HSLC Top 10 a tling Mizo zirlai 22 te chawimawi

Aizawl : Mizo Zirlai Pawl (MZP) General Headquarters, Aizawl chuan may 7 khan High School Leaving Certificate (HSLC) Examination 2025 Top 10-a Mizo tlingte chawimawina hun Vanapa Hall-ah a buatsaih a, Home Minister K. Sapdanga chuan Khuallian niin hun a hmanpui.

  HSLC 2024 Top 10-a Mizo tling chawimawite hi mipa 13 leh Hmeichhia 9 an ni a. Zirlaite hi chawimawina thuziak, topper cheng 10,000/-, 2na atanga 10na cheng sangnga 5,000/- theuh hlan an ni a. F. Vanlalrochana lehkhabu ziah 'Chhungril chakna' leh Lalhmachhuana Zofa lehkhabu ziah 'Mizoram GK Mini Edition' leh 'Duhthusam Ram' Lehkhabute hlan an ni.

  MZP chuan HSLC Top 10 a Mizo tlingte chawimawina hi kum 1995 atangin kumtin a buatsaih thin a. kumin HSLC Top-10 chawimawina dawng te hi K.D High School, Govt. Mizo H.S, CLS Academy, St Joseph H.S.S., Mt. Carmel School, Greenland H.S.S., St. Paul's H.S.S. leh Baptist H.S.S., Serkawn atanga Mizo zirlai 22 te an ni.

Ruihhlo tawlha inhnamhnawihte leh an chhungte hnawt chhuak

Aizawl : Ruihhlo tawlha inhnamhnawih mi 4 leh an chhungte chu Champhai Kanan Branch YMA chuan May 5, 2025 khan an veng chhung atangin an hnawt chhuak.

  Champhai Excise & Narcotics Dept chuan Heroin Hawng 4 leh a neitua puh mi 3 - Siangremthanga, Hrangthanpuia leh Siangremmawii te an man a, an chhui zuina kal zelah Nokhenthanga an man zui leh a, thu an zawhfiah hnuah Nokhenthanga tih loh mi 3 te hi Lung inah khung nghal an ni.

  Hemi chungchangah hian Champhai Kanan Veng Branch YMA chuan thuchhuah siamin Champhai Excise & Narcotics Dept-in ruihhlo an mana inhnamhnawiah puh mi 4 te hi Champhai Kanan Venga raltlana awm mek an ni a. Raltlan ni mah se, sawrkar leh YMA te duh loh ruihhlo hmanga sumdawnnaa inhnamhnawih an nih avangin an chhungte chu May ni 7, 2025 ral hmaa Myanmar-a haw turin an hriattir a, an mahni pawh Lung inah khung nghal a, an chhuah hnuah Myanmara haw nghal turin an hriattir bawk a ni. 

Buhtuh lai chau thutin thi

Aizawl : May 5, 2025 chawhnu dar 02:00 vel khan Lalngaizuala (67) h/o Chawngthasiami, Darlawn Venghlun chu loa a buhtuh lai chau thutin a thi.

  ZALEN thudawn danin, Lalngaizuala hi BP hniam nei thin a ni a, tukin lam pawh khan a BP hniamin, a nupui nen lo lamah buhtuhin an feh chu luhai nei thutin, thlam lama kalpui an tum laiin a thi.

  A ruang hi tlaivarpui a ni a, Thawhlehni chhun dár 12:00-ah vui a ni.

"Lalpan min ko ta, Zoram Pavalaite" phuahtu vui liam

Aizawl : "Lalpan min ko ta, Zoram Pavalaite" tih hla phuahtu John Zorammawia (42), Bethlehem Vengthlang chu 5.5.2025 zing dar 04:10 khan Civil Hospital Aizawl-ah Phneumonia avangin a thi a, chawhnu dar 1 khan a chenna in, Bethlehem Vengthlang ah vui liam a ni.

  John Zorammawia phuah "Lalpan min ko ta, Zoram Pavalaite" tih hla hi Bungzung Kohhran Pavalai Pawl ten mawi tak maiin an sa a, Mizoram hla ngaihthlak hlawh leh sak hlawh ber pawl a ni.

  John Zorammawia hi Supply Department-ah store keeper a ni a, Bualpui Ng, Lawngtlai District-a post lai a ni.

Consumer Protection Council thukhawm

Aizawl : May 8, 2025 khan Consumer-te dikna chanvo humhalhna tur ngaihtuahin, Consumer Protection Council chuan thutkhawmna an nei a. Food Civil Supplies and Consumer Affairs Department Minister B.Lalchhanzova, , chuan he hun hi kaihruaiin Lalchhuanthanga, MLA leh Pu K. Hrahmo, MLA ten an telpui. 

  Teresy Vanlalhruaii, Secretary, FCS&CA chuan thupui hrang hrang lute sawi zauna hun hmangin, Mizoram Consumer Union, Centre for Consumer Education, All Mizoram Farmers' Union, Central YMA, MHIP, Mizoram Merchant Association, Health & Family Welfare, Power & Electricity Department, Law & Judicial department, Transport Department, BSNL leh Legal Metrology-a thawktute an tel a ni.

Artui tharchhuahna hmun tur lungphum

Aizawl : Chief Minister Lalduhoma chuan May 8, 2025 khan NABARD RIDF sum senga din tur Thenzawl AH & Vety Farm-a Artui tharchhuahna hmunpui lungphum a phum a, Dilpuia Bailey Bridge dawh tur lung phumin Mizo Sial vulh punna hmun a hawng bawk. 

  Dr. F. Laltanpuia, Jt. Director, AH & Vety-in technical report a pe a. Artui tharna farm an buatsaih turah hian Arpui nuaih khat awm thei tur leh nitin artui singsarih sang nga vel thar thei tura duan a ni. A thawhna tur fund hi NABARD RIDF Rs. 20.64 Cr dah a ni.

  Mizo Sial vulh punna Centre hi Rashtriya Gokul Mission (RGM) 2023-2024 sum Rs. 430.00 lakh senga din a ni a. Civil Works bikah Rs. 253.50 lakh dah a ni.

  He hunah hian Minister pahnih C. Lalsawivunga leh Prof. Lalnilawma bakah V. Malsawmtluanga, MLA ten an telpui.

Quality of Care leh Human Resource for Health chungchang sawiho

Aizawl : Mizoram Health Systems Strengthening Project (MHSSP) buatsaihin May 8, 2025 khan World Bank aiawhte leh Health and Family Welfare Department hotuten damdawiin inrelbawl dan leh damlo enkawlna tha zawk neih chhunzawmna tur leh thawktu indaihlohna avanga harsatna sutkian dan tur sawihona an nei.

  Hemi hunah hian World bank lam atangin Dr. Aarushi Bhantnagar, Health Economist, Dr. Lincoln Chowdhury, Consultant leh Mr. Ranjeeth B Kumar, consultant te telin, Health department atangin Principal Director office, Directorate of Health Services, Directorate of Hospital and Medical Education, Directorate of AYUSH, Directorate of Nursing, ZMC-H, CMO Aizawl East leh West atang tein an kalkhawm a ni. 

Governor-in National Workshop on AI-Driven Financial Empowerment for Mizoram hawng

Aizawl : Mizoram Larsap General (Dr) Vijay Kumar Singh, PVSM, AVSM, YSM (Retd), Chief Rector, Mizoram University (MZU) chuan May 7 khan Department of Science & Technology, Govt. of India, MZU leh IBITF, IIT Bhilai tangkawp buatsaih ni hnih awh tur, 'National Workshop on AI-Driven Financial Empowerment for Mizoram' chu MZU Auditorium-ah Khuallian niin a hawng. 

  Larsap hian Sawrkar laipui Department of Science and Technology hnuaia Tribal Area Sub Plan Scheme hmanga project leh entrepreneur tanpuina pekte tarlanna booklet a tlangzarh nghal bawk.

  He huna tarlan a nih danin Department of Science and Technology (DST) kaihhruaina hnuaiah National Mission on Interdisciplinary Cyber-Physical Systems (NM-ICPS) chuan IIT Bhilai hnenah Technology Innovation Hub (TIH) host turin sum a pe a. Tunah hian IIT Bhilai hian Financial Technology huangah Mizoram University tan project 6 leh NIT Mizoram tan project 5 a ruahman a ni. 

Tlawng lui nut chhan chungchang sawiho

Aizawl : Public Health Engineering (PHE) Minister Prof. Lalnilawma hovin May 6 khan PHE Department hotu rualte, Disaster Management & Rehabilitation Department hotute, Aizawl Municipal Corporation aiawh te leh tlawmngai pawl 3 – Central YMA, Centre for Environment & Social Justice (CE&SJ) leh Save The Riparians hruaitute chuan tunhnaia Tlawng lui nu vak chungchang an sawiho.

  Aizawl khawpui mai nilo Mizoram khaw tam tak tan Tlawng lui chu innghahna anih avangin Tlawng dunga lui te leh tui hnar te humhalhna chu Department mal ni lovin High Level Committee ah sawiho nise ti a rawt a ni.

  PHE Department in meeting ah an tarlan danin April thla leh May thla(vawiin thlengin) ni 4 ve ve chhungin tui a nut avangin tui an pump tam thei lova. Tui nu turbidity tehna NTU tia sawi a, 5NTU aia sanglo tur chu tui intlak a ngaih a ni a, tui a nut lain turbidity ni 900 – 1400 inkar te ni thin a, hemi vangin tui tih thianghlim chu hna hautak leh khawl ten a tawrh theih avangin tui pump theih zat nasa takin heng hunlaia a tlakhniam thin te an tarlang a ni.

Aizawl khawpui Drone Survey na tur vailiam

Aizawl : Land Revenue & Settlement Minister B. Lalchhanzova chuan May 6 khan Mualpui Helipad-ah sawrkar laipui pilot project "National Geospatial Knowledge-based Land Survey of Urban Habitations" (NAKSHA) hnuaia Aizawl chhim lama Municipal ward pakua (Ward XI – XIX) veng 43 huam drone survey na tur a flag-off.

  NAKSHA programme kaltlang hian India ram puma khawpui 153 thlan chhuah bikah Land Record tha zawk siam tum a ni a. Mizoram pilot atan hian AMC Ward 11-19 (veng 43) thlan an ni a, bul tan nan Ground Control Points te siamin Helicopter-in LiDAR leh Photogrammetry survey neih a ni tawh a. Tunah hian Drone hmangin thla lak a ni leh ang a; chumi a Map an rawn siamchhuah (generate) hmangin leilunga endikna Ground truthing kalpui leh a ni dawn a ni. 

Seminar On Mizo Foodways hawng

Aizawl : Tribal Research Institute, Art & Culture Department bul tumin Department of History, Govt.’ Aizawl West College leh Department of History, Pachhunga University College te tang hovin an buatsaih ni hnih chhung awh Mizo ei leh in chungchang zirchianna - ‘International Seminar On Mizo Foodways: Cultural Traditions, Societal Transformations, and Political Dimensions Across Time chu May 6 khan Government Aizawl West College-ah neih tan a ni a. 

  C. Lalsawivunga, Minister, Art & Culture department chuan Khuallian niin a hmanpui a, Seminar hi a hawng nghal bawk a ni. Minister chuan seminar kaltlanga Mizo food culture zirchianna chuan kan nihphung, kan culture leh tradition kan zir leh hriatzauna kawngah rah tha tak a chhuah ngei a beisei tih tarlangin, sawrkar pawhin Mizo tobul leh culture te chhui a, zirchiang turin Research Committee te pawh Chief Minister hmalaknain ama ho ngeiin din chhoh mek a nih thu a sawi.

Assam Rifles Ram Advisory Committee thukhawm

Aizawl : May 5, 2025 khan CM Conference Hall-ah Chief Minister Lalduhoma kaihhruaiin Assam Rifles Ram Advisory Committee te an thukhawm.

  Meeting hmasa ber a nih angin member ten inhmelhriattirna an nei a, Vanlaldina Fanai, Commissioner, GAD, chuan AR ram chhuahsan taka hmalak chhoh dan sawifiahna a nei. Depreciated cost of buildings ah hian Rs. 5 Crore vel pek a ngai dawn nia a lan thu a tarlang. Er. Lalhriatpuia, DC Aizawl pawhin tun hnaia Zokhawsang leh Lammual chhehvel joint verification a neih report te a pe bawk.

  UD & PA department lamin Master Plan an lo duan chhin pawh an thlir ho va, a tul anga thlir ho leh atan an dah.

Mizoram LS MP-in National Commission for Schedule Tribe Chairman a hmu

Aizawl : Mizoram a lo tlawh tuma a sawmna bawhzuiin, May 5 khan Lok Sabha MP Richard Vanlalhmangaiha chuan, National Commission for Schedule Tribe Chairman Antar Singh Arya chu Delhi-a a office-ah hmuin, inkawmna hun tha tak an nei a ni.

  Mizoram MP hian Mizoram mai nilo, India hmarchhaka tlangmi (mi nuaih 50-60 vel) ten harsatna hrang hrang an tawhte a sawipui a. Chung zinga pawimawh zual zingah, income tax act section 10(26) in tax a awl lai a, sumdawng thenkhat leh mi tam takin Income tax Office atangin ba thinna an dawng thin te, sipai bangte pension hlawh atanga income tax cut a nih thin bakah, central/bank office-a thawk Schedule Tribe ni si ten, an hlawh atanga TDS (Tax Deducted at Source) cut thin a nih thute a hrilh bawk a. Income tax lampang chuan nil return file thin tura an tih thute leh hei hian tlangmite tana harsatna a siam thute a thlen.

CM leh FA Airlines hotu inkawm

Aizawl : Chief Minister Lalduhoma chuan May 5 khan FA Airlines Managing Director Prof Fauzia A.A Arshi a kawm a, Mizoram nena thawhhona tur ruahmanna an rawn neih te a sawipui.

  Chief Minister hian, Cargo lama thawhhona neih hi tha a ti a. An rawtnate chipchiar taka hriat hmasak a ngai tiin ziakin kimchang taka thehluh ula a tha ang, tiin FA Airlines ten Mizoram sawrkar thawhpuia an sawmna hi a lo chhang a.   

  Prof Fauzia Arshi hian Mizoram chu khualzin ten awlsam zawka an tlawh theih nan te, Mizoram thar chhuah organic thlai zau zawka zawrh chhuah nan te, a tul ang zelin Aizawl khawpui zauh hna emaw khawpui thar din kawngah pawh, Mizoram sawrkar nena thawh dunna neih an duh a, sum leh pai senna tur thil a awm vak lo vang, sawrkar kha thawhpui an duh a ni ber a, fund chu an nei a ni, tiin Chief Minister hi a hrilh a ni.