Kum 78 mi thiin hmu

Aizawl : June ni 17, 2025 atanga chin hriat loha bo H Zathuama (78), Tanhril chu June ni 23, 2025 chhun khan thi-a hmuh a ni.

  H Zathuama ruang hi MZU thlang, ramhnuaiah vawiin chhun dar 12 vel khan hmuh a ni.

  H Zathuama hi ni 17.6.2025 zing khan chawhmeh zawng turin a chhuak a, MZU gate-ah hmuh a ni a, hemi hnu hian chin hriat zui a ni ta lo a, a chenna veng Tanhril khawtlangin an zawn hnuah vawiin atangin Central YMA ruahmanna hnuaiah zawn a ni.

Raltlan buaina siam ching mi 2 haw turin an ti

Aizawl : New Champhai Branch YMA chuan Lalhmachhuana (37) leh Mangkarthanga (20) Falam, Myanmar-te chu Pathianni zan (22.06.25) khan zurui intibuaiin, buaina siamin hriamhrei hial an thawh avangin ni 28.06.2025 (Inrinni) ral hma ngeia Mizoram chhuahsan turin an hriattir a ni.

  New Champhai Branch YMA chuan an huamchhunga raltlan buaina siam ching mi pakhat chu an lo chhuah tir tawh bawk a ni.

Seling daiah silaimu thahnem tak man

Aizawl : June 24, 2025 khan 191 Bn. BSF leh CID (SB), Aizawl tangkawp chuan Seling daiah silaimu thahnem tak an man.

  BSF leh CID (SB) tangkawp hian an thudawn bawhzuiin joint operation an nei a, Bolero pick-up MZ/04 - 1935 atangin silaimu (7.62 mm) 3008, Rs. 16,54,000 man hua chhut an man. Motor hi Lalawithanga (48), Zuangtui, Aizawl nia insawi khalh a ni.

  Bawngkawn Police Station-ah Arms Act hmangin thubuai ziahluh a ni a. He thila inhnamhnawih dangte chu an chhui zui dawn a ni.

Hulhliap short stay kalpui tan

Aizawl : Ruihhlo ngai leh awmna hmun neilote lo enkawl lailawkna Hulhliap (short stay) chu June ni 23, 2025 atanga khan kalpui tan a ni a, mi 200 dah luh an ni.

  Hulhliap Short Stay hi June ni 23, 2025 khan batch khatna bultan niin mi 150 admit tum an nih laiin mamawhna avangin mi 200 chuang dah luh an ni a, social welfare minister Lalrinpuii chuan kohhran leh tlawmngai pawlte chungah lawmthu a sawi.

  Minister sawi danin he hmunah hian ni 10 chhung detoxing an ti ang a, ni 5 chhung psychological counselling an neihpui ang. Ni 5 dang synod revival camping center-ah an lut ang a, chumi zawhah chuan mahni in lama haw duhte chu hawn tir an nih dawn bakah centre a awm duhte chu an awm zuina tur ngaihtuah sak an ni dawn a ni.

Sawrkarin Sawhthing Qtl. 2,15,900 la tawh

ZALEN : ZPM party chhung inkhawm June 23, 2025 -a neihah Agriculture & Farmers Welfare Minister PC Vanlalruata chuan thlai thar market buaipui tak tak tur chuan thlai bawh bik kan neih a ngaih thu a sawi a, nakkum atangin hmunphiah ro chu grade sawi lovin sawrkarin a lei dawn thu a sawi bawk.

  Agriculture Minister chuan, “Sawrkarin direct-a Sawhthing a lak zat hi Qtl. 94,160 a ni a, support price a pek zat hi Qtl. 1,21,740 a ni tawh. June ni 21, 2025 thlenga Sawhthing lak tawh zat belh khawm chu Qtl. 2,15,900 a tling tawh a. Sawhthing rate chhiat ber kumah pawh sawrkarin cheng vaibelchhe 85 chuang a seng tawh a ni. 

  Hmunphiah chungchangah Empanelled Firm ten sawrkar rate anga lei turin an intiam a, an intiam anga an kal leh tak loh avangin kan bul tanna a fuh hlel deuh hlek a, ZOHANDCO kal tlangin kumin March thla chhung khan Sawrkarin Kg. 2,49,828 a lei a. Kum a lo thar ang a, hmunphiah ro chu grade sawi lovin sawrkarin a lei dawn a ni,” a ti.

International Day Against Drug Abuse & Illicit Trafficking 2025 hmang

Aizawl : Social Welfare, Women and Child Development Minister Lalrinpuii chuan June 26, 2025 khan ‘International Day Against Drug Abuse & Illicit Trafficking 2025’ chu Synod Revival Camping Centre, Neihbawi ah khuallian niin a hmanpui a. He hunah hian Excise and Narcotics Department Minister Lalnghinglova Hmar, Minister chu khualzahawm a ni.

  ‘International Day Against Drug Abuse & Illicit Trafficking’ ni hi kum 1987 December thlaa UN General Assembly-in Resolution a pass anga khawvel puma hman zui tak a ni a. Kumin thupui hi ‘Breaking the chains: Prevention, Treatment and Recovery for all’ tih a ni.

Mizoram Police-in Ruihhlo an man te halral

Aizawl : International Day against Drug Abuse & Illicit Trafficking ni 26.06.2025 (Ningani) den chhenin Mizoram Police CID Crime leh Aizawl DEF ten Ruihhlo an man te halralna hun an hmang a. A hnuaia tarlan Ruihlo te hi Zoram Medical College & Hospital, Falkawn-ah incinerator hmangin an halral. 

Name of Drugs  Quantity  Value(in ?)

Heroin  8.224 kg  2,46,72,000

Methamphetamine  87.07 kg  11,31,91,000

Ganja  23.244 kg  1,16,220

Total  118.538 kg  13,79,79,220

  International Day against Drug Abuse & Illicit Trafficking ni 26.06.2025 (Ningani) den chhen hian Mizoram Police te chuan Drugs hmansual dona thutiam PHQ leh Police Department hnuaia Unit zawng zawngah neih a ni a, ruihhlo halralna hun leh Ruihhlo laka fihlim tura zirtirna (awareness campaign) neiin district hrang hrangah hun an hmang a ni.

State Policy Coordination Committee thukhawm

Aizawl : CM Conference Hall-ah June 25, 2025 khan Chief Minister Lalduhoma hovin Mizoram State Policy Coordination Committee te chu an thukhawm a, Handholding Scheme hnuaia progress partner te hnena hmalak mek dinhmun an thlirho.

  Thawh khatnaah hian Loan component-ah dilna hi 11438 a lut a, line department ten 588 an pawm tawh a, pawmsak tawh DPR siamsak ngai 1687 awmin, endik hmabak hi 8249 a awm mek. Dilna 914 erawh chu hnawl (reject) a ni. Reject sakte hi a dil dan dik hrilh a, diltir leh vek dan dap zui tur a ni ang. Dilna pawmsak tawh Bank lama lut tawh zat chu 517 a ni. Chung zinga mi 51 hnenah chuan bank te hian loan an pe tawh

Home 12 hnenah Governor chhawmdawlna hlan

Aizawl : June ni 25, 2025 khan DC Conference Hall, Aizawl-ah Deputy Commissioner, Aizawl Er. Lalhriatpuia, IAS chuan Mizoram Governor-in chhawmdawlna sum- Fahrah, Chanhai leh Chhawmdawl Ngaite Enkawlna In puala a dah chu a Home 12 te hnenah a a sem chhuak.

  TNT hnenah Rs. 27,300/- an hlan a, Home dang zawng hi 25,250/- hlan an ni thung a, a vaiin Rs. 3,05,050/- an semchhuak a ni. 

  Heng Enkawlna In thlanchhuahte hnen atang hian an harsatna hrang hrang, Deputy Commissioner, Aizawl in hma a lakpui theihna tur ang chi te sawi ho a ni.

Pengthuam pathum siam dan tur rawtna thlen

Aizawl : June ni 24, 2025 khan Chief Minister Lalduhoma hmaah PWD Minister Vanlalhlana leh PWD thuneituten Aizawl khawpui chhung kawngpui pengthuam thenkhat siam dan tur an rawtnate an thlen.

  Vanlalhlana chuan hmun pathum Bawngkawn pengthuamah hmun hnih leh Vaivakawn pengthuam te siam dan tur an rawtna te an entir a. An ruahmanaah chuan State Guest House thlanga Chaltlang Road hnuaiah hian Ramhlun main Road leh Ramhlun lower road te tunnel siam a, lei hnuaia inzawm tir a, Bawngkawn Police Station bulah National Highway va zawmtir a ni. He project hi Rs. 25 Cr a thawh theih nia ngaih a ni.

  A ruahman pathumna chu Vaivakawn pengthuam siam a ni. Vaivakawn junction ruahmanna hi tuna Vaivakawn Bazar sak mai tawh tur nen hian kal kawptir a ngai dawn a. Cultural Centre bul hnai atanga YMA ground sir deuh chunga leihlawn, Bazar atana hman theih nghal tur dawh phei a, Vaivakawn Bazar-a va innghahtir a ni. Rs 40 Cr vela sak theih beisei a ni.

IPR&PS Minister-in Media Workshop hawng

Aizawl : June 23, 2025 khan Information & Public Relations, Printing & Stationary Department changtu Minister Dr. Vanlalthlana chuan I&PR Auditorium, Treasury Square-ah, Mizo Language Development Board bul tuma Information & Public Relations, Printing & Stationary Department-in Chanchinbu mite tana a buatsaih, thuthar lakkhawmdan leh Mizo tawng ziah dan chungchanga zirhona (Media workshop for Journalists) chu khuallian niin a hawng.

  Workshop-ah hian Vanneihtluanga leh Dr. H. Laldinmawia te hnen atangin Media chungchang leh Mizo tawng ziah dante presentation hmanga zirtirna ngaihthlak a ni a. Chawhnu lamah I&PR Joint Director Mina Zoliani kaihhruaiin heng thupuite hmang hian sawihona hun neih nghal a ni bawk.

International Day of Yoga 2025 lawmna hun hmang

Aizawl: Khawvel hmun dangte rualin June 23, 2025 khan Mizoramah International Day of Yoga 2025 leh a tum 11-na ni bawk chu, 'Yoga for One Earth, One Health' tih thupui hmanga lawm a ni a. National AYUSH Mission, Directorate of AYUSH bultumin Mizorama a lawmna pui ber chu June ni 21 zingah khan Rajiv Gandhi Stadium, Mualpui, Aizawlah neih niin, Governor, General (Dr) Vijay Kumar Singh, PVSM, AVSM, YSM (Retd) leh Lady Governor Pi Bharti Singh te chuan hmanpuiin, he hunah hian mi 700 vel an tel a ni.

  India ram puma International Day of Yoga lawmna pui ber, Vishakapatnam, Andra Pradesh-a Prime Minister thusawi ngaihthlaka thlir ho a ni a. Hemi hnu hian Common Yoga Protocol hmangin kalkhawm zawng zawng te'n a huhovin Yoga Instructor-te kaihhruaina hnuaiah yoga exercise chi hrang hrang lain, taksa leh rilru sawizawina hun an hmang a. Dr. SR Ngurchamliana, Director, Hospital & Medical Education, Health & Family Welfare Department chuan lawmthu sawiin hun hman hi a khar a ni.

Excise-in Cheng 20,24,77,472.33 man ruihhlo halral

Aizawl : Mizoram Excise & Narcotics Department chuan International Day against Drugs Abuse & Illicit Trafficking chu June 26, 2025 khan India ram leh khawvel ram hrang hranga hman a nih angin, an hmang a, ruihhlo Cheng 20,24,77,472.33 man an halral

  Aizawl –ah chuan ruihhlo an man, Court-in dan anga tih ral a phalsak chinte chu Muallungthu-a F. Rinchungnunga farm-ah an halral a. Lunglei West bialtu T. Lalhlimpuia, MLA, chuan Khuallian niin he hun hi a hmanpui a. He Ruihhlo halral programme hi Commissioner of Excise & Narcotics Z. Lalhmangaiha chuan a kaihruai a. Report kimchang leh Ruihhlo halral zat te Deputy Commissioner of Excise & Narcotics (Enf.) Ngurthanzama Sailo in report a pe a. 

BLO, BLO Supervisor leh ERO te training

Aizawl : Mizoram chhunga Assembly Constituency 40 (sawmli) atanga mi pakhat theuh thlan chhuah BLO 34 (sawmthum pali) leh Supervisor 6 (paruk) an vaiin mi 40 (sawmli) bakah Electoral Registration Officer 5 (panga) te chu Election Commission of India (ECI)-in a buatsaih India International Institute of Democracy and Election Management (IIIDEM), New Delhi-a training turin June 25, 2025 khan Mizoram an chhuahsan.

  Mizoram atanga training tura kalte hi ECI-in training programme a buatsaih meka thawh sawmpalina (14th Batch) a tel turte ni in, June ni 26-27, 2025 chhung khan IIIDEM-ah an training a, training zawh hnuah June ni 28, 2025 (Inrinni)-a Mizorama rawn let leh tura ruahmanna siam a ni.