Chemte in vithlum

Aizawl : June 2, 2025 tlai dar 4 vel khan Lalengzauva (41) S/o T. Zasanga Thingfal Lunglei dist. lam chhuak Thuampui Vengthar a, a u te bela hun rei tak awm tawh chu an chenna in chhungah a thin-hnun bula chemtea vihna avangin thichhawngin hmuh a ni a, Greenwood hospital panpui a nih hnuah a hliam tuar lovin a thi. 

  Lalengzauva bula lo muhil a thianpa Siamthanga leh Lalengzauva vittu nia rin Zalawma (21), Thuampui Vengthar mi ve ve te chu Police ten thu zawhfiah turin an la a ni. 

  Lalengzauva- ruang hi Thuampui YMA hall ah tlaivarpui a ni a, vawiinah a ruang postmortem a nih hnuah, an khua Thingfal lam panpui a ni ang.

Mizoram Synod hnuaia Pastor senior ber thi

ZALEN July 2, 2025 : Mizoram Synod hnuaia pastor/minister dam lai zinga senior ber leh upa ber ni reng thin, Rev. Lalnghinglova (kum 99), Mission Vengthlang chu July 2, 2025 khan City Hospital, Mission Vengah a thi. 

  Rev. Lalnghinglova hi kum 1956-ah pastor atan nemngheh a ni a, kum 1993 khan ZORAM NGHAHCHHAN tih lehkhabu a buatsaih a, chhiar hlawh leh rotling tak a ni. 

  Amah hi Mizorama Pastor zinga L. Th (Licentiate in Theology) hmasa ber niin kum 1956 khan a lo nei tawh. 

  A ruang hi niin Ningani chhun 01:00-ah Mission Vengthlang Presbyterian Kohhran Biak Inah vui a ni.

A zu nghei buaiin kum 64 mi tuthlawhin chek hlum

Aizawl : June 30, 2025 zing khan Lalchhuanmawia (28 ) Darlawng, zu nghei buai chuan a nu u Lalzawmliana (64) chu tuthlawhin a chek hlum.

  Lalchhuanmawia hian zu a ngheiin a buai thin a, a nu u Lalzawmliana, Tlungvel khúa Darlawng-a zin mek chu tuthlawh a chêk in, damdawi in panpui a nih hnu ah a thi.

  Lalchhuanmawia hian a pa hnathawk kal tur chu chem a sah a lo tum tawh a, a nu pawh kut a thlak a, khawtlang hruaitu ten man in police kutah an hlan a ni. 

Ruihlo kaihnawih thubuai kalpui dan inkaihhruaina bu tlangzarh

Aizawl : Mizoram State Legal Services Authority (MSLSA) chuan July 3, 2025 khan The Narcotics and Psychotropic Substances Act (NDPS Act), 1985 hnuaia ruihhlo siam, zawrh, hralh leh hman sual kaihhnawih thubuai kalpui dan inkaihhruaina bu, ‘Bi- lingual Standard Operating Procedure and Flowchart under the ND&PS Act, 1985’ tlangzarhna RB McCabe Hall, Aijal Club-ah an hmang a. He tlangzarhna hun hi Justice Michael Zothankhuma, Gauhati High Court Judge, MSLSA Executive Chairman ni bawk chuan hmanpuiin, SOP leh Flow Chart-te a tlangzarh a ni.

  SOP tlangzarhna hunah hian Mizoram Judicial Services, Mizoram Bar Association, Police Department, Excise and Narcotics Department, Custom Department atangin mi thahnem tak an tel a. Lalngaihmawia Zote, Addl. District & Sessions Judge, Aizawl atangin SOP chanchin tlangpui ngaihthlak a ni a. 

  SOP tlangzarhna hun hman zawhah hian Lalrinpuia Varte, SP, Narcotics leh Peter Zohmingthanga, Joint Commissioner, Excise & Narcotics Department kaihhruaina hnuaiah Training of Trainers neih leh a ni bawk.

DM&R Minister leh Eartmovers owner te inkawm

Aizawl : Disaster Management & Rehabilitation Department Minister Lalnilawma leh Mizoram Earthmover Owners' Union (MEOU) hruaitute chu July 3, 2025 khan khuarel chhiatna hrang hrang a lo thlen changa DM&R Department leh MEOU ten thawh hona tha zawk an neih theih dan tur sawiin Minister Office Chamber-ah an thutkhawm. 

  Minister chuan thawh hona tha neih chu thil pawimawh tak a nih thu sawiin MEOU member list leh an contact number te chu district tina Deputy Commissioner-te hnenah thawn chhuah ni se; khuarel chhiatna kaihhnawih-ah MEOU member-te chu a theih chin chinah sawrkarin lo hman zel an tum tur thu a sawi a ni.

H&TE Minister-in Mizoram State University hmun tur tlawh

Aizawl: Higher & Technical Education Minister Dr. Vanlalthlana chuan July 2, 2025 khan Mizoram State University dinna tur Government Aizawl West College Campus, Luangmual a tlawh. Minister hi Rev. Dr. K. Thanzauva, Education Consultant chuan a tawiawm a ni. 

  Mizoram State Assembly-in Mizoram University Bill 2025 a pass hnuah Sawrkar chuan chak taka hma lain, tunah hian a hmun turte laiha sak mek a ni a. College hrang hrangte hman tangkai phawt hnuah, hengte hi school hrang hranga siam chhoha University tura ruahmanna siam a ni. 

  Mizoram Universiy dinna tur hian SASCI atangin cheng vaibelchhe 30.4 hmanga bul tan a ni a, sum mamawh dang hi sawrkar laipui-ah H&TE Minister hian a thlen tawh bawk a ni.

Kawngkam chawhmeh zuarte thutna tur ngaihtuah

Aizawl: Vawiin khan Urban Development & Poverty Alleviation (UD&PA) Minister K. Sapdanga hovin July 3, 2025 khan Aizawl khaw chhunga chawhmeh zuar, kawngkama thu thinte thutna tur hmun rem zawk chungchang ngaihtuahin Minister pisa-ah thutkhawm a ni.

  Tennis Court bul kawngkama chawmhmeh zuara thu thinte harsatna sukiang tur leh an thutna tur hmun dang ngaihtuah turin Working Committee din ni se tia rel a ni a. Convenor-ah Municipal Commissioner- AMC bakah Aizawl DC, Aizawl SP leh Traffic SP te member atan ruat an ni a. An ni hian Aizawl khaw chhung veng hrang hranga chawhmeh zuara kawngkama thu thinte traffic ti buai lo leh felfai zawka an thut theihna tur hmun an ngaihtuah dawn bawk a ni.

ZMC&H hmalakna Health Minister-in endik

Aizawl : Health Minister Lalrinpuii chuan Zoram Medical College & Hospital (ZMC&H), Falkawn tih changtlunna tur atana hmalakna hrang hrangte July 2, 2025 khann a hmunah kalin a endik a, Adviser to CM TBC Lalvenchhunga bakah Dr. Lalthlengliani, Principal Director, Directorate of Hospital & Medical Education leh Dr. Ngurchamliana, Director, DHME ten an tawiawm.

  Rinpuii chuan ZMC&H hnuaia thawktu hrang hrangte chu tlawhkualin an harsatna leh mamawh an sawite a ngaihthlak sak a, sawkar chuan thawktute leh mipuite tan theih tawpa hma a lak zel tur thu a sawi. 

  Health Minister hian tun hnaia Mizoram Universal Health Care Scheme kalpui a nih hnua ZMC&H tih changtlun nana Health Department hmalakna langzar zualte a tlawh a, la peih chiah loh te pawh hman thuai theih tura buatsaih turin a ti bawk.

ESI Hospital leh sports stadium sak chungchang sawipui

Aizawl : Lalnghinglova Hmar, Minister of State, Sports & Youth Services leh Labour, Employment, Skill Development & Entrepreneurship (LESDE) Department chuan July 2, 2025 khan Dr. Mansukh Mandaviya, Union Minister for Sports & Youth Affairs leh Labour & Employment chu Tughlaq Road, New Delhi-a a chenna inah a kawm a, Mizorama ESI Hospital din leh sports stadium sak chungchang a sawipui.

  Dr. Mansukh Mandaviya chuan Mizoram Minister ngenna chu a ngaihpawimawh thu leh, ESI hnuaia damdawiin sak chu tihsak ngei a tum tur thu a lo hrilh.

  Union Sports Minister chuan football-a Mizoram hmasawnna chu lawmawm a tih thu a sawi a. Sports infrastructure hmasawnna’na thawhpui tur PSU thlan thuai a nih tur thu leh, PSU hotute nena meeting hunah pawh Mizoram Sports Minister chu a koh tel ngei tur thu a lo hrilh a ni.

CM leh Local Council hruaitute inkawm

Aizawl: Chief Minister Lalduhoma chuan July 2, 2025 khan a office-ah Aizawl City Local Council Association hruaitute a kawm a, an mamawh thlen te a ngaihthlaksak.

  Chief Minister hian Aizawl chu hmun ralmuang taka siam tul a tih thu a lo hrilh a. Local council ten mahni area theuhah, tlawmngaipawlte nena tang tlanga hma lo la turin a ngen a. ILP chungchang pawh a sawipui a, dan lek kawh kawngah LC te tanpuina kan mamawh a, NOC issue kawngah pawh lo fimkhur leh zual turin ka ngen che u a ni, a ti.

  Local Council Association hruaitute hian an lawmman tihsan chungchang leh Aizawla an office hmun ve tur te Chief Minister hi an sawipui a. Chief Minister hian an dilna te a lo zirchiansak tur thu a chah a ni.

  Local Council Association hian Chief Minister Relief Fund-ah Rs. 10000 an chhunglut nghal a ni.

CM hovin Thlai thar kharna hun hmang

Aizawl : June 30, 2025 khan I&WRD Conference Hall, MINECO-ah kumin chhunga sawrkarin thlai thar lei a kalpui kharna hun buatsaih a ni a. Chief Minister Pu Lalduhoma chuan khuallian niin a hmanpui.

  Chief Minister chuan kumin February ni 20 atanga sawhthing lei kalpui a nih atangin vawin hi thla 4 leh ni 10-na chiah a ni a. Tunah chuan a mothar a awm tawh si a, khar rih mai hi thain kan hre ta a ni.

  Sawrkar kan insengso nasa a, cheng vaibelchhe za vel hi kan sen ral ka ring. Kan theih tawka kan hralh ve bakah hian Central sawrkar market intervention scheme atangin Rs. 9 crore vel kan hmuh ve kan beisei thung. Kan loneitute hi kawng lakah kan kalsan dawn lo va, nakkum lamah pawh kan kalpui zel ang a ti.

  Dr. KC Lalmalsawmzauva, Adviser to CM & Co-Chairman MAMB chuan kumin chhunga thlai thar an lei dan report a pe a. Mizo quintals 1473 leiin, Nuai 44 vel sawrkarin a seng a. Sawhthing hi quintals 233,604 an lei tawh a, an lei tawh chinah support price hi Vaibelchhe 96.4 cr sawrkarin a pe tawh a ni. Aieng quintal 400 leiin, Hmarcha leisak ngai an awm lo. Hmunphiah hi empanelled buyers ten quintals 10552, non empanelled buyers ten quintals 27277 an lei a, ZOHANCO kaltlangin quintals 2498 lei a ni. He mi bikah hian sawrkarin Vaibelchhe 2 a seng a ni. 

PWD Minister-in NHIDCL leh Tipper pawl aiawhte kawm

Aizawl : Public Works Department Minister Vanlalhlana chuan June 30, 2025 khan a office chamber-ah NH-6 (Vairengte-Sairang) kawng siamthat leh enkawl chungchangah National Highways & Infrastructure Development Corporation Limited (NHIDCL) hotute leh Mizoram Tipper Association (MTA), Kolasib Sub-Headquarters aiawhte a kawm.

  PWD Minister chuan Vairengte leh Sairang inkar kawngpui hi NHIDCL hnuaia awm a nih thu leh MPWD in hemi atan hian Central atangin sum a hmuh theih tawh loh thu tarlan a ni a. NHIDCL kawng enkawl lai siam mekna atana sawrkar a insen lai hian, a that theih loh avangin MTA te an hnatlang a. Resource-in a daih tawh loh avanga MPWD hnena boulder trip 50 ngaihtuahsak tura an dilna chu PWD Minister chuan a ngaihtuahsak tur thu a sawi a ni. 

MUHCS zawm thar hospital te tlawh

Aizawl: Health & Family Welfare Minister Lalrinpuii chuan June 30, 2025 khan Aizawl khawpui chhunga Private Hospital hrang hrang, Mizoram Universal Health Care Scheme (MUHCS) zawm thar - Kidney 360° Superspeciality Clinic & Dialysis Centre, Bazar Bungkawn; Nazareth Hospital, Chaltlang; Nazareth Hospital, Ramhlun leh Redeem Hospital, College Veng te a tlawh. 

  Kidney 360° Superspeciality Clinic & Dialysis Centre-ah hian Dialysis khum 6 a awm a, damlo 595 chu MUHCS hnuaiah cashless-in an enkawl tawh a, dialysis mamawh an tam avangin booking tih lawk a ngai a. Nazareth Hospital leh Redeem Hospital-ah te pawh General ward, Semi-cabin leh Private cabin thianghlim leh changtlung tak a awm a, heng hospital-ah te hian MUHCS-a inziaklut tawhte tan cashless-in a inenkawl theih a ni.

  Tun dinhmunah hian MUHCS hnuaia inziaklut tawh (beneficiaries) awm zat chu ABPMJAY 2,19,002, Mipui (Contributory Beneficiaries) 9069, Pensioner 9310 leh Sawrkar hnathawk 55470, avaiin 2,92,851 an awm tling tawh a ni. 

CM hovin CADS man ruihhlo tihralna hun hmang

Aizawl : Central Anti Drugs Squad ten kumin March ni 15 atanga June thla thlenga ruihhlo an man tihralna hun Central YMA Hall-ah June 30, 2025 zing khan an buatsaih a, Chief Minister Lalduhoma'n a hmanpui.

  Prof. Malsawmliana, Secretary, CYMA chuan report a pe a. Ruihhlo tihral hi No 4 Heroin hawng 861 leh tictac 1498, Meth kg 10, damdawi tablet 25383, Ganja kg 56, Codein bottle 2805 bakah zu tam tham tak an ni a, Rs. 429.27 lakh man hu a ni. Kumin March ni 15 atangin CADS te hian ruihhlo kaihhnawihah mi 809 an man a, mi 440 councelling an pe a, 37 Home ah an dah a, mi 48 Excise kutah an hlan a, Police kutah 4 an hlan a ni.

  Inkhawm tawi neih zawh hian CYMA Office tualah ruihhlo thenkhat hi Chief Minister hian tuiah a chiah ral a. Tihral tur hi a tam tham avang leh khaw chhunga tihral a him loh theih avangin a bang zawng hi CADS member ten hmun dangah an tiral zui a ni.

Chief Minister hovin Remna Ni hmang

Aizawl : MZP General Headquarters bultumin June 30, 2025 khan Aizawl Lammual-ah Remna Ni hman a ni a. Chief Minister Lalduhoma chu khuallian niin a hmanpui a, nupui Liansailovi'n a tawiawm.

  Khuallian hian Remna Ni Flag pawt pharhin, 1st Bn. MAP Brass Band ten "Ro min reksak ang che" tih hla mawi takin an rem a, inkhawmna hi tan zui nghal a ni. 

  Chief Minister chuan khawvel hmun hrang hranga cheng zofate chibai a buk a. Remna Ni chu MZP President-in min ngen ang khan hmun khatah lungrual takin hmangza thei ila ka duh hle a ni, a ti. 

  Politics ah inremin awm ila, mawi lo taka inbeihna hi tibo ang u. Kan khawlai hi ralmuang rawh se, tuallaiah zurui awm suh se. Khawlaia buaina siam te hi bo rawh se. I titawp ang u. Mipa chu tuallaiah a inhrosa tur a ni ngai lo ve. Thenawm khawveng te nen pawh inrem ang u. Chawhmeh te hi insuah tawn leh ang u, a ti.

  Remna Ni lawmnaah hian Home Minister K. Sapdanga, Minister pahnih - B. Lalchhanzova & F. Rodingliana, Deputy Speaker Lalfamkima leh Adviser to CM Lalmuanpuia Punte bakah ram hruaitu enge maw zat an tel.