Cheng Vbc. 1.30 hu rangkachak tlang 10

Aizawl: D. Lalrinsanga Fanai, Aizawl nia tarlan kut atangin January 28, 2028 khan Rs. Vbc. 1.30 hu rangkachak tlang 10 an man.

  Rangkachak man tu te hi Badarpur Railway police te niin, nimin khan Mizoram atanga rel service-ah dan lova rangkachak tawlhrukna a awm tih thu an dawn bawhzuiin endikna an kalpui a, rangkachak hi an man ta a ni.

  Rangkachak an man te hi a vaiin tlang 10 niin, kg.1.650 a ni a, heng rangkachak te hi Guwahati panpui tum nia hriat a ni.

Heroin gram 193 leh a neitu a puh man

Aizawl: Excise & Narcotics Department leh Central Anti Drugs Squad (CADS) te thawk dun chuan January ni 26, 2026 khan Heroin gram 193 an man.

  January ni 26, 2026, chawhnu dar 2:15 khan Mizoram Excise & Narcotics Department leh Central Anti Drugs Squad (CADS) te thawk dun chuan Zemabawk Berawlui Tawngtai Mual thlangah Heroin gram 193 an man. 

  Heroin neitu nia puh mi pathum te hi Lallianmawia (37) S/o Tuanliana, Champhai Kanan, Nikang Venga khawsa nia inchhal; Vanbiakhnemi (49) W/o Lallianmawia,Champhai Kanan, Nikang Venga khawsa nia inchhal leh Zarzoliana @ Gosa (31) S/o Chungnunga (L), Thuampui Camp Veng-a khawsa nia inchhal te chu an man a. Ruihhlo phurhna atana hman SML Truck pawh hrensak nghal an ni.

Aizawl to Sairang four lane siam a tul thu thlen

Aizawl: Mizoram Rajya Sabha MP K. Vanlalvena chuan Sairang Rel Station atanga Mizoram chhim tawp Myanmar ramri thlenga rel kawng sialna tur zirchianna hmasa Preliminary Survey zawh a nih tawh thu January 27, 2026 khan sawiin, he rel kawng sialna tur pawisa chu kumin Union Budget ah hian dah nghal a tul thu a sawi chhuak.

  MP chuan Sairang rel kawng thar hi nikum ah Prime Minister-in a hawng tih a sawi a, 'Sairang rel station chu Aizawl atanga Lengpui Airport panna kawngpui sira awm a nih avang leh rel station thar a awm avangin motor kawng a lun thar hle a. Tuna kawngpui awm sa Aizawl leh Sairang inkar motor kawng chu a zau tawk tawh lo a, rang thei ang bera Sairang rel station leh Aizawl khawpui inkar chu Four Lane kawnga siam a tul a ni,' tiin a sawi. Kumin 2026-27 Union Budgetah dah nghal a tul thu a sawi bawk.

CYMA tana sum dah a nih dan hrilh

Aizawl: Ministry of Home Affairs (MHA) Office, Kartavya Bhavan, New Delhi ah Union Home Secretary hovin MHA Official te leh Central YMA hruaitute chu January 28, 2026 khan an thukhawm a, YMA motor leina tur te, ruihhlo dona kawnga inzirtirna atana hman tur sum leh YMA Conference centre sakna tur sum dah a nih dan te an lo hrilh. 

  Meeting a tel tur hian MHA hian Central YMA hruaitute (Office Bearer) 4 an sawm a, President R. Lalngheta hovin Vice President Prof. Lalnuntluanga, Gen. Secretary Prof. Malsawmliana leh Treasurer Er. H. Duhkima te an kal. Union Home Secretary hova meeting ah hian MHA Official bakah IB hotute, Assam Rifles hotute leh BSF hotute an tel a; Mizoram Chief Secretary Khilli Ram Meena a tel bawk. 

  Meeting-ah hian Central YMA hnena NCB kaltlanga motor leina tur sum Rs. 88,95,675/- ruahman a nih tawh dan te, ruihhlo dona kawnga inzirtirna lama hmalakna tur Cheng vaiblechhe 2.3 ruahman a nih tawh thu te; Thingsulthliah rama YMA Conference Centre sakna tura Cheng vaibelchhe 99.7 dah a nih tawh thu te an lo hrilh.

Hmeichhia kum 46 mi misual kut tuara thi ni ngeiah ngai

Aizawl: Ramhlun Sports Complex MHIP chuan an member Lalnuniangi (46) chu misual kuttuarin a thi ni ngeiah an ngai.

  26.1.26-a thuchhuah an siamah Ramhlun Sports Comolex MHIP chuan an member, Lalnuniangi w/o Lalmawia Kaipeng chu ni 22.1.2026 (Ningani) khan Lengte rama an thlamah a taksa pawh hmuh tlak awm lo khawpa kang chhiain hmuh a ni tih an tarlang a, thihna a tawk chu pawi an tiin an rilru a na tak zet tih an tarlang.

  "Misual kut tuar ngei ni-a a lan avangin pawikhawitu hi man chhuah ngei a nih theih nan thuneitu lam pawhin a tawp thlenga theih tawp min chhuahsak zel turin kan beisei bawk a ni," tiin an thuchhuahah chuan an tarlang.

Republic Day vawi 77-na urhsun taka lawm a ni

Aizawl: India ramin a puala Danpui (Constitution) a hman tanna ni, Republic Day 2026 chu India ram hmun dangte rualin January 26 khan Mizoram hmun hrang hrangah urhsun taka lawm a ni a. Mizorama Republic Day vawi 77-na lawmna programme pui ber chu Aizawl Lammual-ah neih a ni.

  Aizawl-ah hian Larsap General (Dr) Vijay Kumar Singh, PVSM, AVSM, YSM (Retd) chuan India hnam puanzar pawt pharhin parade contingent te'n hnam puanzar zahna chibai an buk chu a chhanglet a. Hemi hnu hian Republic Day puala thuchah a sawi a, Police, Fire & Emergency Services leh Mizoram Home Guard & Civil Defence hnathawk tha leh khawpui fai intihsiakna lawmman Larsap hian chawimawina a hlan a ni.

  Republic Day vawi 77-na lawmna hunah hian parade contingent 24; Armed Contingent 6-ah 34 Assam Rifles, 1st Bn MAP leh 5th IR Bn te chuan parade thiam lawmman pakhatna, pahnihna leh pathumna an la a. Unarmed Category-ah Ex-Servicemen, 20 Mizo Bn NCC leh Govt. Chanmari Model Middle School Scouts & Guides te chuan parade thiam lawmman lain, School contingent-ah St. Paul's HSS, Govt. Mizo High School leh PES Republic Veng te chuan lawmman an la bawk.

Buyer Seller Meet 2026 hmang

Aizawl: Mizoram Agricultural Marketing (MAMB), International Fund for Agricultural Development (IFAD) leh Mission Organic Mizoram (MOM) tangkawp chuan January 29, 2026 khan ‘Private sector round table on Mizo Ginger cum Buyer Seller Meet 2026’ chu Aijal Club-ah an buatsaih a. Horticulture Department Minister C. Lalsawivunga chuan khuallian niin a hmanpui.

  Buyer Seller Meet-ah hian thawhhona thuthlung pahnih ziah a ni a. Chungte chu –

1. Ropuiliani Farmers Producers Company leh Kisaansay te inkarah Agreement

2. IRMA Iseed leh Mizoram Startup Mission-te inkarah MoU

  India ram hmun hrang hrang atangin Investors leh Buyers lian tak takte sawm luh an ni a. Anni hian Mizoram sawrkar nena kan thlai tharte leh prcessed food-te lei leh hralh kawnga thawhho theih dan kawng hrang hrang rawtna an rawn thlen a. Mizorama entrepreneur - Zozik, Bio Farm, C Breeze, Tuibawn leh Lawm from the Hills-te nen pawh thawhho theih dan tur sawiho a ni a. B2B session-ah Buyer leh Seller-te dawhkan khat kila in kawmna hun neih a ni bawk.

Larsap-in SSU Ruby Jubilee leh Gen. Assembly hmanpui

Aizawl: Mizoram Larsap General (Dr) Vijay Kumar Singh, PVSM, AVSM, YSM (Retd) chuan January 29, 2026 khan Students' Self Support Union buatsaih 39th General Assembly cum Ruby Jubilee lawmna Vanapa Hall-a neih chu khuallian niin a hmanpui a, ruby jubilee puala buatsaih lungphum a hawng nghal bawk.

  SSU hi May ni 27, 1985 khan Hrangbana College, Aizawlah din niin, thupui atan 'Zirna atana mahni intodelh' tih leh 'Kuthnathawh chawisan' tih an hmang a ni.

Chin-Lushai Conference vawi 134-na

Aizawl: Mizoram State Legislative Assembly Speaker Lalbiakzama chuan vawiin khan Zo Re-unification Organisation (ZORO) buatsaih Chin-Lushai Conference vawi 134-na chu Lal Thanhawla Auditorium-ah khuallian niin a hmanpui.

  Lalbiakzama chuan thu sawiin, Zofate rorelna pakhat hnuaia an awm theihna tura ZORO-te’n 1988 atanga an beihna chu ropui a tih thu leh tharum thawh lova an movement kalpui mek chu chhunzawm zel turin a fuih. 

  Zofate awptu Sap hovin Chin Lushai Conference, January ni 29, 1892-a Zofate rorelna pakhat hnuaia awmtir tura an lo rel tawh tihhlawhtlin a nih tak loh a ni a, Chin-Lushai Conference vawi 134-naah hian thupui atan ‘Inpumkhatna’ tih hman a ni a. Zing lam hun chu President R. Sangkawia chuan kaihruaiin, Vice President L. Ramdinliana Renthlei'n ZORO hmalaknate a tarlang a. MZP President Dr. C. Lalremruata leh MSU President Lalkhawngaihzuala te’n thu an sawi bawk.

  Chawhnu lamah thupui sawihona Adviser to CM Lalmuanpuia Punte, MLA-in a sawi hawng a. Gen. Secretary Tv. Lalnunfela Chawngthu atangin UNO Report ngaihthlak niin, Vice President Rorelliana chuan lawmthu sawiin hun a khar a ni.

NCC Mizoram Group Headquarters hawng

Aizawl : Chief Minister Lalduhoma chuan January 29, 2026 khan a office-ah National Cadet Corps, Mizoram Group Headquarters chu official-a hawnna a nei a. Assam state atanga awp thin NCC Mizoram chuan ama pualin Group Headquarters a nei tawh dawn a ni.

  Sports & Youth Services Minister Lalnghinglova Hmar, chuan hawnn hi a telpui a, hawnna hun hman zawhah Chief Minister hian Minister te, Maj Gen Anurag Vij, ADG, NER leh Brig GS Arora, Commander, Group Hq, Aizawl te nena inkawmna an nei zui a. NCC Hotute chuan an awmna hmunhma tur an sawiho nghal a, state sawrkarin an awmna tur ram a pek theih chuan an hmunhma chu an insak theih thu an sawi a. Ram pawh hi neih hlen tura inpek a ngai lova, luah hawh mai tur chi a ni, an ti.

  Tunah hian Mizoramah NCC unit pali, cadets 8000 vel an awm mek a. Group Headquarters nena an awm chuan an ti lian chho zel dawn a ni.

MJA lungawih lohna chungchangah official te ko

Aizawl: Home Minister K.Sapdanga leh I&PR Minister B. Lalchhanzova te chuan January 28, 2026 khan Home Minister Office Chamber-ah Kum 2026 Republic Day lawmna inkhawma chanchinbumite lungawilohna te bawhzuiin Republic Day Organising Department zinga mawhphurhna pawimawh latute Aizawl Deputy Commissioner Office, State Protocol Office leh Directorate of Information & Public Relations hotute an kawm.

  He hunah hian IPRP&S Secretary Betsy Zothanpari Sailo, Aizawl Bawrhsap Er. Lalhriatpuia, State Protocol Officer Lalmuansanga Ralte, DIPR Joint Director pahnih – Mina Zoliani Joute leh Malsawmsanga, DIPR Deputy Director Andrew H. Lalremruata te an tel a ni.

  Thutkhawmah hian sawihona neih a ni a, Aizawl DC kaihhruaina hnuaiah Protocol Office leh Directorate of Information & Public Relations ten hun remchang hmasa berah MJA hruaitute kawma sawihona neih tha an ti a, Republic Day leh Independence Day-ah Media enclosure siam ziah tawh nise an ti bawk a, sawmna semchhuah chungchangah pawh fimkhur lehzuala kalpui nise an ti bawk.

Mizoram Bana Kaih Venture Capital Fund leh Startup Readiness Level of Mizoram tlangzarh

Aizawl : Planning & Programme Implementation hnuaia Mizoram Startup Mission leh Department for Promotion of Industry and Internal Trade (DPIIT) bultumin January 28, 2026 khan National Startup Day Mizoram Edition lawmna Aijal Club-a buatsaih a ni.

  He hunah hian Chief Minister Lalduhoma chuan Mizoram Bana Kaih Venture Capital Fund leh Startup Readiness Level of Mizoram a tlangzarh. Dr. Vanlalthlana, Minister, H&TE ; F. Rodingliana, C&I Minister leh Lalnghinglova Hmar, Minister, LESDE ten an telpui.

  Bana Kaih Venture Capital-ah hian target ah 100 Cr. dah a ni a, sorkarin Bana Kaih atangin Rs. 20 Cr. a pe (tiam) a. A dang chu kawng dang atanga hmuh tum a ni. Pool fund a nih angin Security Exchane Board of India (SEBI) ah trust registration neih a ngai a, Senhri Investment Fund tia register neih a ni. SEBI hnuaia register a nih angin India ram ngaihtuah chunga kalpui a tul a, a tum bul ber chu Mizoram entrepenuer-ten bul an tan nan emaw hma an sawn zelna tura hma an lakna tur sum, dan ang thlapa tumpui a ni.

Fur hma-in Sairang leh Khamrang kawng siam tha turin ngiat

Aizawl: Defence Minister Rajnath Singh hovin Lok Sabha leh Rajya Sabha Political Parties Floor Leaders ten Parliament Budget Session inpuahchahna atan January 27, 2026 khan meeting an nei a, he hunah hian Mizoram Lok Sabha MP Richard Vanlalhmangaiha chuan fur hmaa kawng siam tha tuin sawrkar laipui a ngiat

  Meeting-ah hian sawm a nih angin ZPM Lok Sabha Leader Richard Vanlalhmangaihahi a tel a, Mizoram MP hian kumin fur ruahtui a tlak tak tak hmaa Sairang leh Khamrang kawng te tha taka siam vat vat a nih theih nan sawrkar laipui chu chak lehzuala hma la turin a ngiat thu a sawi. Kuminah hian nikum lama Mizoramin harsatna nasa tak a lo tawh ang a thlen tawh lohna turin sawrkar laipui chu rang taka hma la turin a ngên a ni.

National medalist te lawmpuina hun hmang

Aizawl: Sports & Youth Services Minister Lalnghinglova Hmar chuan January 27, 2026 khan tunhnaia India rampum huap inelna a medal la infiammite lawmpuina hun a hmanpui.

  He lawmpuina hunah hian nikum October 31 leh November 1 chhunga Bhopal, Madhya Pradesh a neih 34th All India GV Mavlankar Shooting Championship a 25m Centre Fire Pistol (Sr. Master Men Category) a gold medal la Lallianmawia, IPS (Rtd.), nikum November 16-20 chhunga Hyderabad a National Sub-Junior Judo Championship 57 kg category) a silver medal la Vanlalramdinpuii leh November leh December a UTT National Ranking Table Tennis Championships, Indore leh Ranchi a neihah te bronze medal la ve ve thei Jeho Hlimnakulhpuingheta te hnenah lawmpuina thilpek hlan a ni.

CSR Matchmaking portal Mizoram CSR Connect hawng

Aizawl: Chief Minister Lalduhoma chuan january 27, 2026 khan Aijal Club, McCabe Hall-ah Mizoram CSR Cell, Planning & Programme Implementation leh UNDP India tangkawpin an siam, CSR diltu leh a petute inzawnna tur leh inthlunzawmna tur (CSR Matchmaking portal) Mizoram CSR Connect chu a hawng. 

  Chief Minister chuan, Mizoram CSR Connect a puitlin theih nana thawktu UNDP India, Planning & Programme Implementation leh CSR Cell te chungah lawmthu a sawi a. Kum 2023-24 CSR data atanga a lan danin Mizoram chuan India rama CSR hman chhuah zawng zawng 0.06% chauh a hmu a. CSR hmangin hmasawnna hna lian leh tangkai tak tak a thawh theih avangin kum 2024 June thla khan Chief Minister Office-ah CSR Cell kan din ta a ni. An hmalakna zarah a petute leh a diltute inzawnna Matchmaking Portal - Mizoram CSR Connect hi kan lo hawng thei ta a ni. He portal hian CSR lamah awlsamna tam tak min thlen kan beisei a, a petute tan pawha langtlang taka CSR kalpui a nihzia hriatna a ni dawn a ni, a ti.