YMA Day vawi 90-na pualin thilpek sem

Aizawl : June 12, 2025 khan Central YMA chuan YMA Day vawi 90-na pualin Damdawi In leh Home hrang hrangah thilpek a sem a. Mizorama pawna Mizo Welfare thenkhatah a hlan bawk.

  Kumtina tih thin angin Central YMA chuan India ram khawpui hrang hranga Mizo Welfare 17 hnenah YMA Day chibai bukna Rs.15,000/- theuh a pe a, Aizawl khawpui chhunga Sawrkar leh Kohhran Damdawi In 6 ah Rs.15,000/- theuh a hlan bawk. 

  Vawiin ni 12.06.2025( Ningani) khan Tawngtai Bethel Camping Centre (TBCC), OKM Home leh Thutak Nunpuitu Team (TNT) ah te buhfai bag 50 theuh an hlan bawk. Heng buhfaite hi hruaituten a hmunah kalin an hlan a ni.

Japan Science Programme-a tel tur Mizo zirlai pali vailiam

Aizawl : Sakura/Japan Science High School Program-a tel tur Mizo zirlai pali, State aiawh a tel turte chu School Education Director Angela Zothanpuii chuan June 12, 2025 khan a vailiam. 

  Mizo naupang thlanchhuante chu :

K.Darthangmawia Govt. Mizo HSS

FC Lalruathlui Govt. Mizo HSS

Zorinzuali Bawlchhim, MICE

Gideon Malsawmtluanga, Govt. Zemabawk HSS 

  Heng naupang thlanchuahte hian state dang atanga thlan chhuah naupangte nen, NCERT Delhi-ah June ni 14 hian Orientation Programme an hmang ang a, Ni 15-ah Tokyo an pan dawn a ni. 

Bungraw chuh hman lohin In kang ral

Aizawl : June 10, 2025 zan khan West Phaileng-ah hmeithai chenna in bungraw engmah chuh hman lohin a kang.

  ZALEN thudawn danin, West Phaileng, Venghlun a Sangdingliani leh a fanu chenna in chu June 10 zan dar 7 vel khan a kang a, in kan lai hian in neitu nu hi Aizawl a zinlai niin, a fanu chauh a awm a, a fanu pawh hi an chhungte in-ah a riak chhuak a ni.

  In neitu nu fanu hian mombati a chhit chu a chhuahsan a, hei hi in kan chhan nia ngaih a ni. In kang hi assam type chhawng khat niin, bungraw engmah chuh hman a ni lo.

Heroin leh a neitua puh mi 2 man

Aizawl : Excise & Narcotics department, Kolasib chuan an thudawn bawhzuiin 9.6.25 tlai dar 4 vel khan Heroin hawng 3 leh a neitua puh mi pahnih an man.

  Heroin kengtute hi Akbar Hussain Lashkar (35) s/o Nural Haque, Silchar leh a nupui anga a kawl Ramtharmawii (30) d/o Chawnga Darngawn (L), Saipum field veng te an ni a, heroin hi sahbawn bawm pathuma dah niin gms 11 veka rit a ni. Excise in an mi man lai hnena heroin te hi pek turin phone hmangin an in hrilh a, anni hian Scooty (N-Torgue AS11-AE/8872) a deliver an rawn tum chu Chemphai road, Bilkhawthlir-ah nangchinin an man zui a ni.

Thisen pe hnem berin PVL Champion lawmna atan thisen pe

Aizawl : Mizoram a thisen pe hnem ber nihna chelh mektu, C Lalremruata, Electric Veng, Aizawl chuan June 10, 2025 khan Pro Volleyball League, 2025-a Anastasia Electric Veng Volleyball Club champion lawmna atan Civil Hospital, Aizawl-ah thisen a pe.

  C Lalremruata hian kum 1998 atangin thisen a pe tan a, tun thlengin a chhunzawm chho ta zel a, vawi 96 a pe tawh a ni. 

  C Lalremruata chuan a thil tih chu Pathian vang chauh a tithei a ni tih ZALEN a lo hrilh tawh a, "Ka hriselna Pathianin min ven sak ang a, ka tum dan chuan century pek tlin ngei ka tum," tiin a lo sawi tawh bawk.

Icon Top 10-te charity concert-ah Rs. nuai 6 hmu tling

Aizawl : LPS Vision Production leh Youth Icon 2024 Top 10 tangkawpin khuarel chhiatna tuarte tanpuina tura charity concert an buatsaihah Rs. nuai 6 an hmu chhuak tih June 10, 2025 khan an puang.

  Concert hi LPS Studio-ah neih a ni a, Icon Top 10 zinga atangin mi pahnih, Samson Lalhunruata leh Laldinhlua tih loh an inlan thei vek a; TV leh Youtube-ah concert hi live-a pek chhuah a ni a, Icon star-te an zai chhungin vehbur khawn a ni a, chuta sum tlingkhawmte chu tihfel niin mipuiin khuarel chhiatna tawkte tana an thawh khawm hian Rs. nuai 6 a tling a ni.

  LPS Vision Production leh Youth Icon 2024 Top 10 chuan tanpuina tur sum leh pai thawhtute chuan lawmthu an sawi a. An khawn chhuahte hi hun remchang hmasa berah Icon Top 10-ten an sem chhuak ang.

Darkar 12 chhungin ruihhlo cheng Nuai 170 chuang hu an man

Aizawl : Champhai Police ten June 9 khan Champhai Police Checkgate, Chalbawia Junction, Khankawnah lirthei pahnih atangin darkar 12 chhungin methamphetamine leh herion cheng 1,70,92,000 man hu an man. 

  Methampatamine hi Car pakhat Aizawl pan tur an endik atanga man niin lirthei hnuaia ruihhlo phurhna tura siam chawpah dah niin Methamphetamine fun 10, Kg 11 leh gram 8 a rit, mum 1,01,000 an man a. Cheng 1,53,40,000 hu a ni. Ruihhlo neitua puh, lirthei khalhtu Malsawmsanga, Zokhawthara cheng nia inchhal chu an man tel. 

  Champhai Police te hian Khankawn checkgate-ah Aizawl pan tur mimal lirthei kawngkhar leh Woofer-a thuhruk herion hawng 53, gram 584 a rit, Cheng 17,52,000 hu an man bawk a. A neitua puh leh lirthei khalhtu Lalchamliana, Zokhawthara cheng nia inchhal chu an man tel bawk a ni.

Khawtlangin BRTF gate kalh sak 

Aizawl : Thuampui Local Council leh tlawmngai pawlte chuan an veng chhunga awm BRTF te hmun luhma gate chu June 10, 2025 khan an kalh sak.

  Thuampui LC leh NGO te chuan May ni 30, 2025 a lungrem chim thianfai tura an tih an zawm loh avangin BRTF gate hi an kalh sak a ni. May 30, 2025 a lungrem chim avang khan mi pakhatin nunna a chan a, hliam na tak tuar pakhat a awm bawk.

Mizoram tui dinhmun hriat theihna tur hawng

Aizawl : Chief Minister Lalduhoma chuan June 9, 2025 khan Irrigation & Water Resources Department Auditorium, MINECO ah World Bank suma din Mizoram Water Informatics Centre, Tlawng Lui lian tur hriatlawk theihna (Tlawng lui Early Warning System) chu a hawng a. He system hi DM&R department nena enkawl tur a ni.

  Chief Minister chuan, National Hydrology Project hnuaia National Water Informatics Centre chuan state zawng zawng mamawh min phuhruk zo lo va. State Centre lo neih theih hi central sawrkar lam duh dan a lo ni bawk nen, he centre din hi kan remti ta a. Sum leh pai hi World Bank lamin an tum a ni, a ti.

  Chief Minister hian Tlawng lui lian tur hriatlawk theihna (Tlawng lui Early Warning System) hi DM&R department nena enkawl tur a ni, darkar 24 hma-in he khawl hian warning a pe dawn a, Lunglei, Buarpui, Darlung, Sihhmui kai, Sairang kai leh Bairabi-ah te bun a ni.

CHA-ah MRI khawl leh bungraw dang hlanna nei

Aizawl : Aizawl Smart City Limited, Urban Development & Poverty Alleviation Department hmalaknain Civil Hospital, Aizawl-ah MRI khawl, mipuite tana tlangzarhna leh bungraw dangte hlanna hun June 10, 2025 khan hman a ni. 

  He hunah hian K. Sapdanga, UD&PA Minister chu khuallian a ni a, khawl inhlanna hun hi Aizawl Civil Hospital Conference Hall-ah neih a ni. H&FW Department Minister Lalrinpuii pawhin he hun hi hmanpuiin Lalmalsawma Pachuau, Secretary, UD&PA Department chuan inkhawm hi a kaihruai a, khawlte hi Aizawl Smart City Limited, UD&PA hmalaknaa lei niin UD&PA Minister K. Sapdanga hian Aizawl Cilvil Hospital hnenah a hlan a ni.

  Aizawl Smart City hmalakna hian tun hnaiah sawrkar leh private hospital hrang hrangte tan Ambulance pariat lei a lo ni tawh bawk a; Tuirialah Common Bio-medical Waste Treatment plant cheng nuai 801.15 sengin din a lo ni tawh bawkin, April 2025 atang khan hman tan a ni tawh a ni.

EF&CC Minister Phovin Green Mizoram Day hmang

Aizawl : June 11, 2025 khan Green Mizoram Day chu Mizoram pumah hman a ni a. A hmanna pui ber hi Thenzawl Golf Course ah neih niin Environment, Forests & Climate Change Minister Lalthansanga, State Level Sub-Committee on Green Mizoram Day Chairman chu khuallian a ni. 

  Kumin Green Mizoram Day thupui chu “Ruah tui khawl nan thing i phun ang u" tih a ni a. He ni pual hian Minister leh official dang ten thingtiak an phun a ni.

  Green Mizoram Day hi Green Aizawl Day ti a bultanin, kum 1999 ah Green Mizoram Day tia thlak a ni a. Kum 2014 atang khan June ni 11 hi Green Mizoram Day atan Mizoram Sawrkar chuan a puang a ni. He ni denchhen hian Mizoram chhung hmun hrang hrangah thingtiak phun thin a ni a. Thingtiak nuai 46 chuang phun a lo ni tawh a ni.

Sawhthing Processing unit thlan theih tur chhawpchhuak

Aizawl : Empowered Committee for Investment te chu June 11, 2025 khan an chairman Chief Minister Lalduhoma hovin an thukhawm.

  Mizorama sawhthing processing unit dintu tur thlanna an nei. Processing unit thlan theih tura chhawpchhuah te chu;

1. SJAR Consulting pvt. Ltd - Aizawl district.

2. Opickpure Organic Pvt Ltd - Khuangleng Champhai district.

3. AV Biotech - Chhingchhip

4. Panacriti Extracts & Nutraceuticals - Mamit district (PPP Mode)

  Company te zingah hian company pathumin an Draft MoU an thehlut tawh a. An draft MoU te hi sawrkarin a lo zir leh ang a, thutawp siam tura la meeting leh tur a ni.

Electric connection endik tan

Aizawl : P&E Department chuan Dt. 9.6.2025 atang khan Mizoram chhunga Electric connection endik runpui a nei a, Consumer ten electric kan hman dan endikna hi District Headquarter-ah bul tan niin, khaw dangah pawh chhunzawm zel tura ruahman a ni.

  Electric energy meter kal tlang lova electric hman te, pawh ruk te hi danin a phal loh thil anih avangin hetianga titute chungah action lak tur a ni a, Dan lova electric hmang lo turin P&E Department chuan mipuite a ngen a ni.