum 14 mi chu thi in hmuh a ni.

  Chhungkaw nu Lalremsangi leh a fapa Austin Vanlalmalsawmna te chu an lo la thaw a, buaipui nghal niin Lungdai PHC panpui an ni a, anni hian hmunpui lama refer-in Durtlang hospital panpui leh an ni a, Durtlang-ah hian ICU an chan loh vangin ZMC&H panpui leh an ni. Sangha chungchang Fisheries leh F&DA ten sawiho

Aizawl: April ni 16,2026 khan Fisheries Department Secretary, Er Lalrothanga hovin a pisa-ah Sangha thianghlim zawk lakluh leh zawrh chhuah chungchang sawihona hi neih a ni a. Fisheries Departments leh Food & Drugs Administration lam officials te an tel a ni.

  Kalkhawmte chuan Mizoram sangha tharte State pawna thawnchhuak lova mipuite hnena lei theiha siam chu tul an ti a, a bak mamawh state dang atanga lakluh tur pawh a thianghlim thei ang ber lakluh anih theih nana hmalak ho dan turte an rel. 

  Health Department hnuaia Food & Drugs Administration lamin Standard Operating procedure hi rawn duang se, a tul ang angin Fisheries Department in lo puibawm se, thawktu leh sum mamawh ang te chu sawrkarah dil se an ti a ni. Sangha zuara eizawngte pawh Mizorama tharchhuah ngei sangha a tam thei ang ber an zawrh dan ngaihtuah tura hmalak pui dan zawn pawh an ngai hle a, pawnlam atanga lakluh pawh thianghlim zawk lakluh anih theih nana hmalak pui dan zawn dan turte SoP ah hian dah tel ni se an ti a ni.

Housing kalpui tur inziahluh bultanna Lok Bhavan-ah tan

Aizawl : Mizoram Larsap, General (Dr) Vijay Kumar Singh, PVSM, AVSM, YSM (Retd) chuan April 16 khan India ram Chhiarpui 2027 atana Mizoram puma Houselisting and Housing kalpui tur inziahluh bultanna Lok Bhavan, Aizawlah a nei. Hemi hnu hian ram chhung hmun dangte rualin Mizoram-ah Houselisting and Housing chhiarpui kalpui tan a ni. 

  Mizorama Houselisting and Housing bultannaah hian Directorate of Census Operations atangin Joseph H. Lalramsanga, Municipal Commissioner cum Principal Census Officer leh Irene Zohlimpuii Chongthu, Addl. Secretary, GAD & Addl. State Nodal Officer bakah official dangte'n Larsap hi an tawiawm a ni. 

  Chhiarpui 2027 hi India rama digital census hmasa ber tur niin, thawh hniha kalpui tur a ni a. Thawh khatna Houselisting and Housing hi April 1, 2026 atang khan kalpui tan a ni a. Thawh hnihna, Population Enumeration hi February 2027-ah neih tan tur a ni thung ang. 

Mizo Inneih, Inthen leh Rokhawmna Dan ennawnna Review Committee thukhawm

Aizawl: Mizo Inneih, Inthen leh Rokhawmna Dan ennawnna Review Committee chu April 15, 2026 khan an Chairman Zahmingthanga Ralte, Law & Judicial Department-a Addl. Secretary hoin Chief Secretary Conference Hall-ah an thukhawm.

  The Mizo Marriage and Inheritance of Property (Amendment) Act, 2026 chu Mizoram Gazette-ah March ni 6 khan chhuah niin hemi ni atang hian hman nghal a ni a. Chairman chuan “Kohhran hrang hranga Inneihna kawltu zawng zawngin an hriat tur chu, he dan hnuaiah hian nupui pasal then tawhin midang an neih leh dawn chuan Court atangin Divorce Certificate an neih ngei ngei a ngai a, chutiang nei lova nupui pasal dang nei chu BNS Sec.82 angin kum 7 thleng lung in tan leh pawisa chawia hrem theih an ni dawn”, a ti.

  Thukhawmah hian Mizoram Kohhran Hruaitute Committee (MKHC), Council of Churches in Mizoram (CCM), Mizo Language Development Board, MHIP Headquarters, MUP Headquarters, Women Commission, Bar Association bakah mi thiam leh tui mite an tel.

Larsap-in Chief Minister hlui lehkhabu ziah tlangzarh

Aizawl: Mizoram Chief Minister hlui Zoramthanga'n a chanchin a ziahna, "From Guerrilla Fighter to Chief Minister" tih chu April 14, 2026 khan Mizoram Larsap, General (Dr) Vijay Kumar Singh, PVSM, AVSM, YSM (Retd) chuan Aijal Club-ah a tlangzarh.

  Lehkhabu ziaktu Zoramthanga chuan Larsap nena an intawn dan inperhsan tak pawh he hunah hian sawi chhuakin, inhre miah lova December ni 16, 1971 East Pakistan War laia lo inep tawh, khatih laia Indian Army-a Lieutenant, tuna Mizoram Larsap ni ta General (Dr) Vijay Kumar Singh, PVSM, AVSM, YSM (Retd) in India laka zalenna suala lo rammu tawh buatsaih lehkhabu a tlangzarh ta mai chu thil thleng zen zen lo leh mak dangdai tak anih thu a sawi.

  From Guerrilla Fighter to Chief Minister tih lehkhabu hi Penguin Random House chhuah a ni a. Online-in Amazon-ah a lei theih bakah, tlangzarh anih hnu hian lehkhabu zawrhna dawr hrang hrangah lei theiha chhawpchhuah a ni a. Phek 430 a chhah niin, Bu khat hi Rs 400/- man a ni.

Mizoram sawrkar leh HPC-D (LF) ten inremna thuthlung ziak

Aizawl: Mizoram Sawrkar leh Hmar People’s Convention-Democratic (Lalhmingthanga Sanate’s Faction) te chuan April 14, 2026 khan Vengpui Community Hall, Sakawrdai-ah Memorandum of Settlement an ziakfel. 

  Memorandum of Settlement-ah hian Mizoram Sawrkar aiawhin David Lalthantluanga, IAS, Secretary, Home Department, Government of Mizoram, chuan hming a ziak a. Hmar People’s Convention-Democratic (Lalhmingthanga Sanate’s Faction) aiawhin an President Lalhmingthanga Sanate-in hming a ziak bawk a ni. Adviser to Chief Minister Lalmuanpuia Punte, MLA, , Mizoram (Political) leh Rodingliana Chawngthu, IPS, DIG (Northern Range) ten Memorandum of Settlement ziahna hun an hmanpui a ni.

  Ruahman lawk dan chuan Hmar People’s Convention-Democratic (Lalhmingthanga Sanate’s Faction) mi leh sa 43 (sawmli leh pathum) te tan Mizoram Sawrkar chuan April ni 30, 2026 (Ningani) hian CTI, Sesawng-ah Laying of Arms Ceremony (silai tun inkhawm) a buatsaih dawn a ni.

Fire Service Week 2026 hmang

Aizawl: Kum tina hman thin Fire Service Week chu India ram pumah 14th – 20th April chhunga hman a ni a, April 14 bik hi Fire Service Day/Martyrs Day atan hman a ni thin bawk. 

  Mizoramah chuan April 14 khan Fire & Emergency Services Department Director H.L. Thangzuala chuan Fire Service Week, 2026 hi State puma hman turin a hawng.

  Mizoramah chuan kumin Fire Service Week pual hian damdawi in thlan bikahte Fire Safety Audit neih a ni dawn a. Tin, School hrang hrangah School naupangte Fire & Evacuation Drill leh Lecture & Demonstration neih pui an ni dawn bawk a ni.

  Kumin Fire Service week denchhen hian Mizoram atangin F&ES a thawk mi 5 (panga) te chu Director General-Fire Service, Civil Defence & Home Guard, MHA, Govt. of India chuan an hnathawh that avangin Silver & Bronze Disc and Commendation Certificate dawng turin mi 7-a tlang a ni.

Sawrkarin Dry Day puang

Aizawl: General Election to the Aizawl Municipal Corporation, 2026 neih tur inpuahchahna kalpui mek zelah Commissioner of Excise & Narcotics, Excise & Narcotics Department, Mizoram chuan Section 4A of the Mizoram Liquor (Prohibition) Amendment Act, 2025 in thuneihna a pek April 13, 2026 khan Dry Day ni tur a puang.

  END thuchhuak chuan April ni 20, 2026 (Thawhtanni) tlai dar 4:00 atanga vote thlak ni April ni 21, 2026 (Thawhlehni) tlai dar 4:00 thleng (darkar 24 chhung) bakah, vote thlak that a tul chuan April ni 23, 2026 telin, leh Vote chhiar hun tura ruat April ni 27, 2026 (Thawhtanni) a vote chhiar zawh fel a nih hma chu Aizawl Municipal Corporation huam chhungah zu khap burna ni 'Dry Day' atan a puang.