ZPM Vice President atangin W. Chhuanawma'n banna theh lut

ZALEN : ZPM Vice President W Chhuanawma chuan April 22, 2026 khan an party-a a nihna chelh atangin banna a theh lut.

  ZALEN thudawn danin, Tuichang bialtu MLA W Chhuanawma hian, taksa lamah harsatna a neih avangin ZPM Vice President (elected) nihna a chelh atangin banna hi a theh lut a, a chungchang hi April 29, 2026 hian ngaihtuah a ni ang.

  ZPM party hian Vice President pathum an neih mek zingah, W Chhuanawma chiah hi elected a ni. Appointed Vice President pahnihte chu VL Zaithanzama leh C Lalnunnema te an ni.

  ZPM Vice President hmun ruak hlawh khat tur hian tuna ZPM Political Affairs Committee (PAC) elected member Lalmuanpuia Punte, Hrangturzo bialtu MLA ni bawk chu Vice President post luah khat tur hian a khan hle nia thudawn a ni.

Thing kih titawp lailawk turin High Court-in thupek chhuah

Aizawl: Assam Rifles ram hluia sawrkarin thing a kih mek chu Gauhati High Court-ah PIL a luh avangin court chuan April 20, 2026 khan thupek chhuahin tawp lailawk turin a hriattir. 

  Petition thehluttu tarlan danin Assam Rifles ram hluiah hian thing upa tawh tak tak, kum 100 chuanga upa tawhte an awm a. Sawrkarin kawngpui metre 14 thlenga tihzauh a tum avangin thingkung 174 chu kih tura tih an ni.

  Centre for Environment and Social Justice (CESJ) aiawhah petition thehluttu, Saizampuii Sailo chuan a petition thehluhah chanchinbu thenkhat ziah dan a behchhana a, helai hmunah hian thing 400 chuang a awm a. Aizawl khawpui tan an tangkai avangin sawrkar chuan an kih chhan a sawifiah tawk loh bakah Aizawl khawpui tan a tha dawn lo niin a ngai bawk a ni. 

  Court chuan a ngaihtuah hnuah sou moto hmangin thutlukna a siam a, sawrkar chu thing kih hna chawlh san lailawk turin a hriattir ta a ni.

Skywalk leh Ropeway kaihhnawih thubuai Court kutah lut

Aizawl : Sakawrhmuituai tlanga skywalk leh Chaltlang leh Durtlang inkar ropeway siam chungchang thubuai chu chhui zawh a nih hnuah ACB Chargesheet No 2/2026 dt 10.03.2026 chu Special Judge (Prevention of Corruption Act) Court, Aizawl-ah thehluh a ni.

  He thil tih chingpennaa inrawlh (Accused) zingah hian Ex-Minister John Rotluangliana, MLA Robert Romawia Royte leh Congress MLA hlui pakhat hming a lang nia hriat a ni. 

  MNF party-a Vigilance department leh Legal Board chuan skywalk leh ropeway siamnaah thil dik lo a awm nia ngaiin November 22, 2021 khan Loyayukta-ah complaint an thehlut, December 7, 2021 khan Mizoram sawrkara Vigilance chuan December 17, 2021 khan chhui phalna a tichhuak a, ACB chuan December 22, 2021 khan phalna an dawng a, January, 2022 khan an chhui tan a ni.

  Tourism department pawhin skywalk leh ropeway chungchangah hi February 3, 2022 khan Lokayukta-ah an thlen ve bawk a. Department hi chuan mi mal/company rinhlelh tar lan an nei lo thung.

AMC Election 2026-ah vote 62.77 % a tla

Aizawl : AMC 2026 Election chu April 21, 2026 khan neih niin zan dar 6:40 velah Polling Station zawng zawng khar a ni a, vote tla hi 62.77% a ni. Ward No. XIX chu vote tlak thatna ber niin Ward No. II (reserved seat) chu vote tlak chhiatna ber a ni.

  AMC-ah hian voters 2,39,985 an awm a, heng zinga voters 1,10,335 hi mipa an ni a, hmeichhia voters 1,29,650 an awm. Vawiin hian mipa 66,415 leh hmeichhia 80,304-in vote an thlak a, polling station a vote tla hi 1,46,719 a ni. Hmun dang leh home voting nen a vaiin vote 1,50,640 a tla.

  AMC Election 2026-ah hian Ward vote tlak that berna Ward XIX-ah hian vote 67.22 % a tla a, a tlak chhiatna ber Ward No.II-ah 50.52 % a tla. Polling station bikah Ward VIII-a Chite polling station chu vote tlak thatna ber niin 81.60% a tla a, Ward No. I-a Durtlang IV polling station chu vote tlak chhiatna ber niin 34.51% a tla.

  AMC inthlan 2026-ah hian Home voting dilna lut 2,768 zinga mi 2,594-in vote an thlak a. Vote thlak zat hi 93.71% niin thlak lo mi 174 an awm a, vote thlak lo te hi thi tawh te, damdawi ina awmte bakah vote thlak leh duh lo te an ni.

MSSC kum 50-na Golden Jubilee lawm

Aizawl, 21st April, 2026 : Mizoram State Sports Council (MSSC) kum 50-na Golden Jubilee chu April ni 20, 2026 khan R. Dengthuama Hall, Mualpuiah urhsun taka lawm a ni a. MSSC President, Sports & Youth Services Minister ni bawk chu khuallian a ni.

  Mizoram Chief Minister hlui Lal Thanhawla, MSSC President hlui MLA ni lai mek Robert Romawia Royte, MLA ; Jeje Lalpekhlua, MLA; Lt. Col. Clement Lalhmingthanga MLA; MSSC President hlui - Zodintluanga Ralte, Lalrinsanga leh Rualchhina bakah sawm bik mi pawimawh te leh MSSC hnuaia affiliated State –level Sports Association hrang hrang aiawhte an tel a ni.

  Mizoram State Sports Council (MSSC) hi April ni 20, 1976 khan Executive Order hmanga din a ni a, The Mizoram State Sports Council Act, 2002 hmangin inrelbawlna leh kalphung mumal zawka tihchangtlun a ni. Tun dinhmunah MSSC hnuaiah hian State level Sports Association 34 an inziaklut a, Jubilee pual hian kum khat chhungin Sports Association tin hian Mizoram pum huap tournament pakhat theuh hlawhtling takin an buatsaih tawh a ni. 

  Mizoram State Sports Council member hmasa ber (1976) leh hetih laia an nihna te: 

President : Dr. H. Thansanga, Education Minister

Vice- President : Lal Thanhawla

Secretary : Zolura, Special Officer for Scouts & Guides and Youth Welfare Activities

Treasurer : J. Lalduhawma, State Social Education Officer

Members : Hranthanga, Deputy Director, School Education

L. Pachhunga, ADC ; SH Pautu, Lecturer, Pachhunga University College ; C. Khenglawt, DGP ; KL Rochama,MLA leh H. Rozika, Addl Secretary, Finance

IOCL-in LPG chungchang Press Conference an nei

Aizawl: Indian Oil Corporation Ltd. (IOCL) chuan April 20, 2026 khan Press Information Bureau (PIB), leh Directorate of Information and Public Relations (DIPR)-te nen tangrualin I&PR Auditorium, Treasury Square-ah, tunlaia eirawngbawlna gas (LPG) kaihhnawiha mipui vantlang hriattur pawimawh chi hrang hrangte inhrilhhriatna atan Press Conference huaihawtin thuthar lakhawmtute nen inkawmhona hun an hmang.

  IOCL hotute chuan West Asia-a Indona vanga khawvel hmun hrang hranga LPG vang leh harsa anga sawi chuan Mizoramah engmah nghawng a nei lo tih chiang takin mipui ten hria se an duh tih an sawi a. Chutih rualin gas chah dan phung felfai zawk kalpui a nih theih nan te, gas bo thlau a awm lohna tur te leh gas-in a neitu dik tak hnen a hun taka a thlen theihna tur tea hmalakna avangin mipuite chu chiai lo turin an ngen a ni.

Book of the Year 2025 lawmman hlan

Aizawl : April ni 23, 2026 khan I & PR Auditorium, Aizawl-ah Mizo Thu leh Hla Inpui (Mizo Academy of Letters) chuan an pawl din champha lawmna hun an hmang a. ‘Kham leh Suar’ thawnthu ziaktu Lalrammawia Ngente hnenah Book of the Year 2025 chawimawina an hlan.

  He huna khuallian Carol VLMS. Dawngkimi, Director, Art & Culture, Government of Mizoram chuan ‘Kham leh Suar’ thawnthu ziaktu Pu Lalrammawia Ngente hnenah Book of the Year 2025 chawimawina thu ziak leh pawisa fai Rs 10000 a hlan a ni. Khual lian hian Dr. Darchuailova Renthlei, Dr. H. Laldinmawia leh Tv Lalrinngheta te lehkhabu a tlangzarh nghal bawk a ni. 

  MAL pawl din champha lawmna hi Prof. RL. Thanmawia, President, Mizo Thu leh Hla Inpui chuan kaihruaiin, Dr. Zoramdinthara, Ziaktu Lian chuan pawl dinhmun leh hnathawh tlangpui tarlangin, kum 2025 chhungin Mizo tawng lehkhabu 223 a chhuah thu te, MAL chuan lehkhabu tha chu tehfung hrang hrang hmang a teh a nih hnuah a tha ber thlan a nih thin thu a sawi a. Thu leh Hla Inpui Joint Headquarters leh Branch atangin report tawi ngaihthlak a ni bawk.

State Level Anti-Drugs Committee nei

Aizawl : April 22, 2026 khan School Education Minister Dr Vanlalthlana hovin a Office Chamber-ah School Education Department hnuaia State Level Anti-Drugs Committee neih a ni a, ruihhlo laka school naupangte fihlim theih nana hmalak dan tur rel a ni.

  He meeting-ah hian ruihhlovin school naupangte a tihbuai dan chungchang zir chianna awm tawhte thlir ho niin ruahmanna siam a ni a. Hmalakna atan School Drug Policy buaipui turin Drafting Committee din a ni.

  Meeting-ah hian School Education Department, Mizoram Social Defence & Rehabilitation Board, Social Welfare & Tribal Affairs, Excise & Narcotics Department hotute leh Mizoram Teachers Federation hruaitute an tel a ni.

Cooperation Department, NABARD leh MCAB hotute'n Mizoram Larsap an kawm

Aizawl, the 23rd April, 2026 : Vawiin khan Cooperation Department, National Bank for Agriculture and Rural Development (NABARD) leh Mizoram Cooperative Apex Bank (MCAB) Ltd., hotute chuan April 23, 2026 khan Larsap, General (Dr) Vijay Kumar Singh chu Lok Bhavan, Aizawl-ah hmuin, tunhnaia "Scheduled Bank" dinhmuna Mizoram Cooperative Apex Bank (MCAB) Ltd. hlankai anih chungchang bakah hmalakna dangte an sawipui.

  Larsap General (Dr) Vijay Kumar Singh chuan Mizoram Cooperative Apex Bank Ltd.-in Scheduled Bank dinhmun pawimawh tak a thleng thei chu a lawmpui thu sawiin, scheduled bank an nih tawh avangin State Sawrkar hnuaia department-te pawhin dan ang taka an dawr theih tawh dawn thu a sawi a. Cooperative Bank-te chu mipui nawlpui tana dawr theih an nih avangin tun aia hmasawn lehzual tura theihtawp chhuah turin a chah a ni.

  Mizoram Cooperative Apex Bank Ltd. hi July 31, 1982 khan din a ni a. Tun dinhmunah Apex Bank hian branch 35 leh ATM 45 a nei mek a. Deposit cheng vaibelchhe 1930 neiin, loan cheng vaibelchhe 1272 an pe chhuak a, sum dahluh leh loan pek chhuah khaikhinna Credit-Deposit (CD) ratio hi 66% a ni a, Mizorama Bank-te zinga loan pe chhuak tha berte zinga mi a ni mek.

Larsap-in Shalom Special School zirlaite a kawm

Aizawl: Mizoram Larsap General (Dr) Vijay Kumar Singh chuan April 23, 2026 khan Shalom Special School, Serchhip zirlaite chu Durbar Hall, Lok Bhavan, Aizawlah a kawm. Shalom Special School zirlaite hian Serchhip Battalion, Assam Rifles buatsaihin April ni 13-23, 2026 chhung hian Aizawl, Silchar, Shillong leh Cherrapunji-te tlawhin Study Tour an nei a ni.

  Shalom Special School, Serchhip hi August ni 17, 2005 khan Chief Minister hlui Lal Thanhawla'n a din a. Tuna an school building ni ta sakna tur lungphum hi Mizoram Larsap hian Eastern Army Commander anih lai, January 2010 khan a lo phum sak tawh a; 4th Assam Rifles te'n Military Civic Action kaltlangin an sak sak a ni.

  Shalom Special School, Serchhipah hian vohbik zirlai 36 an awm mek a ni.

Youth Festival (Univoyage) 2026 hmang

Aizawl: Mizoram Larsap General (Dr) Vijay Kumar Singh chuan April 22, 2026 khan ICFAI University Mizoram leh Tourism Department tangkawp buatsaih, Youth Festival (Univoyage) 2026 chu ICFAI University Mizoram Campus, Durtlang North, Aizawlah a hmanpui. 

  Youth Festival (Univoyage) 2026 hi Prof. (Dr.) Ginlianlal Buhril, Vice-Chancellor, ICFAI University Mizoram chuan kaihruaiin inlawmna thu a sawi a. Irene Zohlimpuli Chongthu, Addl. Secretary, Tourism Department, Govt. of Mizoram; Padma Shri Patricia Mukhim, Editor, Shillong Times leh Dr. Theyiesinuo Keditsu, Kohima, Nagaland te hnen atangin thusawi ngaihthlak a ni a. Sawi hona leh zawhna leh chhanna hun hman a ni a. Dr. David Lawmzuala Registrar, ICFAI University Mizoram chuan lawmthu sawiin hun hman a khar a ni. 

  Youth Festival (Univoyage) 2026 hi ni hnih (22-23 April) awh niin, thupui atan "Exploring Diversity, Strengthening Bonds" tih chu hman a ni.