Poppy chi nuai 700 chuang man leh Kuhva rah nuai 90 man AR leh DRI ten man

Aizawl : Assam Rifles leh Department of Revenue Intelligence (DRI) te chuan an thudawn bawhzuii Poppy chi cheng nuai 700 chuang man leh Kuhva rah nuai 90 chuang man an man.

   Team pahnih te Poppy chi leh Kuhva rah hi Vairengte, Mizoram-a godown pakhat atanga an man a ni a, Poppy man chiah hi nuai 7,04,00,000 niin chhut a ni a, Kuhva rah hi nuai 90 man niin an chhut a, heng an thil man te hi Department of Revenue Intelligence, Aizawl kutah hlan nghal a ni.

Buichali leh Sairang inkar kawng tlawh

Aizawl : PWD Minister Vanlalhlana hovin Buichali leh Sairang inkara kawng chhe zual lai te chu May 21, 2025 khan Public Works Department (PWD) a thawktute, National Highways and Infrastructure Development Corporation (NHIDCL) a thawktute, Mizoram Truck Owners Association (MTOA) leh MTDA aiawhte nen a hmun ah kalin an enfiah a ni.

   PWD Minister chuan NH06 chu Mizoram chak lakna kawngpui pawimawh ber te zinga mi a nih angin, engtik lai pawha lirthei zawh tlaka siam a tul thu a sawi a. NHIDCL hotute chu mipui, a bikin lirthei hmanga eizawng ten harsatna an tawh dante hrilhfiahin, tun aia chak lehzuala kawng siam hna kalpui turin a chah.

Medal la te lawmpuina hun a hmang

Aizawl : Sports & Youth Services Minister Lalnghinglova Hmar chuan May 21, 2025 khan MINECO-a a office chamber-ah Khelo India Youth Games 2025-a Boxing a gold medal la Samuel Zadeng leh Football (Boys) a bronze medal la te lawmpuina hun a hmang.

   May 4 atanga ni 15 inkara Patna, Bihar a neih, Khelo India Youth Games a medal latute lawmpuinaah hian Minister chuan, "Mizoram in gold medal kan la tih ka hriat khan ka lawm hle a, a chhan chu national level-ah chuan medal lak hi thil harsa tak a ni. Sports hmasawnna chu sports person-ah a lang tur a ni a, medal lak dan zel an en avangin medal lak hi a pawimawh a ni," a ti.

Union Minister-in PM Shri Govt. Model English Primary School tlawh

Aizawl : Union Minister of State for Skill Development & Entrepreneurship and Education Jayant Chaudhary te nupa chuan May 21 khan Chanmari, Aizawl-a PM Shri Govt. Model English Primary School, Chanmari an tlawh.

   Union Minister hi classroom-ah te lut kualin naupangte nena inbiakna hun te a hmang a. Classroom-ah hian naupang thenkhat bulah te thuin an sikul chanchin te a zawt a, zirtirtute pawh an thawh dan thenkhat a zawt bawk. Ei siamna hmun te a fangkual a, chaw chhumtute nen pawh an inkawmin an eisiam dan te a zawtin an thawk tha nia a hriat thu a sawi a ni.

Ziak leh chhiar thiam vekna state-ah a puang

Aizawl : Chief Minister Lalduhoma chuan May 20, 2025 khan Mizoram chu ziak leh chhiar thiam vekna state-ah a puang a, India ramah Mizoram chu ULLAS hmalakna hnuaia ziak leh chhiar thiam vekna state hmasa ber a ni.

   A puanna leh lawmna inkhawm MZU Auditorium-a buatsaihah hian Jayant Chaudhary, Union Minister of State for Education leh Dr. Vanlalthlana, Education Minister te chu khualzahawm an ni.

   Sorkar laipuia Ministry of Education hnuaia Understanding Lifelong Learning for All in Society (ULLAS) hnuaia ziak leh chhiar thiam vekna state ni tur hian state chhung mipui awm zat atanga teha ziak leh chhiar thiam zat chu zaa 95 aia tam nih a ngai a, he tehfung atang hian Mizorama ziak leh chhiar thiam zat chu Periodic Labour Force Survey (PLFS 2023-2024) ah zaa 98.2 a ni ta a. Tun hnaia ULLAS hmalaknaa ziak leh chhiar thiam lo zat zawn chhuahnaah ziak leh chhiar thiam lo chu tlemte an nih tawh avangin ULLAS tehfung atangin Mizoram chu ziak leh chhiar thiam vekna state tia puan theih a lo ni ta a ni.

Alternate Gravity Water Supply Scheme of Aizawl hawng

Aizawl : Public Health Engineering Department Minister Prof. Lalnilawma chuan May 20, 2025 Muallungthuah NESIDS OTRI hnuaia hmalakna 'Alternate Gravity Water Supply Scheme of Aizawl' chu khuallian niin a hawng a.

   Technical report-a tarlan danin he project hi NESIDS funding hnuaiah cheng Vaibelchhe 117.3035 seng a siam a ni a, a hna hi Kram Infracon Pvt leh Vikas Associates te tangkawp thawh a ni. He project ah hian tui litre Vaibelchhia 248 dawng 'Earthen Dam' tuikhuah, Hualtu ram chhunga Dilzawl hmunah siam a ni a. Tui hi sawngbawl a nih hnu ah 450 mm a lian pipe km 39 a sei hmangin Muallungthu tlanga tui dahkhawlna, Reservoir, tui litre nuai 15 khawl theihna ah chhun luh a ni a. Muallungthu ram Khumtung peng atang hian tui 3 Million Litre per Day (MLD) hi pipe 200 mm a lian hmangin km 13 a thui pipe hmangin Trinity Hospital bul thleng luang phei lehin helai ah hian lak pen leh a ni a. Mualpui lamah 2 MLD leh Mission Vengthlang lamah 1 MLD chhun luh leh tur a ni ang a. A pipeline zawng zawng thui zawng hi km 66 a ni.

North East thalaite tana hmalakna tur hawng

Aizawl : India hmarchhak state thalaite’n eizawnna tlak thiamna chi hrang hrang an neih theihna tura a bik taka hmalakna atana bul tanna “Pilot initiative for special intervention for promotion of Apprenticeship in North Eastern Region (NER)” chu May 20, 2025 khan ATI Auditorium, MINECO-ah Mizoram Chief Minister Lalduhoma leh Union Minister of State for Skill Development and Entrepreneurship Jayant Chaudhary ten a rualin an hawng.

   He special intervention kaltlang hian ITI hnuaia thiamna zir thalai an pun beisei niin trade/sector hrang hrangah hmalak tum a ni a, a tul anga dah belh a ni bawk ang. He hmalakna hi hmarchhak thalai, anmahni state ni lo hmarchhak state dang emaw hmarchhak pawn lam state dangah emaw zir duh mi 26000 velin an chhawr tangkai beisei a ni bawk a, hemi atang hian cheng vaibelchhe 43.94 ruahman a ni a. heng thalai thiamna zir tura thlanchhuahte hian thlatin stipend an dawn tur awm sa Rs. 1500 bakah Rs. 1500 dang chu PM-NAPS kaltlangin an zir chhung zawng an dawn belh dawn bawk a ni.

EF&CC Minister hovin State Level Sub-Committee on Green Mizoram thukhawm

Aizawl : Environment, Forest and Climate Change department Minister Lalthansanga kaihhruaina hnuaiah State Level Sub-Committee on Green Mizoram chu May 20, 2025 khan Chief Wildlife Conference Hall, Khatla-ah hukhawmin, Green Mizoram Day 2025 hman dan tur an rel.

   Vawiina State Level Sub-committee on Green Mizoram thukhawm chuan kum kal ta hmalaknate a thlirlet bakah, kumin June ni 11-ah hman tur 'Green Mizoram Day' thupui atan 'Plant trees and catch the rain' (Ruahtui khawl nan thing i phun ang u) tih an thlang. State pum huapa Green Mizoram Day hawnna inkhawm chu Thenzawl-ah neih a ni ang a, he hunah hian Mizoram CM Lalduhawma chu khuallian atana beisei a ni.

Hmeichhe zirlai tithate chawimawi

Aizawl : State Hub for Empowerment of Women (SHEW), Women & Child Development (WCD) bultumin HSLC leh HSSLC Exam 2025 a Top 10-a tling hmeichhe naupangte hnena lawmpuina pekna hun 20.05.2025 khan Lianchhiari Run, I&PR Office-ah buatsaih a ni. Social Welfare, Women & Child Development (SWWCD) Minister Lalrinpuii chu khuallian a ni.

   Khuallian chuan zirlai hmeichhia tithate hnenah chuan chawimawina thilpek hlan in, thilpek hian pawisa fai bakah Certificate a keng tel a ni. HSLC ah hian Top 10-a tling hi an vaiin mi 24 an ni a, hmeichhia Sawm (10) an awm a, HSSLC ah hian Arts ah Top 10-ah mi 16 langin 9 te chu hmeichhia an ni a, Science ah mi 15 langin hmeichhia 6 leh Commerce ah chuan Top 10-a lang mi sawm (10) zinga 5 chu hmeichhia an ni a, Top 10-a hmeichhe naupang lang hi HSLC leh HSSLC ah an vaiin Sawmthum (30) an awm a ni.

Larsap-in Ephatha Special School din cham lawmna hmanpui

Aizawl : Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Ephatha Society of Mizoram for the Deaf and Hard of Hearing (ESOMDHH) buatsaih, Ephatha Special School for the Deaf and Hard of Hearing dinchamphaphak vawi 9-na lawmna, College Veng, Aizawla neih chu May 20 khan Khuallian niin a hmanpui.

   Ephatha Special School for the Deaf and Hard of Hearing hi May ni 11, 2016 khan din a ni a. Tun dinhmunah Principal 1, Teacher 5, Craft Teacher 1 leh Volunteer 1 te'n zirlai 24 an enkawl mek a. Class I atanga VIII thleng zirna awmin, Indian Sign Language (ISL) hmanga zirna kalpui a ni a. School dintu Ephatha Society of Mizoram for the Deaf and Hard of Hearing (ESOMDHH) hi bengngawng leh ri hriatna tha lote hamthatna ngaihtuahtu society ni turin February ni 28, 2012 khan din a ni.

PHC Doctor leh Nurse te tan Skill Workshop tan

Aizawl: May 19, 2025 khan Mizoram Health System Strengthening Project (MHSSP) buatsaihin Ni li chhung (19-22 May-2025) awh tur Primary Health Centre Doctor leh nurse-te tan Puerperal Sepsis leh Neonatal Sepsis Skill workshop chu Civil Hospital Conference Hall-ah tan a ni.

   Workshop atan hian state pawn atangin Dr. Prakash Mehta, Dr. Shreya Kamath leh Dr. Prasanna-te chu BP Bhagwan Mahaveer Jain Hospital, Bengaluru atangin an lo kal a. Ni 19 leh ni 20 hi Doctor te tana buatsaih niin ni 21 leh 22 hi nurse-te tana buatsaih a ni a. Doctor leh nurse nau neihna leh nau pianghlim enkawlna hmuna duty thinte chu sawrkar damdawiin hrang hrang atangin workshop-ah hian an tel a ni.

India rama Sawrkar damdawi in tha tehnaah Mizoram sawrkar damdawi in 5 an tling thar

Aizawl : May 19, 2025 khan India rama sawrkar damdawi in tha bik tehnaah Mizoram chhunga damdawi in panga – State Referral Hospital, Falkawn leh PHC pali – Chhipphir PHC, Phuldungsei PHC, West Phaileng PHC, leh Bilkhawthlir PHC te an tel thar.

   India rama sawrkar damdawi in tha bik tehna, National Quality Assurance Standards (NQAS)-ah State Referral Hospital, Falkawn (Aizawl West District Hospital / ZMC&H) chu an tling thar a, a tehnaah 92.89% an hmu. Hospital pumpui anga NQAS certification an hmuh bakah hian nau neihna hmun tha bik tehna (LaQshya)-ah Platinum Certificate hmuin Maternity OT bikah 98.26% hmuin, Labour Room-ah 92.88% an hmu a, naupang enkawlna hmun tha bik tehna, MusQan certificate pawh hmu telin 92.80% lai an score a ni.

   Aizawl West District Hospital bakah hian Primary Health Centre zinga NQAS certificate hmu tharte point score dan chu hetiang hi a ni – Chhipphir PHC (92.48%), Phuldungsei PHC (91.27%), West Phaileng PHC (89.47%) leh Bilkhawthlir PHC (94.94%).