CADS-in Heroin hawng 400 man

Aizawl : Central YMA hnuai ruihhlo do pawl, Central Anti Drugs Squad (CADS) te chuan hun engemaw chen an lo veh tawh ruihhlo No. 4 (Heroin) Hawng 400 (Kg 4 leh Gram 821) chu April 24, 2025 zing dar 03:00 vel khan lirthei pahnih leh a khalhtu mi pahnih nen Saitual-ah an man. He ruihhlo man hi Rs. 1,12,00,000/- (Cheng Nuaih za sawm pahnih) hu vel ni a ngaih a ni.

   He Ruihhlo No.4 (Heroin) hi lirthei (Car) Registration No. MZ01/J-8898 (Grand i10) Thangsangpuia (Puia), kum 28, s/o Kapchhunga, Zawra Veng, Farkawn khua tuna Ramhlun North a cheng mek ni a in sawiin a khalh hnen atangin Hawng 200 (Kg 2 leh gram 400) man a ni a. Lirthei (Car) Registration No. MZ01/H-6514 (i10) Malsawmdawnga(Sawma), kum 29, s/o Zanghrechina, Zawra Veng, Farkawn khua tuna Khawmawi, Myanmar a khawsa mek nia in sawi in a khalh atangin Hawng 200 bawk (Kg 2 leh Gram 421) man a ni bawk.

MZP-in Buhchangphai tlawh

Aizawl : April 24, 2025 (Ningani) khan MZP General Headquarters chuan, Buhchangphai an tlawh a. April 23, 2025 (Nilaini) a Assam Forest ten Buhchangphai khaw chhûng Chhimluang, Ramthar zau panna leihlawn siam mêk chawlhsan tura an tih chu a hmunah an endik.

   Buhchangphai khawchhung Chhimlung lui, Ramthar Zau panna leihlawn hi a thah tâwk loh avângin, Mizoram sawrkar chuan Minor Irrigation hnuaiah RCC leilawn an siam mêk a. Chhimluang lui lehlamah hian Buhchangphai khaw miten huan lo ram neiin, ei leh bâr zawn nan an hmang hlawm a. Heng huan lo ramte hi Mizoram Land Revenue & Settlement Department hnuaiah LSC neiin, chhiah pawh Mizoram sawrkar hnuaiah an pê a. Buhchangphai V.C ram pass nei engemaw zât an awm bawk.

   Heng huan neitute mamawh leihlawn Mizoram sawrkar hnuaia dawh that mêk hi, Assam Police leh Assam Forest ten nimin khan an tlawh a. Assam ram chhûng nia sawiin, hna thawh mêk hi tâwpsan nghal turin an hriattîr bâkah, Assam Katlichera D.C chuan Stay order a chhuah nghal bawk.

Christian Hospital-in MUHCS zawm dawn

Aizawl : Baptist Church of Mizoram (BCM) hnuaia awm Christian Hospital, Serkawn chuan April 23, 2025 khan Mizoram Universal Health Care Scheme (MUHCS) an zawm dawn tih an tichiang.

   Christian Hospital, Serkawnin MUHCS an zawm leh zawm loh chungchangah Hospital Management Committee-in Committee sang zawka thlen tura a rel bawhzuina kal zelah Nilaini khan BCM Headquarters Meeting room No 1-a BCM Administrative Committee a, thukhawm chuan zawm ni se, lo bawhzuia hma la tur hian Hospital Management Committee kuta awm se tiin a rel a ni.

P&E Dept leh YMA bungraw rutu man

Aizawl : Zuangtuia Power & Electricity Department bungrua leh YMA bungrua rutu nia hriat, Myanmar atanga raltlan nia hriat bawk mipa pahnih chu Zuangtui Branch YMA-n an man a, police hnenah an hlan.

   Zuangtui Branch YMA-in April 23, 2025 thuchhuah an siama an tar lan danin an branch YMA Kumpuan Committee hmalaknain Hmangaihthanga leh Lalchawisanga te hi an man a ni. YMA hian Bawngkawn Police-ah hlan an ni.

Phir upa ber kum 91 mi boral

Aizawl : April 24, 2025 zan dar 11:40 khan, Mizo zinga phir la dam upa ber nia hriat pakhat zawk, Lalchhingpuia (91), Mission Veng chu a boral.

   Lalchhingpuia (91) H/o Rochhingpuii, Mission Veng, Muka Section hi nizan khan an chenna in-ah tlaivarpui niin, April 25 khan Mission Veng Presbyterian Kohhran hall ah vui a ni ang.

   July 18, 1934 a piang niin, Mizo zinga phir la dam upa ber nia hriat an ni a, a unaupa chu Phirdailova a ni.

Mobile phone bo a neitu te hnenah hlan let

ZALEN April 22, 2025: Mobile phone bo leh ruk CEIR portal hmang a hmuh let mobile phone 15; Rs.2,55,696/- man hu chu a neitu dik takte hnena April 22 khan Lunglei police station-a cyber crime te chuan hlan letna hun hman a ni.

   He hun hi K. Beihmotaosa MPS, Addl, S.P Lunglei leh Lalmawizuala MPS, SDPO Tlabung, Officer-in- Charge, Lunglei police station leh officer dangte’n an hmanpui a, mobile phone neitute an tel bawk.

   Mobile Phone hmuhlet te hi January atanga March thla 2025 chhunga chhui chhuahte an ni.

Scooty chesualah kum 15 mi a thi

Aizawl : Kolasib a inneih hmang tura zin tleirawl kum 15 mi chu scooty chesual-ah April 22, 2025 khan a thi.

   ZALEN thudawn danin, C. Vanlalhlimpuii (15), Bethlehem, Aizawl chu nimin tlai dar 6 rik hma deuh khan Thingdawl-ah an chuanna scooty leh truck an intai a, hliam na tak tuarin, Kolasib damdawiin panpui a ni a, damdawiin thlenpui a nih hnu tlai dar 6 khan a hliam tuar loin a thi a ni.

Kolasib DC leh MNYF hruaitute inkawm

Aizawl : April 24, 2025 khan Mizo National Youth Front (MNYF) General Headquarters hruaitute leh Kolasib District- a MNF thalaite chuan Thingdawl Polytechnic-a kuhva ro Kolasib District Magistrate-in a tihral chungchang bawhzuiin, a hmunah kalin an rawn en fiah a. Kolasib DC nen inkawmna an nei bawk.

   H. Lalramliana, SDO(S), Kolasib leh Pu David H. Lalthangliana, Sr. SP Kolasib-ten lo dawngsawngin, hun eng emaw chen inbiakna neih a nih hnuah MNYF hruaituten an duh angin Polytechnic Building-a kuhva dah khawm mekte pawh kawngkhar hawngin an en fiah a ni.

   Kolasib DC Conference Hall-ah Kolasib DC Robert C. Lalhmangaiha hovin meeting neih leh a ni a. Hetah hian MNYF hruaitute chuan kuhva tihral chungchanga zawhna an neihte zawtin, Kolasib Bawrhsap chuan a hmalak dan a chin chhuakin a hrilh a. Kuhva ro chu DC-in khapna thuchhuah (Prohibitory Order) a tihchhuah hmanga man a nih dan te, District Court-in District Magistrate hnenah kuhva man sate tihral (dispose) tura thuneihna a pek anga tihral a nih thu leh, tihralna tura kalphung tha bera a hriat angin District Magistrate-in hma a lak dan te sawi fiah a ni.

Lengpui Airport venhim hna CISF kutah hlan

Aizawl : Lengpui Airport venhim hna chu 24.04.2025 khan Mizoram DGP Anil Shukla chuan CISF (Central Industrial Security Force) kutah a hlan. Kum 1999 atang khan Lengpui Airport venhim hna hi Mizoram State Police leh Central Reserve Police Force (CRPF) te’n an lo kalpui char char a ni.

   Tunah hian Lengpui Airport ah CISF personnel 121 an duty dawn a ni.

CM leh DoNER Minister-in state action plan review meeting nei

Aizawl : April 23, 2025 khan Ministry of DoNER kaltlanga Mizoram sawrkarin hmasawnna hna a thawh te thlirletna, state action plan review meeting video conference Chief Minister Lalduhoma leh Jyotiraditya M Scindia, DoNER Minister ten an nei.

   Meeting ah hian Review Meeting hnuhnung bera an lo sawi tawh, Mizoram sawrkarin a bawhzui ngai la awm te an sawi hmasa a, chumi hnuah hmachhawp la awm te sawiho leh a ni. Lalmalsawma Pachuau, Secretary, Planning chuan Mizoram Vision 2047 statement sawifiahna (presentation) a nei bawk.

MAL Book of the year 2024 lawmman hlan

Aizawl : April 23, 2025 khan I &PR Auditorium-ah Land Revenue and Settlement Department changtu Minister B. Lalchhanzova chuan Mizo Academy of Letters (MAL) in kum 2024 chhunga lehkhabu tha bera an thlan 'Book of the year 2024' lawmman chu 'Hun inher kara Zofate' tih ziaktu F. Vanlalrochana hnenah a hlan.

   MAL hian kumtin, an pawl din cham, William Shakespeare-a birthday April ni 23-ah Book of the year lawmman hi an hlan thin a. Kumin hi Book of the year 36 thlanna niin, mi 30 in an dawng tawh a. Mi panga - B. Lalthangliana, C. Laizawna, Lalhriata, C. Lalnunchanga leh Lalhruaitluanga Chawngte te chuan tum hnih an dawng tawh a ni. Hmeichhia panga - Lalsangzuali Sailo, H. Lalngurliani, Romuanpuii Zadeng, Zohmangaihi leh Ahmangaihi Khiangte ten BoY hi an dawng tawh bawk.

Larsap-in Agriculture leh Horticulture hotute kawm

Aizawl : Mizoram Larsap General (Dr) Vijay Kumar Singh, PVSM, AVSM, YSM (Retd) chuan April 23, 2025 khan Mizoram Sawrkar hnuaia Agriculture leh Horticulture Department hotute chu Raj Bhavan-ah a kawm a. He hunah hian Sustainable Agriculture a awm theih nana pawimawh leh Department pahnihte hmalakna a sawipui a ni.

   He hunah hian Agriculture Department leh Horticulture Department hnuaia Scheme hrang hrang hnuaia hmalakte thlir ho a ni a. Organic state ni thei tura pawimawhte sawiho niin, thlai hrisel tam zawk thar kawnga hmalak tulte bakah a sawngbawlna kawnga tanlak ngaihna laite sawiho a ni a. Organic certification nei tur leh, a nei tawhte tinung thar leh tura senso ngai tam thin lutuk sutkian nan State Certification Body neih a tul thute, Sawrkar laipui duhdan anga Cluster based farming leh lei titha leh tura hamlaknate sawiho a ni.

CM-in Brahmaputra Board Chairman kawm

Aizawl : April 23, 2025 khan Chief Minister Lalduhoma chuan a office ah Brahmaputra Board Chairman Dr. Ranbir Singh, chu a kawm a. Mizorama an hmalaknate a sawipui.

   Lalduhoma hian Board-in an mamawh an sawi te chu a theih anga a lo ngaihvensak tur thu a hrilh a. Central sawrkar Flood Bank Management fund an hmuh ve theih nan, a tul angin dan te pawh siam an tum ang a. Lui leh tuihna venhimna lam hna te, eilung luangral zel tur venna lama hma in laknaah te thawhpui turin an inpeih reng a ni, a ti.

Home minister-in Central Jail tlawh

Aizawl : Home Minister K.Sapdanga chuan April 22, 2025 khan Central Jail a tlawh a. IG Prison R.Vanlalsawta, Special Superintendent Laldingliana Chinzah leh Jail staff ten an lo dawngsawng.

   Home Minster hian Central Jail chhunga Ward hrang hrang bakah workshop, ICTC, Library, Hall etc. te a fang chhuak vek a. Central Jail-a cheng nuai 90.23 senga Ward sak thar(C Ward), tang (prisoners) 70 vel awm theihna tur chu a hawng nghal bawk.

   Central Jail a tlawh zawh hnuah hian Home Minister chuan hmeichhe Jail (Central Women’s Jail), Central Jail bula mi chu tlawh lehin, Ward hrang hrang a fang leh bawk a ni.

MSSC Golden Jubille hawnna nei

Aizawl : Mizoram State Sports Council (MSSC) kum 50-na Golden Jubilee lawmna kum khat chhung awh tur hawnna inkhawm chu April 22, 2025 khan Vaivakawn Cultural Centre & Auditorium-ah neih a ni a, MSSC President hmasa ber, Dr. H. Thansanga, ex-minister chuan khuallian niin Golden Jubilee lawmna hi a hawng a ni.

   Mizoram State Sports Council (MSSC) hi April ni 20, 1976 khan Executive Order hmanga din a ni a, The Mizoram State Sports Council Act, 2002 hmangin inrelbawlna leh kalphung mumal zawka tihchangtlun a ni. Tun dinhmunah MSSC hnuaiah hian State level Sports Association 34 an inziaklut a, Jubilee pual hian kum khat chhungin Sports Association tin hian Mizoram pum huap tournament pakhat theuh an buatsaih dawn a, hemi atan hian calendar mumal tak siam a ni tawh a ni.

Aizawl Bawrhsap kum 135 tlin lawm

Aizawl : 22.04.2025 khan Aizawl Bawrhsap Er. Lalhriatpuia hovin Aizawl Bawrhsap Pisapui kum 135 tlin lawmna leh hriatrengna lunphum khuhhawnna neih a ni.

   DC chuan bawrhsap office in kum 135 hmel a hmu ta chu lawmawm a tih thu sawiin, Aizawl bawrhsap pisa chu Aizawl history ah pawh hmun langsar tak chang ve tu a nih dan a sawi a. Kum 135 na lawm a nih hian he pisa a lo thawk tawh thin te hre reng chungin, mipui rawngbawl hna pawimawh tak chu he pisa a thawk mek leh la thawk tur ten an chhunzawm zel a duhthu a sawi bawk.