AMC inthlan hun puang

Aizawl: Mizoram State Election Commissioner Dr. H Lalthlangliana chuan march 18, 2026 khan Aizawl Municipal Corporation (AMC) inthlan hun a puang.

  SEC hian a office-ah thuthar thehdarhtute kawmin, AMC inthlan hun (vote thlak ni) atan April 21, 2026 ruat a ni tih a puang.

  AMC inthlan atan hian INC leh MNF chuan an candidate an lo puang tawh a, ZPM in March ni 23, 2026-ah an puang thung ang.

  Inthlan puan a nih avang hian AMC huamchhungah model code of conduct hman nghal tur a ni.

Schedule of Election

Announcement of election by SEC - March 18

Last date of filling nomination - March 25 (upto 3 pm

Scrutiny of nomination & allotment of symbol - 27 March

Last date of withdrawal of candidate - 30 March

Date of Poll - 21 April (Tuesday) 7:00 AM - 5:00 PM

Date of re poll, if necessary - 23 April

Counting of votes - 27 April (8:00 AM)

Jordan Center hlanna tura inremna ziak

Aizawl : March 18, 2026 khan Lalrinpuii, Minister, Social Welfare, Women & Child Development Department hovin a pisaah Jordan Center, Sethawn Mizoram Synod kuta hlanna tur inremna (Memorandum of Agreement) chu ziah fel a ni.

  He inremna ah hian Commissioner & Secretary, Social Welfare, Women & Child Development Lalzarmawii, IAS leh Rev. John Raldosanga, Moderator, Mizoram Synod ten hming an ziak a, hriatpuituah Sawrkar lam atangin Zonunthari, Joint Secretary, SW&WCD leh Caroline Hmingthanzuali, Joint Director, Social Welfare ten hming an ziak a, Mizoram Synod lamah Rev VL Luaia, Hranleh, Sr. Executive Secretary leh Rev. Dr. K.Lallawmzuala, Executive Secretary ten hming an ziak bawk.

  He inremna ang hi chuan Jordan Center hi Mizoram Synod enkawl turin kum 15 atan hlan a ni phawt ang a. Kumtin Sorkarin tanpuina (Grants-in-Aid) nuai 50 a pe ang a, kum 2 danah 5% a tihpun thin tur a ni dawn a ni. He hmunhma hi ruihhlo avanga harsatna tuarte tan De-Addiction emaw After Care anga kalpui tur a ni dawn a ni.

International Women’s Day 2026 lawmna hmanpui

Aizawl : Chief Minister Lalduhoma chuan March 18, 2026 khan IWD Organizing Committee, State Hub for Empowerment of Women (SHEW), Directorate of Women & Child Development-te buatsaih, International Women’s Day 2026 lawmna hun chu Dawrpui Multipurpose Centre-ah khuallian niin a hmanpui a. He hunah hian Lalrinpuii, Minister, Social Welfare, Women & Child Development Department chu khualzahawm a ni bawk.

  He hunah hian NGO hrang hrangte, kohhran hrang hranga hmeichhe pawlte, Mizoram State Commission for Women (MSCW), Women’s Study Centre MZU, pavalai/mipa pawl, Mizo hmeichhe Padma Shri dawng tawh – B. Sangkhumi leh K.C. Runremsangi te, Zakapa Award dawng tawh – Dr. Lalrinawmi leh Khawlrinpuii te, K Thansiami, ex-MLA te leh midangte an tel a. Minister Pi Lalrinpuii’n Women Icon Award a dawn lawmpuina pawl hrang hrang aiawha hlan a ni.

  Kawng hrang hranga Mizo hmeichhia hlawhtlinna changte hnenah lawmpuina hlan niin, Miss Grand International, 1st Runner Up 2025 Vanlalnuntluangi kaihhruaiin IWD Pledge chham a ni a. MHIP President Lallian-i'n lawmthu sawiin hun a khar a ni.

  Kumin International Women’s Day thupui chu GIVE TO GAIN tih a ni a - Mizo tawng chuan PEKIN LUKHAWNG A NEI tia lehlin a ni.

Lammual Master Plan - Early Bird Project hawng

Aizawl : Assam Rifles chhuahsan ram Heritage Court tlangah March 17, 2026 khan Aizawl khawpui chei tharna hnathawh bul tanna lungphun Chief Minister Lalduhoma'n a hawng a. UD&PA Minister K. Sapdanga bakah, Speaker, Minister leh MLA eng emaw zat an tel.

  AR ram chei thatna tur Master Plan hi UD&PA chuan a duang a, ruahmanna an siamte chu Advisory Committee hmaah chhawp chhuah niin a tul angin an siam tha a. Advisory Committee-in a pawm tawh te bawhzuitu tur Steering Committee an awm leh a ni. Advisory Committee meeting neihte Press Release hi I&PR website-ah dahchhuah zel thin an ni.

  Ruahmanna tlangpuiah chuan Aizawl Khawpui Chei Tharna Lungphun-a awm tur te chu : PWD - Heritage Court - 13.18 crore, Kawng zauh (Treasury to Bazar Bungkawn); P&E Dept. - 38 KV Sub-Station - 22.36 crore, Power whitin Lammual - 09.20 crore ; UD&PA Dept. - Vanapa Hall & Park, Aizawl Square - 56.82 crore leh PHED - Reservior - 04.00 crore te a ni.

  March ni 15, 2025 khan Assam Rifle ram hi official-a Mizoram sawrkara hlanna neih a ni a. A kum khatna chamah a chei tharna hna kutthlak tanna neih a ni dawn a ni.

Larsap-in China Studies Team-te a kawm

Aizawl : Mizoram Larsap General (Dr) Vijay Kumar Singh, PVSM, AVSM, YSM (Retd) chuan India hmarchhak state-te tlawha lokal Centre for Contemporary China Studies (CCCS) Multi-disciplinary Team, Ministry of External Affairs-te chu March 17, 2026 khan Lok Bhavan, Aizawl-ah a kawm.

  CCCS Team Aparna Ray, Joint Secretary, CCCS & PPR, Ministry of External Affairs chuan hovin nih hnih cham turin nimin khan Mizoram an lo thleng a. Larsap hnenah hian an thil hmuh leh hriatte an hrilh a, zawhna an neihte zawtin hun hlawkthlak tak an hmang a ni.

  Centre for Contemporary China Studies (CCCS), hi Ministry of External Affairs thluak bur pawimawh tak niin, China dinhmun leh hmalaknate zirchianga a tul anga Sawrkar Department hrang hrangte hnena hmalak dan tur kawhhmuha thurawn petu a ni.

Mizorama Football Stadium tha ber hawng

Aizawl : Aizawl Smart City Limited hmalaknaa din Durtlang Football Stadium, cheng vaibelchhe 22.3 hu a siam chu March 17, 2026 khan Urban Development & Poverty Alleviation Minister K. Sapdanga’n a hawng. 

  Hawnna inkhawm hi UD&PA Secretary Lalmalsawma Pachuau-in a kaihruai a, Aizawl North-1 bialtu MLA, PWD Minister ni bawk Vanlalhlana; Sports & Youth Services Minister Lalnghinglova Hmar leh Jeje Lalpekhlua, MLA ten hun hmanpuiin, Sawrkar mi pawimawh te, MFA hruaitute leh Durtlang khawtlang hruaitu mi thahnem tak an tel bawk.

  Sports Minister Lalnghinglova Hmar chuan Durtlang Football Stadium hawn thar chu Mizorama Football Stadium tha ber a nih thu a sawi. Report-a tarlan a nih danin Durtlang Football Stadium sakna atan hian a pumpuiah ?22,30,75,000/- sen niin, Smart City Mission, GoI atangin ?20,07,67,500/- hmuh a ni a, Mizoram Sawrkarin ?2,23,07,500/- a tum ve bawk a ni. 

  A satu (contractor) atan hian M/s Biakliana & Sons te rawih an ni a. November ni 30, 2022 khan sak tan niin, March ni 9, 2026 khan sak zawh fel a ni a, vawiin hian mipui hman theih tura hawn a ni ta a ni. Field zau zawng ground area hi 110m x 68m niin FIFA Certified Artificial Grass pile height 60mm phah a ni bawk.

Tractor 25 leh hmanraw chi hrang hrang a vailiam

Aizawl: Agriculture & Farmers' Welfare Department Minister P.C. Vanlalruata chuan March 17, 2026 khan Zonun Enterprise, Silaimual, Melthum atangin Group of Farmers leh mimal 6 (paruk)-te hman turin Custom Hiring Centre hnuai atangin Tractor 25 leh hmanraw chi hrang hrang a vailiam.

  Kumin hian Tractor leh leilehna hmanrua 61 (sawmruk pakhat) sem tura ruahman niin, he'ngte hi Sub-Mission on Agricultural Mechanization (SMAM) scheme hnuaia sum hmuh atanga pekchhuah tur a ni a. CHC pakhat zelah khawl leh hmanraw leina turin sawrkarin 95% (hei hi cheng nuai 14.25) vel thleng a tumsak thin a. 5% chu loneitute (Group of Farmers) tum ve tur a ni a. An tractor lak duh azirin sawrkarin tractor man atana a sum sen hi a danglam thin bawk.

UD&PA Minister-in bawlhhlawh paih motor vai liam

Aizawl : March 17, 2026 khan Open Gym, MINECO ah Urban Development & Poverty Alleviation Minister K. Sapdanga'n Swachh Bharat Kosh (SBK) Trust kaltlanga lei bawlhlawh paih motor 12 a vai liam.

  Swachh Bharat Kosh Trust hnuaiah hian Rs. 1.68 crore (Cheng Nuai za sawmrukpariat) dawn a ni a, hemi hmang hian bawlhhlawh phur lirthei 12 lei niin - Farkawn, Kawrthah, Ngopa, Phullen, W. Phaileng, Saitual, Mamit, Khawzawl, Hnahthial, Lengpui, N.Vanlaiphai leh SSO Office, Aizawl te pek an ni a, registration tih fel sa vek niin document pawimawhte pawh hlan nghal an ni a, heng truck-ah hian PA set (aurinna) leh GPS Tracker dah vek a ni.

  Heng Garbage Truck bakah hian a chunga tarlan khaw 12 a Sanitation Workers te hman turin Rain Coat - 2, Gloves (kutkawr) - pair 14, Mask – 12, Gumboot - pair 4, hunter boot - pair 2, kekawr - 6, Cap (lukhum) - 2, T-shirt - 4 leh kawrlum - 2 theuh pek an ni bawk.

World Consumer Rights Day 2026 pualin hun hmang

Aizawl: Food, Civil Supplies & Consumer Affairs (FCS&CA) Department chuan ‘World Consumer Rights Day 2026’ pualin March 17, 2026 khan Dawrpui Multipurpose Centre-ah programme an buatsaih a. FCS&CA Department Minister B. Lalchhanlova chuan he hun hi khuallian niin a hmanpui.

  Kumdangah chuan World Consumer Rights Day hi March ni 15-ah hman thin a ni a, amaherawhchu kuminah March ni 15 hi Chawlhni a nih bakah, Mizoram Legislative Assembly Budget Session ni 16 thleng neih a nih avangin, March 17 khan Aizawl bakah District Headquarters tinah a rualkhai-in World Consumer Rights Day 2026 hmanna hi neih a ni a. Kumin atana thupui (theme) thlanchhuah bik chu ‘Safe Products, Confident Consumers’ tih a ni.

State Resource Centre for HIV/AIDS Building hawng

Aizawl : H&FW Department Minister Lalrinpuii chuan March 17, 2026 (Thawhlehni) hian State Resource Centre for HIV/AIDS Building thar a hawng.  

  Mizoram State AIDS Control Society in chak zawka hma an lak theih nan anmahni pual bik Building “State Resource Centre for HIV/AIDS” hmun, Mizoram New Capital Complex (MINECO) ram chhunga mi hi 445.23 Sq. Metre a zau a ni a, MINECO Management Committee-in July 29, 2020 a pek a ni. A building hi Ministry of Development of North Easter Region (MDoNER) fund atangin Rs. 4,00,00,000/- (Cheng Vaibelchhe Li) a sak a ni. 

  Building hawnna programme-ah hian Dr. Jane R. Ralte, Project Director, MSACS chuan Lalrinpuii, Hon’ble Minister, H&FW Department hnenah “Women Icon Award” a dawn avanga lawmpuina thilpek a pe a, Minister hian MSACS Project Director lo ni tawh thin te hnenah chawimawina thilpek a hlan bawk.

Vawikhat nan ‘LEMCHAN – Mizoram Film Festival 2026' nei 

Aizawl: Ministry of Information & Broadcasting, National Film Development Corporation leh Directorate of Information & Public Relations, Govt of Mizoram tangkawp ten Mizorama a vawi khatna atana an buatsaih, ni thum awh ‘Lemchan – Mizoram Film Festival 2026’ chu March 16, 2026 khan I&PR Office, Treasury Square-ah neih tan a ni. 

  Hawnna inkhawm hi B. Lalchhanzova, Minister, Information, Public Relations, Printing & Stationery (IPRP&S) Department chuan Mini-theatre, Lianchhiari Run-ah hmanpuiin, festival hi a hawng nghal a ni.

  Festival chhim tura sawm, Bollywood film engemaw zata chang tawh, Lilette Dubey pawhin festival hawnna inkhawmah hian thu sawiin, Mizoram Film Festival chhim tura sawm a ni chu lawmawm a tih thu a sawi a. Gouri Nair, Head, Domestic Film Festival, NFDC pawhin thusawiin, he festival hi Mizoram leh North-east region-a film lama hmasawnna thlentu pawimawh tak ni se a tih thu a sawi.

END ten Golden Jubilee lawm

Aizawl: Excise & Narcotics Department Minister Lalnghinglova Hmar chuan Excise & Narcotics Department Golden Jubilee hawnna chu Conference Hall, Commissionerate of Excise & Narcotics, Aizawl-ah a hmanpui a, Golden Jubilee Monument a hawng nghal.

  Excise & Narcotics Department hi kum 1976, March 15 khan bul tan niin a tirah chuan Excise & Taxation Department tih a ni a, hun kal zelah Excise Department tiha kalpui a nih hnuah kum 1996 khan Excise & Narcotics Department tia kalpui a ni. 

  Excise & Narcotics Department Golden Jubilee lawmnaah hian Thawhtanni tlai dar 5:30 khan 'Golden Jubilee Mei Det programme' chu Commissioner of Excise hovin hman a ni a. March ni 18, Nilainiah Aizawl leh District dangahte Golden Jubilee pual a thisen pek runpui neih a ni. March ni 19 khan Excise & Narcotics Department a thawktu hluite nen 'A Day with Pensioner' hun hman a ni ang a, March 20 khan Golden Jubilee kharna hun hman a ni.

MUHCS 2.0 leh MUHCS Call Centre hawng

Aizawl : March 16, 2026 khan Assembly Annex Conference Hall-ah Assembly House Session chhun chawlh laiin Chief Minister Lalduhoma chuan kum 2026-27 sawrkar kum chhunga kalpui tur Mizoram Universal Health Care Scheme 2.0 leh MUHCS Call Centre a hawng.

  A hawnna inkhawmah hian Health Minister Lalrinpuii chu khualzahawm a ni a, Speaker, Minister, Adviser to CM leh MLA eng emawzatten an telpui.

  MUHCS 2.0 atan hian budget tharah hian Rs. 130 Cr. dah a ni a, sawrkar hnathawk contribution hi Rs. 26.42 Cr vel a ni a, Asian Development Bank atangin Rs. 800 Cr chuang puk a ni a, MUHCS 2.0 hi a hma aia tha zawka kalpui tum a ni.

  Inziah luh hun hi April ni 15, 2026 thleng hawn tur a ni a, May thla khar a ni ang a, June thlaah thla khat chhung “Grace period” hawn leh a ni ang. Grace period-a inziah luhna man erawh chu hun pangngaia inziah luh man aiin zaa sawmnga (50%) in a sang tawh ang.

  MUHCS 2.0 hi April ni 1, 2026 atanga kalpui tan a ni ang.

Chief Minister-in Thangram Cultural Meet hmanpui

Aizawl: March 19, 2026 khan Ronpur, Assam-ah Thangram Indigenous Peoples Movement (TPIM) leh MZP General Headquarters tangkawpin an buatsaih Thangram Cultural Meet 2026 chu neih a ni a. Chief Minister Lalduhoma chuan khuallian niin a hmanpui.

  Kumin Thangram Cultural Meet hi a vawi hnihna a ni a, thupuiah, "Unau kan ni" tih chu hman a ni.

  Thangram tih hi Khawthlang ram (Thlang ram) tihna a ni a. Mizo thlang tla hmasate luah ram niin tunah hian khaw 24 vel leh mihring singthum vel an awm mek a. Heng rama cheng zo hnahthlak hnam parukte hian Thangram Indigenous Peoples Movement dinin kawng hrang hrangin hma an la mek a ni.