Hmun hnih-ah ruihlo thahnem tak man

Aizawl : Mizoram Police ten theihtawpin hma an la zel a, 18.08.2025 leh 17.08.2025 zan khan hmu8n hnih-ah ruihlo thahnem tak an man

  Dt. 18.08.2025 khan Special Narcotics Police Station (CID Crime) leh 225 Battalion CRPF, Aizawl te chuan Muallungthu leh Hualngohmun khuaah joint operation neiin lirthei pakhat atangin Methamphetamine Kg. 7.955 a rit, Rs. 1,03,41,500 man hu an man. Mi pahnih, Shanti Jeeban Chakma (30) s/o Vinanda Chakma, Ulusury, Lawngtlai District, tuna Hunthar Veng, Aizawla khawsa mek nia inchhal leh Brighu Dhan Chakma (31) s/o Rivodi Kumar, Marpara, Mamit District, tuna Devasora, Lunglei District a cheng nia inchhal chu hemi kaihhnawihah hian man an ni. 

  17.08.2025 zan khan, Champhai police hnuaia Hnahlan Beat Post te chuan lirthei pakhat, EECO Van (Reg. No. MZ-01-Z-6975), Hnahlan khaw dai kawng sira inhung chu enfiah tura an pan laiin a khalhtu chu ramhnuai lamah a tlanchhia a, umzui ni mah se thimthamah an man nghal thei ta lo a ni. Uluk taka lirthei hi enfiah a nih hnuah lirtheiah hian Heroin gram 240 (Hawng 23) Rs. 17,20,000/- man hu, thiam taka Crispy Wafer packet chhunga thuhruk man chhuah a ni bawk

Chhun pachangah Pitar rawng takin that

Aizawl: Maubawk Veng, Aizawlah hmeichhia kum 80 mi chu August 19, 2025 chhun khan rawng taka thah a ni.

  ZALEN thudawn daninchhun dar 12:30 bawr vel khan Runliani (Luti), 80 W/o Lalsanga (L), Maubawk Kawn veng chu an chenna in chhungah rawng taka thah a ni a, a hrawkah chema zaina hnuhma hmuh a ni.

  Vanduaina tawk a boral Runliani te hi dawrkai niin, a fanu leh a tupa nen a khawsa niin, an inhnuaiah a fapa a cheng bawk a, an chenna in piahah huan an nei a, huana a fanu a kal hlanin he tualthahna hi a thlang ta a ni

  He thil thleng hi tlangval pakhat kuhva lei turin a hmu a, a hmuh lai hian Runliani hi chhuatah awmin, puan a khuhin hmuh a ni.

CEIR hmanga Phone bo hmuhlet pe

Aizawl : August 18, 2025 khan Bawngkawn Police Station OC Room-ah CEIR hmanga Mobile Phone bo an chhui an hmuhlet 31 te chu a neitute hnenah an hlan.

  He hun hi Bawngkawn PS SDPO chuan a kaihhruai a, Phone bo an hmuhlet te hi 28.7.25 atanga 17.8.25 inkar chhunga CEIR hmanga Mobile Phone an hmuhlet 31 te chu a neitute hnenah pek chhuah a ni a, CEIR hmang hian Mobile Phone bo 200 an hmu let tawh a ni.

Bike hung tha tur chesualin a thi

Aizawl : Serchhip P&E veng tlangval kum 23 mi chu a bike hung tha tur chesualin a thi.

  ZALEN thudawn danin, B Vanlaldika (23), Serchhip P&E veng chu August 17 zan khan a thianpa thihna-ah kalin, chumi a haw lam chu an in bula a bike hung tha tur chesual palhin a hmunah a thi a ni.

  B Vanlaldika hi a bike hian a nghawngah a delh a, tukin khan bawlhlawh paih tur ten an hmu. A ruang hi August 18, 2025 khan bui a ni.

Doctor ten lung natna chungchang zirhona nei

Aizawl : Mizoram Health Systems Strengthening Project (MHSSP) hmalakna in doctor hmun hrang hranga thawkte tan lung natna chi hrang hrang hriat chhuah hma dan, inven dan leh enkawl dan chungchang training ni 2 chhung awh August 21 & 22, 2025 khan Civil hospital Aizawl ah neih a ni. 

  Cardiology Department, Civil Hospital Aizawl a lung natna lama thiam bik Dr. Loncy V. Lalzarliana, Dr. Mary C. Lalnuntluangi leh Dr. Isak Lallawmkima ten zirtirna an pe. He training hawnna-ah hian Dr. Lily Chhakchhuak, Mission Director NHM/Project Director, MHSSP in hmanpuiin kalkhawmte lawmna thu a sawi a. 

  Dr Lily Chhakchhuak chuan hriselna lama thawktu te tan inzirbelh zel a pawimawh zia sawiin, MHSSP in doctor leh nurse te thiamna tahhriam kawngah hmalakna nasa tak an nei hi lawmm a tih thu sawiin mobile application CKSI app hmanga mahni awmhmun theuha an inzirna tur siam anih bakah an thiamna tih ngheh zual nan practical training “Skill workshop” buatsaih thin a ni tih a sawi bawk.

Grassroots Sports Development Programme (GSDP) hawng

Aizawl : Sports & Youth Services Minister, Mizoram State Sports Council (MSSC) President ni bawk Lalnghinglova Hmar chuan August 21, 2025 khan Ramhlun Indoor stadium-ah Grassroots Sports Development Programme (GSDP) a hawng.

  GSDP hnuaia Sports Discipline thlan dan hi Olympic Vision Sports leh Popular Sports en kawp chunga thlan a ni a. Kum 2025-2026 chhungina hnuaia tarlan Sports discipline pakua (9)-ah hian hma lak a ni ang.

  Archery, Badminton, Boxing, Football, Hockey, Judo, Taekwondo, Weightlifting leh Wrestling Mizoram hmun hrangah Centre 46 ruahman a ni a, heng center thlanna ah hian State Level Sports Association te rawn niin, anni’n Talent awmna ni a an hriat khuaah Center te hi dah a ni. Center tin te hian sawrkar sikul nghen chhan nei zel tur a ruahman a ni.

Mahni kutkawiha engzawngte tan training buatsaih

Aizawl : Commerce and Industries Department buatsaihin 20.08.2025 khan “Workshop on Promotion, Development and Empowerment of MSME’s in Mizoram” chu Dawrpui Multipurpose Hall-ah neih a ni. 

  Workshop-ah hian Chief Secretary Khilli Ram Meena chu chairman niin, Sawrkar laipuia Ministry of MSME Secretary S.C.L. Das chu co-chairman a ni.

  He workshop hi mahni kutkawiha micro, small & medium enterprises din a eizawngtute tan Ministry of MSME hnuaia scheme hrang hrangte inhrilhriatna leh sawihona a ni a. Entrepreneur mi 70 bawr vel an tel a ni.

  Chief Secretary Khilli Ram Meena chuan vawiin workshop atang hian sorkar laipuiin state a ngaihsakna a lan thu sawiin, hun kal zel turah pawh nasa zawka mipui eizawnna kawnga thiamna inpek leh inpuih a tulna dangahte pawh sawrkar laipuiin state-te a kaihhruai zui zel a beisei thu a sawi

Residential Foundation Training hawng

Aizawl: Department of Personnel & Administrative Reforms (DP&AR) Minister K. Sapdanga chuan August 19, 2025 khan Administrative Training Institute (ATI) Hall No. III-ah 2025 Batch Combined Civil Service Officer mi 34-te tana Residential Foundation Training buatsaih hawnna hun chu khuallian niin a hawng.

  Khuallian K. Sapdanga chuan officer trainee-te'n trainer tha tak tak hnuaia training an nei thei tur chu a lawmpui thu sawiin, an thil zir hmang tangkai tur leh zawhna zawt tam turin a chah a. Minister chuan ram banpui, sawrkar za pui, sawrkar chelh dingtu tur an nih thu a sawi a. Hotute hmaah pawh thu dik tan ngam tur leh ram siamthatna kawngro sutu tur an ni tih hre reng turin a fuih a. Ram tana officer tangkai an nih ngei theih nan Foundational Training chu a hawng a ni.

Health Minister-in Health ATM hmasaber hawng

Aizawl : Mizorama Health ATM hmasa ber, Lunglei District Administration hma lakna, "Healthy Lunglei Initiative" hnuaia Civil Hospital Lunglei leh Primary Health Centre (PHC) Lungsena khawl bun thar chu August 18, 2025 khan Mizoram Sawrkara Health & Family Welfare Minister Lalrinpuii'n a hawng.

  Health ATM thar hawntu Health Minister Lalrinpuii chuan Mizorama Health ATM hmasa ber hawngtu a ni chu vannei a intih thu sawiin, Lunglei District mai ni lo, Mizoram State pum pui tan he hun hi hun ropui leh chhinchhiah tlak tak a ni, a ti. 

  Health ATM-ah hian test chi hrang hrang 35 vel tih theihin, taksa nihphung tlangpui, zunthlum, thisensang, lung lam, beng, mit leh rilru lam dinhmun te a endik theih dawn a. Hriselna atana ei leh in fimkhur dan tur thurawn te pawh a awm bawk a. Test hrang hrang hi a thlawn veka tih theih niin, darkar chanve tling lova tih zawh vek theih a nih bakah, test result hi mahni phone-ah a dawn nghal theih bawk.

Smart Class room hawnna hun hmang

Aizawl: School Education Minister Dr Vanlalthlana hovin August 18, 2025 kha Conference Hall, School Education Complex-ah Smart Class room hawnna hun hman a ni.

  School Education Minister Dr Vanlalthlana chuan thusawiin HDFC ten CSR Scheme hnuaiah Smart classroom 36 lai neih belhna tur an pe chu lawmawm a tih thu a sawi a, tunah hian hmalakna dangah smart classroom 220 atan tender chhuah a ni a ti. 

  HDFC hian India ram pumah Branch 9499 a nei mek a, Mizoramah hian Branch 11 an nei a, Aizawl-ah Branch 5, Lunglei, Serchhip, Lawngtlai, Siaha, Kolasib leh Champhai-ah te Branch pakhat theuh an nei tih a sawi a, HDFC ten CSR scheme hnuaiah hmasawnna programme an kalpui zingah chuan tuna smart classroom hi education lama hmalakna a ni.

World Photography Day vawi 186-na puala Photo Exhibition hawng

Aizawl : World Photography Day vawi 186-na pualin Mizoram School of Photography leh Photography Club of Mizoram tangkawpin an buatsaih Photo Art Exhibition & Competition vawi 9-na chu August 19, 2025 khan Archives Hall, Babutlang chu Aizawl South II bialtu Baryl Vanneihsangi'n a hawng.

  Photo Exhibition hian ni 5 chhung a awh a, August ni 23, Inrinni ah khar a ni.

  Photo Exhibition & Competition hi a duh apiang tana tel theih niin Thupui thlan bik a awmlo a, thlalak 108 a lut a, mi 49 telin result puan nghal a ni. Kum 2017 atang khan kumtin Photo Exhibition & Competition hi anmahni sum sengin Club member ten pawisa an thawhkhawm leh Entry fee lut atanga buatsaih thin a ni.

CM leh UD&PA minister hovin Project Readiness sawihona nei

Aizawl: August 18, 2025 khan Chief Minister Lalduhoma hovin a office-ah Aizawl Sustainable Urban Transport Project (ASUTP), Project Readiness sawihona neih a ni a. UD&PA Minister K. Sapdanga leh official pawimawhte an tel.

  K. Sapdanga chuan thuhma sawiin, Aizawl khawpui zau chho zel mila khawpui chhung inkalpawhna tur ruahmanna an siam dan a tarlang a. A senso hi Asian Development Bank loan tinzawn niin, state sawrkar tana hautak lutuk lo tura duan a ni, a ti.

  Lalmalsawma Pachuau, Secretary, UD & PA chuan ruahmanna an siam tlangpuite a tarlang a. Lengpui Airport huamin, Aizawl tlak lam pangah mihring chenna a zau thla zel tura ngaiin, Muallungthu atanga Sihphir huama khawpui inkalpawhna (Urban Mobility) an ruahman te, Kulikawn leh Bawngkawn inkar corridor leh Junction tihhmasawnna te, Temple atanga Vaivakawn kawngpui leh a chhehvel tihhmasawn leh junction siam that te, Aizawl tawntirh hmun pathuma Truck, Bus leh Maxi Cab terminal lian siam te, kawngpui thlan bik pahniha EV Bus tlantir a, chung bus te chawmtu tur EV feeder Bus khawpui chhung kawng thlan bika tlantir te a tel.