Rajya Sabha member atan K. Laltluangkima thlang

Aizawl : June 18, 2026 khan Mizoram-a rorel lai Zoram Peoples Movement candidate K. Laltluangkima chu Mizoram-a Rajya Sabha seat awmchhun atan thlantlin a ni a, ZPM thupuangtu hian vote tla 36 atanga 26 chu a hmu a, amah khingtu Mizo National Front candidate Zothansangi chu a hneh a ni.

  Vote 40 awmah hian BJP MLA pahnih leh Congress MLA pakhat chu tun inthlanah hian an hai a, ZPM MLA W Chhuanawma chu damlohna avangin a inlan thei lo a, ZPM chuan state election official hnenah home voting an dil a, mahse, phalsak an ni lo.

Horticulture Fair Lammual-ah nei

Aizawl : Horticulture Minister C. Lalsawivunga chuan June 17, 2026 khan Horticulture Fair vawi 13-na Lammualah a hawng a, a hawnna inkhawmah hian Minister of State Prof. Lalnilawma leh MIFCO Chairman Lalthazuala te pawh an tel.

  District tina farmers tha thlanchhuah, Best Horticulture Farmer Award’ te chawimawina hun hman a ni a, Horticulture Fair 2026 hi ni li awh (17-20 June 2026) niin Stall inpho hi a vaiin 273 a awm a ni.

  Horticulture Fair hi kum 2012 atang khan neih tan niin, kumin hi a vawi 13 na a ni a, Kum 2012 atanga 2025 thlenga stall neituten an hralh chhuah tawh zat belh khawm chu Rs 3,76,90,607/- a ni.

Dawrpui leh Chhinga Veng inkar buaina chingfel tur committee din

Aizawl : Aizawl Municipal Corporation chuan June 17, 2026 chhun khan AMC Conference Hall-ah Dawrpui Veng leh Chhinga Veng hruaitute kawmin ramri chungchanga buaina awm chungchang an sawi ho a, ramri chungchanga veng pahnihte inkara buaina chingfel turin Committee din a ni.

  Veng pahnih atanga khawtlang hruaitute chuan, “Vawiina veng aiawh kalkhawmte hian Committee on the Land Dispute between Chhinga Veng and Dawrpui in hma a lakna piah lamah hma lak rem kan ti lo a, hmalakna dang reng reng engmah a thlen loh nan hma kan la ang,” tiin resolution an siam bawk.

Aizawl DC-in hmun sarih-ah hman khat daih plastic hman a khap

Aizawl : Urban Development & Poverty Alleviation Department (UD&PA)-in Aizawl District chhung Tourist Site atan hmun sarih a thlan bik, Tourist Sites-ah Aizawl DC chuan June 17 khan thuchhuah siamin heng hman khat daih plastic, Single-Use Plastic (SUP) hman, hralh, sem leh kawl a khap.

  UD&PA hian heng hmun pasarih - Lalsavunga Park, Hlimen ; Falkawn Zokhua ; Sakawrhmuituai Tlang ; Hmuifang Tlang ; Khawhpawp, Lawipu ; Sairang Railway Station leh Sialsuk Tlang te chu Tourist Site thlan bikah a puang a, bawlhlawh a paihna tur ni lo a paih tih rem nan leh tullo a plastic hmanna tih tlem a nih theih nan he thupek hi chhuah a ni.

END ten hmun thumah ruihhloman

Aizawl: Excise & Narcotics Department chuan June 16, 2026 (Thawhlehni) khan Tuikual South, Temple Square, Aizawl-ah Heroin gram 241 (Hawng 20) leh a neitu nia puh Manipur lam mi, Chawnpui Veng, Aizawl-a Khawsa mek nia inchhal an man. 

  June 16, 2026 tho hian Khatla, Aizawl-ah Heroin gram 350 (Hawng 30) leh heng heroin manaa inhnamhnawih leh a neitu nia puh mi pathum, Myanmar lam mi pakhat leh Mizoram mi an man a, Heroin phurhna atana hman pawh hrensak nghal an ni. 

  Excise & Narcotics Department leh 14th Bn. Assam Rifles thawkdun pawhin June 16, 2026 zan khan Tlangsam, Champhai-ah Methamphetamine tablet 9,786 (gram 950) leh a neitu nia puh mi pahnih an man bawk. Ruihhlo vanga mante hi June 17, 2026 khan Court-ah hruai nghal an ni. 

BSF sipai pahnih kum 42 tang turin court-in an chungthu rel

Aizawl: Border Security Force (BSF) sipai, Silsuri West-a post an nih laia hmeichhia pawngsual rawn (gang rape)-a a hnua acid-a leih zuia puhte chu Addl. District & Session Judge I, Sylvie Z. Ralte chuan thiam loh a chantir hnuah June 26 khan a hremna hi puan a ni a, an pahnih hian kum 42 ve ve lung in tang turin a hrem ta a ni.  

  Thiam loh chang ta, Nilanjan Das leh Dinesh Kumar te hi IPC - Section 376D - Pawngsual rawn (gang rape) thubuai, IPC Section 376(2)(m): Pawngsual bakah mi taksa na taka hliam thubuai leh IPC Section 326A: Acid hmanga inbeihna thubuai hmanga hrem an ni

Sairang Rel station leh a velah thingphun

Aizawl : Clean & Green Revolution Mizoram chuan June 15, 2026 khan Sairang Rel Station ah thing phunin, pangpar huan leh a chhehvel tihfai hnatlang an huaihawt.

  Clean & Green Revolution hian Sairang Rel Station hi India rama rel station fai leh hring mawi bera chhuah an tum a, chumi hmalakna atan chuan Railways hotute remtihnain Sairang Rel Station kiang hi an cheibawl ta niin Lalmalsawmi, Chairman, Clean & Green Revolution Mizoram chuan a sawi.

  Hnatlang atan hian April par kung 50 leh Chawnpui kung 50 chu Forest Department in an pe a. Self Help Group, Sihhmui leh Commercial Vehicle Union, Sairang te nena tanghovin hnatlang hi an huaihawt ta a ni.

CM hovin Mi-PRAGATI meeting nei

Aizawl: Chief Minister Lalduhoma kaihhruaiin Mizoram Pro-Active Governance and Timely Implementation (Mi-PRAGATI) meeting vawi thumna CM Conference Hall-ah June 18, 2026 khan neih a ni.

  Meetingah hian NABARD RIDF sum hmanga Mizoram sorkar hnathawh mek, Project amount Rs. 3 Crore aia tam chin project 53 te ennawnna (review) neih a ni a. Vaibelchhe 44,800 Crore vel senga thawh tur Sairang - Hmawngbuchhuah rel kawng ruahmanna Railways lamin an sawifiah a. 

  Ropuiliani Tribal Freedom Fighter Museum sak mek te, State Tribal Institute sak mek te, PM SHRI hmalakna te, Swachh Bharat hmalakna te, Kaladan Multi Modal Transit Transport Project hmalakna te, PWD hnuaia hnathawh lian zualho, hnathawh timuang thei harsatna an tawh mekte leh project kalpui lai enzui ngai bikte an sawiho bawk.

Police lirthei thar 219 vailiam

Aizawl : Mizoram Police Headquarters (PHQ) chuan 3rd Battalion MAP Parade Ground, Mualpui-ah Assistance to State & UTs for Modernisation of Police Scheme atanga an lei lirthei chi hrang hrang 219 chu June 18, 2026 khan Chief Minister Lalduhoma'n a vailiam a, Home Minister K. Sapdanga chuan a telpui bawk.

  Mizorama Police Station zawng zawng (P/S 44) ten a thar pakhat tal an dawng vek dawn a, chu mi zarah chuan Outpost 15 pawhin lirthei an kawl theih phah dawn a ni. Battalion te, Specialised Unit te leh Police Training School te pawhin an dawng bawk ang.

School naupang uniform pheikhawk sem

Aizawl: Lalnghinglova Hmar, Aizawl West II bialtu MLA chuan a bial chhunga sawrkar primary school a zirlaite hnenah June 17, 2026 khan school uniform pheikhawk a sem a. Govt. Primary School, Dinthar leh Govt. Gairigaon Primary School te hnenah pheikhawk semna hun hi Dinthar YMA Hall-ah hman a ni.

  Bialtu MLA in school uniform pheikhawk a semnaah hian a thawhkhatnaah Dinthar Venga sorkar primary school pahnihte atangin zirlai 214 in pheikhawk an dawng a. Tunkar leh karleh tirlamah sem chhunzawm a ni dawn a, bial chhung primary school zirlai 673 hnenah pheikhawk hi pek turin an ruahman.

Lalrinpuii’n World Blood Donors Day hmanpui

Aizawl: World Blood Donors Day, kum tina June ni 14-a hman thin chu remchan zawkna avangin June ni-17 hian BSI Hall, Khatla-ah hman niin, “One drop of humanity, give blood, save lives” chu thupuia hman a ni. Minister Pi Lalrinpuii chuan khuallian niin a hmanpui.

  World Donor Day pual hian Thisen pe tha lawmman sem niin, Overall Award ('Pu K. Kapsanga Award')-ah National Service Scheme, Mizoram-a unit hrang hrang te chu thawhhlawk berin pakhatna an ni a, unit 6250 an pe. Central Kristian Thalai Pawl-in unit 5251 an pe a, pathumna Mizoram Thalai Kristian Pawl chuan unit 2861 an pe a ni. 

  Relegious Category chu thisen pe hnem ber niin Kohhran pawl thalai pariat te thisen pek hi unit 11,621 a tling a, Zirna in ho pek belhkhawm hi unit 6901 niin Miscellaneous cotagory te pek hi unit 3573 a ni a, YMA pek tlingkhawm hi 1202 a ni.

Organic Aieng ro Cheng Nuai 26.6 man hu a vailiam

Aizawl: Department of Agriculture & Farmers’ Welfare in Mission Organic Mizoram kaltlanga hma a lakna - Mission Organic Value Chain Development for North Eastern Region (MOVCD-NER) hnuaia Mizorama Farmer Producer Company din - Tlabung Turmeric Farmer Producer Company Ltd., Zodin, Tlabung te chuan an aieng tharchhuah cheng nuai 26.6 man hu an hralh a. Dr. KC Lalmalsawmzauva, Adviser To Chief Minister chuan Ch. Saprawnga Truck Terminal, Rangvamual, Aizawl atangin June 16, 2026 khan a vailiam.

  Tlabung Turmeric Farmer Producer Company Ltd te Aieng ro hi Assam lamah thawnchhuah a, Dried Turmeric Finger metric tonne 25 chu Kg-ah cheng Rs. 106.4/- zela hralhin, cheng nuai Rs. 26.6 an hmuchhuak a ni. Tlabung Turmeric FPC Ltd. hnuaiah hian organic aieng chingtu member 500 an awm mek.

PHE Department a MES tling tharte thingpui inpui

Aizawl: PHE Minister Prof. Lalnilawma chuan kum 2026 a MPSC buatsaih Mizoram Engineer Service (MES) exam-a tling thar mi pasarih (7), PHE Department a thawkte lawmpuina leh infuihtharna neih pahin June 16, 2026 khan a pisaah thingpui a inpui.

  Minister chuan Engineer te hi Department mai bakah Mizoram hmasawnna lungphum an ni, a ti a. MES officer thar te chu mipui ta an ni a, an hnathawh leh hmalakna apiang mipui leh ram hmansawnna atan ni zel rawh se, tiin a fuih.

CM leh Finance hotute inkawm

Aizawl : June 16, 2026 khan Chief Minister Lalduhoma hovin a office-ah Planning & Programme Implementation Department leh Finance Department hotute an thukhawm.

  He hunah hian Ministry of Finance-in hmarchhak huapa Institutional Capacity in North Eastern Region Workshop, Shillong-a neih tur inbuatsaihna an nei a. SASCI hnathawh mek leh hmachhawpte an thlirho bawk. Meeting-ah hian TBC Lalvenchhunga, Adviser to CM pawh a tel a ni.

  Workshop atana inbuatsaihnate an sawiho hnuah SASCI 2025-26 hna kal mek leh SASCI 2026-27 a hmalakna thar turte sawihona an nei leh a ni.