Rev. Dr. H Killuaia a liam ta

Aizawl : Baptist Church of Mizoram (BCM) pastor Rev. Dr. H. Killuaia (87) chu July 11, 2025 zing khan Trinity hospital, Aizawl-ah a thi.

  Rev. Dr. H Killuaia h/o Chhunkimi, Lunglei Chanmari hi June ni 13, 2025 khan Lunglei atangin helicopter-in Aizawl thlenpui a ni a, natna dang a lo fawmkem deuh a, pneumonia, chuapa tuitling siak chhuah ngaite a ni.

  Rev. Dr. H Killuaia hi thusawi a thiam piah lamah, ziakmi leh hla phuah mi a ni bawk a, lehkhabu 33 a ziah tawh bakah hla 84 a phuah tawh.

MZI-in missionary damlo 4 an kan

Aizawl : Mizo Zaimi Inzawmkhawm (MZI)-in Missionary damlo pual charity concert-a mipui sum thawh tlingkhawm atangin July 10, 2025 khan Missionry damlo an kan a, damlo 4 an kan a ni. 

  MZI hian May ni 8, 2025 zan khan Missionary damlo puih ngai te pualin charity concert hi an buatsaih a. hemi tuma mithahnemngai te sum thawh tlingkhawm Rs. 1,04,351 atangin kohhran hrang hrang mission field hrang hranga missionary damlo 4 an kan a ni.

  July ni 18, 2025 zanah Cancer, inenkawlna tura sum harsatna nei te tana luangchhuak duh tan remchang siam leh turin charity concert an buatsaih leh dawn bawk. 

CYMA-in ruahsur nasa vanga chhiattawk tanpui

Aizawl : Central YMA chuan tunhnaia ruah sur nasa avanga Mizoram hmun hrang hranga chhiattawk te tanpuina July 10, 2025 khana sem chhuak. Branch, Group leh Sub- Hqrs hrang hrang atanga report lut khawm atangin hetiang hian tanpuina hi sem chhuah a ni: 

1. Mitthi 5 hnenah Rs.35,000/- zel : Rs. 1,75,000/-

2. Leimin-in a hnawl In chhe vek 28 te Rs.20,000/- zelin : Rs.5,60,000/-

3. In thiah leh tlu chhe mai thei dinhmuna ding 51 te Rs.10,000/- : Rs.5,10,000/-

4. Saichal YMA Library min leh Bungtkang West ‘YMA Run’ chhia - Rs. 31,000 ve ve : Rs. 62,000/-

A vaiin : Rs. 13,07,000/-

  Heng tanpuinate hi Branch, Group leh Sub- Hqrs. kaltlangin pek chhuah an ni. Central YMA chuan tanpuina atana thawhlawm thawhtu zawng zawngte chungah lawmthu a sawi.

Current man vangin kum 45 mi thi

Aizawl : July 8, 2025 zan dar 9:30 khan VB Ngachhi Syhly (45) Khopai khúa, Siaha District ami chu current man vangin a thi. 

  ZALEN thudawn danin VB Ngachhi Syhly te inchungah hian electric hruipui a kal a, he electric hrui chat hian an bathroom chung delh thlain chhungkaw pa ber chu electric current hian a man zui a, a hmunah a thi zui nghal a. Vanneihthlak takin a nupui fanau te chu an tlan chhuak hman a ni. 

  A ruang hi lumenpui niin Thawhlehni chhun dar 12:00 khan vuiliam a ni.

Scholarship sanction order tichhuak

Aizawl : Ministry of Tribal Affairs chuan July ni 7, 2025 (Thawhtanni) khan Financial Year 2023-24, 2024-25 chhunga Scholarship la sem loh Rs. 50,42,81,000/- sanction order chhuah a ni a, Zirlaite'n a rang thei ang bera an dawn theih nan MZP chuan a tul angin hma a la chhunzawm.

  MZP chuan, Scholarship chungchangah hian theihtawp chhuahin hma a la a, Governor kaltlangin Ministry of Tribal Affairs lam hotute pawh lehkha a thawn a, Delhi-ah Ministry of Tribal Affairs lam hotute pawh MZP hruaitute chuan an zuk bawhzui a, MP (Lok Sabha) Richard Vanlalhmangaiha pawh sawipuiin theihtawp a chhuah a, MZP hruaitute a hrilh hnu lawkah a hlawhtlinna hmel hmuh a ni hi MZP chuan lawmawm a ti.

CADS 2nd Batch lalut 

Aizawl : 7.7.2025 (Thawhtanni) khan Central YMA hnuaia ruihhlo do pawl, Central Anti Drugs Squad (CADS) 2nd Batch chu Central YMA Hall-ah ruihhlo do hna kal pui tan turin lakluh an ni. CADS 2nd Batch lakluhna inkhawm hi Vice President Prof. Lalnuntluanga'n a kaihruai a, CADS member inhmelhriattirna hun hman a ni. 

  CADS 2nd Batch ah hian Aizawl khawpui chhunga Branch YMA hrang hrang atanga aiawh te member atan ruat an ni a, member 42 an awm dawn a ni. Convener atan Fabian Lalfakawma, Assistant Secretary ruat a ni a, ani bakah hian Asst. Convener leh Secretary 2 ruat an ni bawk.

PHC tha tehna-ah tling thar

Aizawl : India rama sawrkar damdawi in tha tehna-ah Mizoram-a Primary Health Centre (PHC) pathum an tling thar tih July 10, 2025 kham puan a ni.

  India rama sawrkar damdawi in tha bik tehnaah hian Mizoram chhunga Primary Health Centre pathum – Kanghmun PHC, Darlawn PHC, leh Buarpui PHC te an tel thar.

Mizo Boxing coach man

Aizawl : National sub Junior Boys & Girls championship, Haryana-a neih zawh taka hmeichhe boxer pali te chuan an coach Lalthlengliana chu che mawi lo a puhin an lungawi lohna July 8, 2025 khan Child Welfare Committee hnena an thlen a, Protection of Children from Sexual Offences (POCSO) Act case-in FIR thehluh a ni.

  Boxer pali te zualkona chuan Child Welfare lama an dinhmun an thlen hian an lo ngai thutak hle tih an sawi a, women cell lamah FIR an thehlut nghal a, Lalthlengliana hi July 8, 2025 tlai dar li vel khan man nghal a ni.

Commerce & Industries Department Minister-in EPIP tlawh

Aizawl : July 10, 2025 khan Commerce & Industries Department Minister F Rodingliana chuan Export Promotion Industrial Park(EPIP) Lengte a tlawh a. Industrial unit hrang hrangte awmze nei zawka bun a nih theih nan ruahmanna siamte a enpui a ni. 

  Industries Minister F Rodingliana chuan Industry inangte hmun khata a hlawma dahkhawm a nih chuan Industry atanga bawlhhlawh chhuak (waste product) te pawh awmze nei a sawngbawl leh hman tangkai theih a nih beisei thu a sawi a. EPIP, Lengte chhunga hmasawnna hnathawh mekte bakah Industrial unit te tui mamawh ang mumal zawka pek dan turte a enpui nghal a, Industrial Estate Luangmual a hmasawnna hnathawh mekte a en nghal bawk.

Booth Level Officers te tan training buatsaih

Aizawl : Vawiin khan Assembly Constituency hrang hrang - Aizawl South II, Aizawl South III, Champhai North, Champhai South leh South Tuipui huamchhunga Booth Level Officers-te tan July ni 10, 2025 khan training buatsaih a ni. 

  He training hi Election Commission of India in National Training Programme for Booth Level Officers July 2, 2025 – July 17, 2025 chhunga neih tur a tih angin buatsaih a ni. Assembly Constituency dangah pawh neih leh zel tur a ni a, District Election Officer ten anmahni district huamchhung theuhah training program hi an buatsaih dawn a ni.

Red Cross-in DM&R-ah blanket 300 hlan

Aizawl : Red Cross Society - Mizoram State Branch-te chuan Disaster Management & Rehabilitation Department hnenah July 10, 2025 khan Blanket 300 an hlan. Blanket inhlanna hun hi DM&R Minister Chamber-ah neih niin DM&R Minister Professor Lalnilawma chuan department aiawhin a dawng a ni.

  Blanket inhlanna hunah hian IRCS - Mizoram State Branch Committee Memberte bakah Disaster Management & Rehabilitation Department hotute an kalkhawm a ni.

  Tun hnaia indin thar leh Indian Red Cross Society – Mizoram State Branch Managing Committee Member tharte:

1. H. Lalengmawia IAS, Chairman

2. Dr. Chawnglungmuana, Secretary

3. Dr. Benjamin Lalrinpuia, Jt. Secretary

4. Chinkhanmanga Thomte, Asst. Secretary

5. Zodinsanga, Asst. Secretary

6. Francis Lallawmkima, Treasurer

CM Lalduhoma leh HRDS India hotute inkawm

Aizawl : Chief Minister Lalduhoma leh HRDS India hotute chu July 10, 2025 khan Mizoram House, New Delhi ah an inkawm a, Mizorama mi harsa zawkte tana chenna in sak theih dan kawng an sawidun. 

  HRDS India hian programme pakhat Sadhgraha an tih chu kalpuiin, tribal mipui, chenna in tha neilo te tana chenna in tur sak chu an pawl thiltum lian ber a ni a. Kum 2029 ral hma ngeiin India ram pumah tribal te tan chenna in nuai 100 din sak hman an tum mek. An hotute chuan Mizoram chhungah pawh zirchhianna an neihfel tawh thu leh Phase I atan chenna in 5000 vel sa tura hmalak an inpeih thu an sawi a. A tul angin a theihna zawnah hma a lo lakpui zel tur thu Chief Minister hian HRDS India hotute hi a hrilh a ni.

  Chief Minister hi MP Richard Vanlalhmangaiha, Lalmuanpuia Punte, MLA/ Adviser to CM leh R Lalrodingi, OSD to CM ten an tawiawm.

Chhun zan zawma thlai thar zawrh theih dan tur rel

Aizawl : , Rural Development & Administration Minister Prof. Lalnilawma leh SELCO Foundation hotute chu July 9, 2025 khan Minister Pisa-ah inkawmin, thingtlanga kuthnathawktute'n an thlai thar chhuahte chhun zan zawma an zawrh theih nan bazar shed/road side market-a power supply changtlung tak pek dan tur an rel.

  SELCO Foundation hi Non-Profit-NGO niin, Bangalore, Karnataka-ah an inkhuar a. Retheihna umbo a, kawlphetha thianghlim nizung chakna solar energy hmanga boruak thianghlim leh hmasawnna tluantling thlen turin tribal area, thingtlang leh hmun kilkhawr zawkahte hma an la thin a. Eizawnna mil zela hman theih tur khawl, design leh technolgy hmangin an siam rem a, power hmang tlem leh man tlawm zawk khawl an chhawpchhuak thin a ni.

Project Buniyaad Hotel Management (Food & Beverages) Training Course, Phase-II hmanpui

Aizawl : Mizoram Youth Commission, Honda India Foundation leh Visan Foundation-te tangkawpin an buatsaih Project Buniyaad Hotel Management (Food & Beverages) Training Course, Phase-II chu July ni 8, 2025 khan hawnna hun Mizoram Youth Commission (MYC) Auditoriumah hman a ni a. 

  Labour, Employment, Skill Development & Entrepreneurship Minister Lalnghinglova Hmar chuan khuallian niin hun a hmanpui. Project Buniyaad Training programme hi thla hnih chhung awh programme niin MYC Coaching Centre-ah zirna kalpui thin a ni a. Phase-I hi September 2024 - March 2025 khan kalpui niin Chief Minister Lalduhoma chuan a lo hawng tawh a. Aizawl leh Lunglei MYC Centre-ah te training neih niin mizo thalai 122 ten training an zo va, an zinga mi 97 te chu India ram Hotel changtlung tak takah hna thawkin an awm tawh a ni.

CM leh Union Home Minister inkawm

Aizawl : 7.7.2025 khan New Delhi-ah Chief Minister Lalduhoma chuan Union Home Minister Amit Shah chu a pisaah a hmu a, inkawmna hun tha tak an nei.

  Inkawmnaah hian Handholding Scheme, Thenzawl Peace City leh project lian danga Mizoramin sum a mamawh te an sawi dun a. Home Minister chuan Parliament Session lo awm leh turah an ngaihtuah tur thu lo hrilhin; Union Finance Minister, Union Home Minister leh Chief Minister te nena sawi tlâng a, tihhlawhtlin dan kawng dap ni se, an ti.

  The Mizoram (Maintenance of Household Registers) Bill 2019, President of India hnena la tang mek chu President pawmpuina hmuh a nih vat theihna tura a lo bawhzui tur thu te, AAI hnena Lengpui Airport hlan chungchang pawh Union Cabinet in an lo ngaihtuah tur thu te a lo hrilh.

16th Finance Commission-ah CM-in Mamawh thlan

Aizawl : Imperial Hotel, New Delhi-ah July 7, 2025 khan Northeast state pasarih Chief Minister te leh an aiawh te chuan 16th Finance Commission member te nen inkawm hona hun an nei a, Mizoram Chief Minister Lalduhoma pawh telin Mizoram mamawh hrang hrangte a thlen. 

  Meetingah hian Mizoram Chief Minister bakah Meghalaya Chief Minister Conrad Sangma te, Tripura Finance Minister Pranajit Singha Roy bakah state dang Chief Minister aiawh leh official pawimawhte an tel a. Northeast state aiawhte hian dilna intawm Joint Memorandum chu 16th Finance Commission hnenah hian an thehlut nghal a ni.