Jail tang tlanchhuak tlanbona bike hmu

Aizawl : Ruihhlo kaihhnawih vanga man Central Jail atanga tlanchhuak Lalthawmthanga'n tlanbona atana a hman Bike chu June 17, 2025 khan Pawlrang daiah hmuh a ni, amah erawh man a la ni lo. 

  Bike hi Pawlrang dai kilometre 3 vela hlaah Lalthawmthanga'n tlanbona atana a hman Bike hi hmuh a ni a, Ngopa Police hriattir nghal niin, Ngopa Police Station-ah BIke hi an la nghal a ni. 

  Lalthawmthanga (28) Aizawl zonuam veng hi Pathianni zan dar 10 leh 11 inkar khan a tanna cell kalhna tala chhuchhia-in a tlan chhuak a. A tanna cell atanga a chhuah hnu hian a awmna building tukverh steel bar chu kar kau-in a chhuak leh a. Puan suih zawm hmangin Duty post hmuh phak lohah pawnah a uai thla a ni.

Rawtuai khawrh tura chhuak thiin hmu

Aizawl : Rawtuai khawrh tura chhuak, Kulikawn West-a cheng nu chu June 17 zan khan Tlangnuam West huam chhunga khamah thiin hmuh a ni.

  Tlangnuam West atanga ZALÊN thudawn danin kum 45 mi, Lalrindiki hi Thawhtanni chawhnu khan a chhuak a, a kal dawn hian a fapa hnenah a laklawh deuh chuan thlamah a riah nghal mai theih thu a hrilh nghe.

  Hemi zan hian a haw lo va, an ngaih pawh a tha lo lem lo va; mahse, a tuk, Thawhlehniah pawh a la haw loh cheu avangin zanah a faten an zawng ta a, zan dar 08:00 velah kawng thlang feet 150 velah thiin an hmu ta a ni. 

Lirthei siam danglamah Heroin Kg 1 chuang man

Aizawl : June 17, 2025 khan Champhai Police-te chuan Champhai Police Checkgate, Chalbawia Junction paltlang tur lirthei an endik pahnih atangin ruihhlo phurhna tura siam danglam lirthei hnuaia thuhruk Heroin Kg 1 chuang an man a.

  Thulakna in a tarlan danin Champhai Police te hian Pahlira, Bukvannei, Saihapui Kolasib District ni-a insawi khalh atangin Heroin Kg 1 leh Gram 124 a rit leh Lalramngaia, Dinthar Veng Champhai ni-a insawi khalh atangin Heroin Gram 98 a rit an man. 

YMA-in hlo thlawh sak

Aizawl : Sialhawk North Branch YMA te chuan June 17, 2025 khan thihna avanga harsatna tawk, Rohlira te chhungkua thlawhhma chu YMA Day denchhenin hnatlangin an thlawh sak. 

  Rohlira te chhungkua hi thla hmasa lama chhiat lo tawk tawh an ni a, YMA te hian Buh hmun Tin 1½ hmun vel chu thlawh zawh sak in, members 120 an thawk chhuak a ni. 

YMA Inkhawmpui lian 2025 thlenna tur pandal sak hna tan

Aizawl : June 17, 2025 khan Sakawrdaia YMA Inkhawmpui Lian Vawi 75-na thlenna tur Pandal sak hna tan a ni a. October 2025-a YMA Inkhawmpui Lian thlenna tur khua Sakawrdai YMA chuan Pandal sak hnatlang a ko a, Pandal sak hna an thawk tan a ni.

  Pandal sak hna hi a nawlpuia thawh theih a la ni lo a, a ruh relpui tun chauh a nih avangin mi 50 vel an thawk a ni. Pandal sa thiam mi pathum rawih a ni a, an kaihhruaina hnuaiah hna thawh a ni a. June thla chhung hian a ruh relpui hi zawh hman an inbeisei a ni. 

  A ruh relpui siam zawh a nih hunah hnatlangpui koh tum a ni a, pandal sak hna hi tluang taka thawh theih a nih chuan September thla ral hmaa sak zawh hman an inbeisei bawk a ni.

Raltlan buaina siam ching haw turin ti

Aizawl : New Champhai Branch YMA-in raltlan buaina siam ching chu June 16, 2025 khan haw turin an hriattir

  New Champhai Branch YMA chuan Vum Deih Lian (Raltlan) Helipad veng, New Champhai awm chu nungchang ṭha lo tak, rui chunga buaina siam chíng leh hmanrua nena mi rikráp chíng a nih avangin Ni 18 (Nilaini), 2025 ral hmain New Champhai chhuahsan a, Myanmar ah haw turin an hriattir a.

  New Champhai Branch YMA chuan Sub-Hqrs YMA, Champhai leh a huamchhunga Branch zawng zawng te’ hriatpui turin an ngen bawk a ni.

IRC hotuten chanchinbu mite an kawm

Aizawl: June 19, 2025 zan khan IRC Mid-Term Council Meeting hmang tura lokal, Indian Road Congress Office Bearers-te leh chinchinbu mite Hotel Regency, Aizawl-ah an inkawm.

  Chanchinbu mite chuan Mizoram kawngte a tlo loh thin thu sawiin rawtna an neihte an thlen a, Prof. Manoranjan Parida, IRC President chuan CSIR - Central Road Research Institute atangin zir chiang tur Team an lo kal tur thu leh Council Meeting-ah pawh hmalak zui dan turte rel zui a nih tur thu a sawi a ni.

  Er. H. Zoramliana, Engineer-in- Chief, Mizoram Public Work Department chuan Mizoram kawngpui atan chuan alkatra hmanga siam ai chuan cement, balu, rawra leh rod hmanga siam a tlo zawk tih hi MPWD-in a pawm dan leh a hmuh dan a ni a, IRC Council Meeting-ah pawh hian sawi hona leh inrawnkhawmna hunah Mizoram kawngpui siam chungchanga MPWD-te tawnhriatte leh rawtnate pawh thlen a nih tur thu a sawi. 

Drug Abuse Prevention Programme for Middle School Teachers nei

Aizawl : Social Welfare Department leh School Education Department tangkawp buatsaih ‘Drug Abuse Prevention Programme for Middle School Teachers’ chu June 19, 2025 khan Lianchhiari Run, Treasury Square-ah neih a ni a. Social Welfare, Women & Child Development minister Lalrinpuii chuan a hmanpui.

  Programme hi naupangte ruihhlo hmansualna laka ven an nih theih nan zirtirtute hnena ruihhlo chungchang leh a kaihhnawih hrang hrangte hrilhhriatna atan leh naupangte hnena an zirtir chhawn ve theih nana buatsaih a ni a. Carolyn Rinthanpuii Fanai, SDEO, School Education Department chuan lawmthu sawiin hun a khar a ni.

Empowred Committee on Investment thukhawm

Aizawl : June 19, 2025 khan Empowred Committee on Investment leh sawm bik mi pawimawh te chu Chief Minister Lalduhoma hovin CM office-ah an thukhawm a. An thutkhawm hmasaa an thu rel bawh zuinate an thlirho.

  Lalduhoma chuan, tunhmain sawrkar lam chan chhe tur sa rana Company te nena MoU ziah a lo awm tawh thin. Sawrkarin a chhiatpui loh tur, an duh dana MoU an ziahpui theih chauh hi inremna siampui ila, a thei lo chu ziahpui lo mai ila, tih chu an rilru a ni, tiin sawrkar ngaihdan a sawi a. Chu mi hnuah an zirchianna te report an ngaithlain an sawiho.

  He committee hian June ni 11 khan Sawhthing leh thlai dang processing unit rawn din duh company pathumte draft Memorandum of Understanding endiktu tur mi a ruat a. Company te draft MoU-ah hian sawrkar duh dan chiang taka tarlanna (Expression of Interest) siam ni se, company te hi hriattir thuai ni se, a tul chuan company dang pawh hriattir ni se, an ti.

CEO leh thuthar lakhawmtute inkawm

Aizawl: Vawiin chawhnu khan Chief Electoral Officer Dr. Lalrozama chuan 18.06.2025 khan MINECO a pisa ah thuthar lakawmtute lengah sawmin, Mizoram chhunga inthlanna hrang hrang kalpui danah chak zawka hmalakho dan a sawipui.

  CEO Dr. Lalrozama chuan sorkar laipuia inthlanna kalphung felfai leh tha neihna tura thuthar lakhawmtu media person te an pawimawh thu sawiin, election chu mipui nena inngheng, mipuiin an theihna leh chakna leh dikna chanvo an lantirna hmanrua a nih miau avangin thu dik leh thu pawimawh te, electoral roll kaihhnawih a an hriat tur thu pawimawh tak tak te rang tak leh belhchiandawl taka pekchhuah zung zung a thu thu a sawi a. Chumi atan chuan mediaperson te an pawimawh thu leh thawhhona tha tak neihpui chhunzawm zel an beisei thu a sawi.

MSACS Governing Body thukhawm

Aizawl: June 18, 2025 khan Lalrinpuii, Minister, Health & Family Welfare leh Chairman, Mizoram State Aids Control Society (MSACS) ni bawk kaihhruaiin MSACS Governing Body chu Secretariat Conference Hall, MINECO ah an thukhawm a. H. Lalengmawia, Secretary, Health & Family Welfare, Dr. Jane Rinzuali Ralte, Project Director, MSACS leh Governing Body member-te an tel a ni. 

  Health Minister Lalrinpuii chuan Mizorama mihring awm zat atanga chhutin (prevelance) HIV vei mi 2.73% kan awm mek a, India ram puma a sang ber kan ni chu veiawm a tih thu sawiin HIV do zel turin chak zawk a hma lak a tul thu a sawi a. 

  H. Lalengmawia chuan HIV veite chu ‘The HIV and AIDS (Prevention and Control) Act, 2017’ chuan hna laknaa induhsak lohna (discrimination) lakah a veng a ni tih tarlangin, inthlahrung lova hna dil tur an nih thu a sawi. 

  Project Director Dr. Jane Rinzuali Ralte tarlan danin April 2024 - March 2025 chhung khan Mizorama ART Centre 14 ah HIV vei (People living with HIV) mi 2069 inziaklut thar an awm a, ART dawngte zingah midang hnena kaichhawng thei lo tur (viral suppression) mi 97.7% an awm bawk.

North-East Power Conclave-ah khualzahawm niin tel

Aizawl: Ni 17, June 2025 khan Indian Electrical and Electronics Manufacturers' Association (IEEMA) buatsaih, North-East Power Conclave-ah P&E Minister F Rodingliana chu Khualzahawm niin a tel.

  He Conclave hawnna ah hian P&E Minister F Rodingliana chuan Mizoram sawrkar thil tum pawimawh berte zingah kawlphetha a intodelh hi a tel avangin chu thil tum hlenchhuak tur chuan Mizoram Sawrkar chuan chak takin hma a lak mek thu a sawi a. 

  Mizorama Hydel Project leh Ni zung (Solar) hmanga kawlphetha tam zawk thar chhuak tura hmalakna ah IEEMA memberte tel ve turin a sawm a ni. Ni zung hmanga kawlphetha siamchhuah chungchanga Mizoram Sawrkar hmalak mekna te tarlangin, Solar Plant siamna tur Mizoram hmun hrang hrangah ruahman a ni tawh sawiin, Solar plant bunna tur ramte hi a thlawna hman hawh tur a nih thu a sawi bawk.

Horti minister-in Horticulture Fair 2025 hawng

Aizawl : Horticulture Department buatsaih Horticulture Fair 2025 hawnna program chu June 17, 2025 khan Aijal Club-ah neih a ni a. He hunah hian Horticulture Minister C. Lalsawivunga chu Khuallian niin Fair hi a hawng.

   Best Horticulture Farmer atana thlan mi 11 te hnenah C. Lalsawivunga, Minister leh Ramdinliani, Special Secretary te’n lawmman an hlan.

  Kum danga tih ngai loh Best Performing Horticulture District lawmman pawh siam thar a ni a. District ti tha ber atan Champhai leh Saitual District-te thlan niin, Khawzawl District-in a dawt a, Lunglei District chu pathumna a ni a, Minister chuan District tithate hnenah hian lawmman a hlan a ni. 

  Horticulture Fair hian ni 4 (June 17-20, 2025) chhung a awh a ni.

Mizoram Larsap-in Ropeway Project chungchang a sawipui 

Aizawl: Mizoram Larsap, General (Dr) Vijay Kumar Singh chuan June 17, 2025 khan Ministry of Road Transport and Highways (MoRTH), National Highways Logistics Management Limited (NHLML) leh Urban Development & Poverty Alleviation (UD&PA) Department hotute chu Raj Bhavan-ah kawmin, Sawrkar laipui 'National Ropeways Development Programme - Parvatmala Pariyojana' hmanga Mizorama Ropeway siam a nih theih nana pawimawhte a sawipui. 

  He hunah hian UD&PA Secretary Pu Lalmalsawma Pachuau chuan PowerPoint Presentation hmangin Aizawl khawpui leh a chhehvela Ropeway Corridor hrang hrang din tura ruahmanna siam, 'Ropeways Under Aizawl Sustainable Urban Transport Project (ASUTP)' chungchang a sawifiah a. Aizawl leh a chhehvel 280 Sq. Km-a zauah khawpui tawt tihziaawm nan Comprehensive Mobility Plan siam a nih thu leh hemi hian project hrang hrang -Ropeway, Improve Pedestrianisation, Regional Truck Terminal, Bus & Truck Terminal, Improvement of Bus System leh adangte a huam thu a sawi bawk. 

Lok Sabha MP-in zirlai Scholarship chungchang sawipui

Aizawl : June ni 16 tlai khan Lok Sabha MP Richard Vanlalhmangaiha chuan Ministry of Tribal Affairs Secretary Vibhu Nayar chu a Pisa ah kawmin Mizoram tana hmasawnna awm thei tur thilte leh Zirlai Scholarship chungchang an sawi dun.

  MP Richard Vanlalhmangaiha chuan Mizoram State chu a bik taka enkawl ngai an nih thute sawiin zirlai ten kum tina an dawn thin Tribal Scholarship rawn kal tlai thin chuan zirlaite ten harsatna tam tak a siam thin thu sawi in a hun taka zirlai ten Scholarship an hmuh theihna tura theihtawpa hmalakpui turin Tribal Affairs Secretary Vibhu Nayar hi a ngen nghal bawk a ni.